2015年韩国首尔+釜山赏樱之旅 – 序篇

最近更新日期：2015-11-08 | 文章分类：2015年韩国首尔+釜山赏樱之旅

旅游教室» 游记» 2015年韩国首尔+釜山赏樱之旅» 2015年韩国首尔+釜山赏樱之旅 – 序篇

除咗日本之外，韩国系第二个热门嘅赏樱地方。韩国虽然面积唔大，但南北地区樱花嘅开花时间有一定差距，所以如果想喺短短七、八日嘅旅程中既睇到首尔盛开嘅樱花，又见到釜山嘅樱花满开，真系有D难度。所以今年(2015年)复活节嘅韩国首尔+釜山赏樱之旅，只能作出取舍。

位于南部釜山附近嘅镇海系韩国最著名嘅赏樱圣地，所以呢次旅程嘅重点系镇海嘅樱花。韩国南部嘅樱花开花时间比北部早，所以呢次旅程嘅日期就定喺三月尾至四月头，希望可以遇上釜山、镇海樱花嘅满开时间，而首尔樱花嘅开花时间比较迟，相信四月头睇到樱花盛开嘅可能性唔大，所以首尔只系今次旅程嘅陪衬。

一、行程与游记

呢次韩国首尔+釜山赏樱之旅嘅时间只有七日，其中头尾四日会喺首尔，而中间三日就去釜山同镇海。各日嘅行程同游记大致如下：

第一日 – 从澳门飞首尔，到达后已经系下午，所以第一日嘅行程只安排喺明洞行下街Shopping下咁。
游记：2015年韩国首尔+釜山赏樱之旅(Day 1) – 明洞行街街、姜虎东食烤肉

第二日 – 第二日嘅行程主要去前几次到首尔时未去过嘅北村韩屋村游览，而其余时间都系去食好嘢，包括再去土俗村食人参鸡，去新村食孔陵一只鸡，同埋去奖忠洞猪脚食每次都会食嘅平安道猪脚。
游记：2015年韩国首尔+釜山赏樱之旅(Day 2) – 北村韩屋村、土俗村人参鸡、孔陵一只鸡、平安道猪脚

第三日 – 釜山嘅行程从第三天开始，上午从首尔火车站坐KTX去釜山，可惜呢日南部嘅天气麻麻，下午到步果阵釜山不停咁落雨，所以取消咗原先去海云台嘅计划，改为喺南浦洞行下街食下嘢。
游记：2015年韩国首尔+釜山赏樱之旅(Day 3) – 釜山南浦洞BIFF广场黑糖饼、富平炸鸡

第四日 – 呢次赏樱之旅喺今天先算系正式开始，因为之前几天仲未见到过乜嘢樱花，而今日会由釜山到镇海参加军港节樱花祭，而且亦都顺呕去埋釜山洛东江旁边嘅挂法樱花隧道，全日所见嘅都系满开嘅樱花，超满足。
游记：2015年韩国首尔+釜山赏樱之旅(Day 4)上 – 釜山挂法樱花隧道
游记：2015年韩国首尔+釜山赏樱之旅(Day 4)下 – 镇海军港节樱花祭

第五日 – 今日要离开釜山返回首尔啦，不过我哋买咗下午嘅KTX车票，所以仲有一个上午可以用，而呢半日嘅行程就系去釜山其中一个赏樱热点南川洞，离开釜山前仲去埋札嘎其市场食海鲜。
游记：2015年韩国首尔+釜山赏樱之旅(Day 5) – 釜山南川洞樱花路、札嘎其市场

第六日 – 虽然明知四月头首尔嘅樱花未系时候，但今日都仲系决定去首尔嘅赏樱热点汝矣岛睇睇，之后就到新沙洞行街。
游记：2015年韩国首尔+釜山赏樱之旅(Day 6) – 汝矣岛樱花、新沙洞Line Store、酱油蟹

第七日 – 今日返回澳门嘅飞机虽然系下午机，但都冇打算安排行程，喺酒店训够，再落明洞食埋个早餐，就芝芝悠悠咁坐机场巴士去仁川机场。
游记：2015年韩国首尔+釜山赏樱之旅(Day 7) – 旅程结束

二、住宿酒店

今次七日旅程只系入住两间酒店。喺首尔入住嘅系Loisir Hotel Seoul Myeongdong，呢间酒店嘅质素算系中规中矩，冇乜特别，但就胜在位置超正，酒店就喺正明洞地铁站5号同6号出口旁边，好方便。想了解多D呢间酒店嘅介绍同评价，可以参考之前post嘅呢篇《住@首尔明洞Loisir Hotel Seoul Myeongdong》。