2014年圣诞节北海道赏雪之旅(Day 3) – 初遇大风雪@二世古
二世古系北海道著名嘅滑雪胜地,所以今次旅程重点会去二世古,不过因为我哋唔识滑雪,兴趣亦唔大,所以只系去滑雪场见识下,酒店亦唔系住喺滑雪场嘅渡假酒店,而系book咗一间二世古嘅温泉旅馆住一晚。
去完二世古之后,我哋会直接去小樽住多晚,之后先返札幌,所以会离开札幌三日两夜。由于唔系自驾,拖住两个行李喼去二世古会很麻烦,所以打算将两个喼寄存喺札幌嘅酒店,点不知,当我哋呢日喺头两晚入住嘅札幌三井花园酒店check-out之后要求寄存两晚行李嘅时候,职员竟然一口拒绝,话除非我哋返嚟之后会住返佢间酒店,唔系就冇得寄存。
果阵真系当堂乱晒,有啲唔知点算,如果要拖住两件大行李去二世古都唔知点算好,问酒店职员可唔可以通融,但都冇得商量,真系好绝。咁寸,唔求你,好在我哋两晚后返札幌会住果间札幌世纪皇家酒店就喺隔离,于是拖住行李过去睇下呢间酒店俾唔俾寄存行李。
札幌世纪皇家酒店系高级酒店,服务果然好好多,一去到大堂见我哋拖住行李,大堂职员已经主动问我哋有咩需要帮忙,最重要系当我哋话想寄存果阵,佢哋就即刻处理,而且完全冇问我哋系check-out咗定系未check-in,亦冇叫我哋俾订房证明佢睇,只系问我哋要寄存几多日,可能有得对比嘅关系,同埋之前有啲担心嘅心情影响,果一刻觉得世纪皇家酒店真系好得,而且佢嘅职员仲系讲国语嘅同胞,好滚动。
喺世纪皇家酒店寄存咗行李之后,仲有时间可以食埋早餐,呢餐食流心蛋汉堡包。
我哋今次喺二世古入住嘅温泉旅馆叫ニセコ昆布温泉鹤雅别荘 杢の抄,佢有接驳巴士由札幌载住客直接去到旅馆,不过一来因为有啲担心大雪天坐长途巴士会唔会有危险,二来我哋想喺呢日先去温泉旅馆附近嘅二世古国际滑雪场睇下,所以计划从札幌坐JR去俱知安駅,再转坐巴士去二世古国际滑雪场,然后再由二世古国际滑雪场坐温泉旅馆去旅馆嘅接驳巴士去旅馆,所以已经一早向旅馆预约好巴士时间,不过最后因为天气问题,临时改变计划,冇去到二世古国际滑雪场。
去俱知安嘅火车票前一晚已经买定咗,由札幌去俱知安嘅JR火车只有旁晚接近六点有一班直通车,其余时间都需要去小樽转车,而且由小樽去俱知安嘅JR列车全部都系冇指定席嘅,所以买咗一张自由席乘车券,全日都可以用,但唔可以中途离站。
今日札幌嘅天气都OK,但火车越向小樽行天气就越差。
大风大雪,咁嘅情况落车真系几惨。
到咗小樽,要系呢度转车,转车时唔需要离开火车站,只要睇清楚列车嘅月台行去上车就可以。
由于去俱知安或者经过俱知安同二世古嘅列车班次唔多,而且又系冇划位嘅自由席,所以最好早啲上车,咁先会有位坐。如果系好似我哋咁从札幌出发到小樽转车,两班车嘅到站同开车时间相距最好有半个钟。
从小樽去俱知安沿途都系俾厚厚积雪覆蓋嘅荒山野岭
终于到达俱知安
俱知安虽然话系二世古地区最大嘅城镇,但其实人口好少,所以JR车站都系好细。
俱知安系去二世古几个滑雪场嘅必经之路,所以虽然JR俱知安地方只系细细地,但里面都有个游客中心,而且有识讲英文嘅职员。
由于风雪太大,我哋有啲担心如果按照原本计划坐巴士上去二世古国际滑雪场会有危险,所以决定改变计划直接去温泉旅馆,于是请游客中心嘅职员帮我哋打电话去ニセコ昆布温泉鹤雅别荘 杢の抄睇下佢哋有冇车可以过嚟接我哋,不过因为临时临急啲司机同车都出晒去接客人,安排唔到,所以唯有转坐下一班火车去较近旅馆嘅二世古站再转的士去温泉旅馆。
到咗二世古站,呢度比俱知安站仲要细。
外面漫天风雪天寒地冻,好在车站里面有间细细哋嘅日式Cafe,唔好讲咁多先食个午饭医咗肚暖下个胃。
趁住喺度食嘢当然成机问埋老板边度有的士坐啦,咁老板就遥指对面呢间车房,话车房旁边呢间小屋系个的士站。
从的士站望返过去JR二世古站
我哋嚟到个的士站阿姐请咗我哋入去屋仔度取暖,然后我哋将想去嘅温泉旅馆地址俾佢睇,之后佢就call的士过嚟,叫我哋坐低等阵。间屋仔有个火炉,真系暖笠笠,如果企喺出面一定好快变雪条。
好快架的士就到咗
虽然好大风雪,几乎睇唔到路,又分唔出边度系路,但的士司机车速都唔慢,可能行惯晒,对于佢地好小儿科。
我哋喺二世古入住嘅温泉旅馆叫ニセコ昆布温泉鹤雅别荘 杢の抄,距离JR二世古好近,好快就去到。
虽然好大风雪,但都有几个日本家庭自己开车嚟。
第一次喺冬天落雪嘅时候入住温泉旅馆,个feel真系唔同啲,而且呢间ニセコ昆布温泉鹤雅别荘 杢の抄真系好得,详细介绍可以睇返呢篇《住@ニセコ昆布温泉鹤雅别荘 杢の抄》。
我哋住嘅房
由于早咗到,所以留喺温泉旅馆嘅时间多咗,不过都唔怕闷,浸吓温泉再喺温泉旅馆嘅休息厅hea下,时间好快就过。
又到食晚饭时间
呢个休息大厅令人好舒服,食完饭喺度摊抖吓真系好正,仲可以喺度烧棉花糖。
Day 3完,返回《2014年圣诞节北海道赏雪之旅》总目录
相关文章:
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!