2015年韩国首尔+釜山赏樱之旅(Day 3) – 釜山南浦洞BIFF广场黑糖饼、富平巨人炸鸡

第三日至第五日呢三日我哋会去釜山同镇海睇樱花，头两日喺首尔完全见唔到有樱花，希望去到釜山真系有樱花睇啦。

喺釜山返嚟首尔之后我哋会继续住返Loisir Hotel Seoul Myeongdong，所以将其中一个行李喼寄存喺酒店，只带一个去釜山。

今朝早餐又系食Isaac，不过买咗之后攞去火车站先食。

今日由首尔去釜山同埋三日后由釜山返首尔嘅KTX车票本嚟喺仁川机场个Travel Center换KR Pass果阵已经买好咗，不过回程车票买咗下午两点半，后尾谂谂下不如晏D返，等第三日喺釜山有多D时间去多个景点，所以去到首尔站先去售票处cancel原来张回程车飞，重新买过下午四点半果班KTX。因为我哋用KR Pass，所以cancel同买过另一班车都唔需要再俾钱。

改完车飞仲有时间，系大堂坐低食埋个Isaac三文治先。

系时候上火车啦。火车嘅上车月台可以喺大型显示屏见到。

坐KTX感觉好求其，因为冇任何闸口，亦冇人查车飞，自己行落去月台上车就得。

火车上面可以放大行李喼嘅行李架其实唔多，如果从首尔出发，最好早D上车以防冇位放行李，如果行李架真系Full晒，可以将行李喼塞入最后一排座位后面嘅空位，背囊之类就可以放喺座位上面嘅架度。

开车啦，下面系几张沿途风景。

去到南部，路边开始见到有樱花啦。

KTX上面虽然话有免费WiFi，但系信号好弱，完全上唔到网，好彩自己有租WiFi蛋。

坐咗差唔多三个钟终于去到釜山啦，落车同上车一样又系冇闸口同查车飞，就咁落车行出去就系。

KTX釜山站同地铁釜山站唔系相连，如果要坐地铁要先行出火车站，再入去地铁站。由于落紧雨，我哋出咗火车站见到的士就即上。我哋喺釜山住嘅酒店叫Hotel Aventree Busan，中文叫亚云树酒店，或者叫阿文树酒店，就喺南浦洞离釜山站唔远，坐的士都只系5,000几won。呢间酒店真系很正，详细介绍可以睇下呢篇《住@釜山Hotel Aventree Busan(亚云树酒店)》。

下面系酒店附近嘅地图

酒店Check-in完先落街揾嘢食，酒店附近就系BIFF广场，有好多小食档，不过今日落雨有唔少摊档都冇开。

呢度最出名系黑糖饼，真系好好味。

BIFF广场对面马路就系札嘎其市场，不过今日未去住。

今日下午嘅行程原本系Plan咗去海云台，但系由于落大雨决定取消，留喺南浦洞行下街。南浦洞最主要嘅购物街就系呢条光复路，可惜今日落雨路上显得好冷清。

附近嘅国际市场

喺光复路向东行到督就系乐天百货，百货公司同地铁站入面条地下街相连，落雨丝湿最好入去呢D地方。

乐天百货天台系个展望台，可以睇晒成个釜山港。

冇嘢做先食个甜品摄时间

地下街由南浦站通到去札嘎其站，由地下街行返酒店唔使淋雨。

返酒店休息下到夜晚雨势好似转细咗

出发去食晚餐啦，今餐去食富平市场嘅巨人炸鸡。

下面张地图系巨人炸鸡嘅位置

喺光复路向西行，会去到富平洞猪脚街，呢度有好多食店架，而且开到好夜。喺右图挂住welcome招牌嘅小巷入去。

一直行就会见到富平市场

穿过富平市场右手边就会见到呢间唔起眼嘅舖头，就系巨人炸鸡啦。

餐牌只有韩文，不过呢度食嘅嘢只系独姑一味，指住人哋枱上面果碟order就得啦，唯一唔同系人哋张张枱都系啤酒𩠌炸鸡，我哋系汽水。碟炸鸡16,000won，再加两支汽水，Total 19,000won。

食唔晒可以打包，打包嘅胶挂咗系墙上，可以自己攞嚟用。除咗打包D炸鸡之外，沿路仲喺便利店买D生果返酒店食。

Day 3 完，返回2015年韩国首尔+釜山赏樱之旅目录。

相关文章：

• 住@首尔明洞Loisir Hotel Seoul Myeongdong
• 住@首尔明洞天空花园酒店
• 住@首尔明洞王子酒店
• 住@釜山Hotel Aventree Busan(亚云树酒店)
• 首尔明洞酒店推介
• 韩国外国人专用火车通行证KR Pass
• 韩国MobilePOP Pocket WiFi Router使用分享
• 如何网上预约首尔昌德宫秘苑导赏团门票