2014年复活节高雄、台南之旅 – Day 2:台南一日游+高雄金钻、凯旋夜市
今日主要行程系到台南玩一日,夜晚返高雄之后去左新开嘅金钻观光夜市同凯旋观光夜市行下。
高雄御宿商旅-中央公园馆有包早餐,出发前落去餐厅食左早餐先。
系高雄市内,去大部份地方坐的士车费都系80-100蚊新台币之内,就算去远少少嘅打狗英国领事馆、梦时代、或者金钻夜市同凯旋夜市都系150楼下,而坐捷运每人最少都要20蚊新台币,我地四个人坐的士同坐捷运费用唔差得好多,所以今次旅程主要都以的士代步,不过今日试一次坐下高雄捷运去高雄车站。
捷运站就系酒店对面嘅中央公园旁边,先过马路,再穿过公园就到车站入口。
高雄捷运用唔到悠游卡,带左张悠游卡去都冇用,所以要先系自助售票机买车票,操作同度度嘅地铁售票机都系一样,选择目的地、人数,再放钱入去就出飞俾你,不过佢嘅车票唔系纸质,而系塑胶圆形嘅Coin,同曼谷、广州地铁用嘅系同一类。
中央公园呢个站好似冇乜人
由中央公园去高雄车站只系两个站,不过捷运站同火车站唔系相连,要先从捷运站行出地面。
行出捷运站旁边就系高雄火车站
先到售票处买火车票
真系好彩,黎到啱啱有班快车就开,不过仲有10几分钟,买完要行快步去月台。
高雄至台南单程车票106蚊新台币
闸口设系售票处行上去嘅二楼
原来月台离闸口仲有一段距离,要急步行啦。
落到月台,发现我地嘅车卡系最后,仲要行一大段先到,就开车,唯有先上车,再系车厢里面慢慢行过去。
高雄去台南嘅火车有快车同较慢嘅区间车,坐快车只停大站,从高雄到台南中间冇停站,一个站就到,需时只系30分钟,如果坐区间车就要站站停,需要用多一倍时间。快车有指定座位,而区间车就系自由席,同坐地铁一样,而且车厢同座位设计都同地铁差唔多。
快车车厢嘅样
区间车就系咁嘅样
开车啦
话咁快就到左台南
先系旅游服务中心攞张地图
如果要坐的士,一出火车站就系的士站,不过我地第一站会去赤崁楼,步行15-20分钟就到,所以打算行路过去,沿途顺便扫下街。
先影下台南火车站嘅白色建筑
赤崁楼系民族路二段,可以沿对正火车站嘅成功路直行,去到忠义路二段,或者赤崁街再转返过去民族路二段,另外亦可以系出左火车站之后先沿中山路向左行,直到民族路二段之后转右向西直行。我地选择行中山路,因为呢段路比较热闹。
沿中山路行冇几耐,系新光三越对面有个广场,好多嘢食。
先食返碗安平豆花
食完豆腐花继续向前行一阵就到左民族路二段路口,按照路牌指示转入民族路二段直行就会去到赤崁楼架啦。
呢段民族路二段冇咩睇,开头仲以为行错路。
不过行行下就见到呢间系南台好出名嘅赤崁担仔面,呢间面店门面唔系好起眼,招牌又系街外,行骑楼底嘅行人路好易Miss。
赤崁担仔面对面马路有间比较起眼嘅建筑物,叫剑桥大饭店。
赤崁担仔面系座旧唐楼,除左出面旧,里面同样古旧,几有特色,食嘢前先周围影下相。
嘢到,有得食。食物味道OK,但并唔系好好食果只,可能系台北食惯度小月,所以都系钟意度小月担仔面嘅味道多D。
由赤崁担仔面向前行少少就系赤崁楼,系台南主要历史建筑,不过地方唔大,冇咩特别嘢睇,好快睇完,入去要收50蚊新台币入场费好似唔系好值。
赤崁楼对面系武庙同天后宫
武庙主要供奉关帝,不过内堂仲有供奉观音、太岁等等。
从武庙旁边小巷入去就系天后宫,小巷里面有好多睇相算命同睇日子嘅馆子。
天后宫呢日好似有法事做紧
五月未到台湾嘅天气已经好热,咁嘅天气最好饮返杯冬瓜茶消下暑,呢间系武庙旁边卖冬瓜茶嘅店好多人排队,买杯饮下先。
行完赤崁楼呢区,下一个要去嘅系安平古堡附近嘅延平老街,因为距离比较远,所以要坐的士过去,如果唔赶时间,亦可以坐行走各个景点之间嘅观光公共汽车。
落左的士,司机教我地行安平路去安平古堡。
不过我地嘅目的系要去同安平路平衡嘅一条叫延平街嘅老街,不过条街一D都唔老,冇咩特色,只系同氹仔官也街咁,两边都系售卖手信、特产嘅店舖同摊贩。
延平街上最旺人气嘅系呢间售卖口立湿嘅蜜饯老店,排满人龙,趁热闹唔好蚀底都跟住买返D啦。
买嘅方式系先入店内攞左你要买嘅嘢,再出去排队俾钱,想悭D时间可以先揾个人排定队。
继续行
延平街尽头就系安平古堡,不过我地冇入去参观。
回程本来想坐的士,但系等等下见有架88安平线观光公共汽车,问司机系唔系去台南火车站,佢话系,于是上车啦,点知架车系景点之间周围兜,用左好长时间先返到去火车站。原来除左88线之外,仲有架99线嘅观光公共汽车系直去火车站架。
回程都系坐快车,不过今次仲有5个字先开车,买完飞慢慢入去月台等车。
行完一日台南身水身汗,紧系要返酒店抖抖先。休息到咁上下,夜晚就去三多商圈。不过点解冇乜人嘅,唔通高雄人唔出夜街。
三多商圈有个兴中夜市,虽然今日系星期日,但系仍然系水静河飞。
呢间水饺店D水饺同面都几好味
系三多商圈冇嘢行,决定打的去新开嘅高雄金钻夜市同凯旋夜市。哗,超多人,原来D人黎晒呢度,唔怪得其他地方人影都唔多啦。
虽然系两个夜市,但其实金钻夜市同凯旋夜市就系正隔离,两个加埋占地真系好大。
两个夜市周边都有好多街头表演
– Day 2 完 –
相关文章:
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!