2007年吉隆坡公幹之旅（Day 1 – Part 2）

之前講到係酒店check-in完已經7點幾，跟住見肚飯（因為機上個飯實在太少），所以先出去搵下野食先啦。

吉隆坡同澳門冇時差，但係由於係西面，而且又近赤道，所以7點鐘太陽都仲未落山。由於初到貴境人生路不熟，所以決定坐輕軌火車（Monorail）去比較多人嘅Bukit Bintang（星光大道）一帶睇下先。

要去Monorail車站好容易，只要跟住架空嘅路軌行就可以架啦。我地住嘅Shangrila Hotel啱啱係正Bukit Nanas同Raja Chulan兩個車站之間，第一次唔識路所以決定行去Bukit Bintang方向嘅Raja Chulan站，行左大約5分鐘就到，後來發現Bukit Bintang近D，行過去只需2~3分鐘，所以之後幾日都係去Bukit Bintang站。

酒店前嘅十字路口（呢張相係第二日朝早影架）

想過馬路記得要按一下呢個制，如果唔係有排都唔轉綠燈

Monorail Bukit Nanas車站（呢張相係第二日影架）

Mono火車埋站（呢張相都係第二日影架）

Mono火車架駛室（呢張相又係第二日影架），呢邊係車尾，所以唔見個司機

其實吉隆坡市區並唔係太大，由酒店行去Bukit Bintang都係只需要10~15分鐘時間，如果坐Monorail，要坐兩個站，車費RM1.2，車程唔洗3分鐘就到。

Monorail Bukit Bintang車站

落左車就係Bukit Bintang路同Sultan Ismail路交界處嘅十字路口，D人叫Bukit Bintang路做星光大道，記得幾年前跟星馬團黎過呢頭，不過果陣坐旅遊巴，黎完都唔知自己係邊。

Bukit Bintang路同Sultan Ismail路交界處嘅十字路口，成日都好多人

Bukit Bintang路，又係超多人

又係Bukit Bintang路

我地係Bukit Bintang路行左一陣，見到有間叫新馳名雞飯嘅舖頭門面幾靚，又幾多人食，於是入去醫下肚先。

新馳名雞飯，位於Bukit Bintang路50號，由Bukit Bintang路同Sultan Ismail路交界處嘅十字路口向西行（即係亞羅街方向），大約100米就到

餐牌

招牌菜雞飯，RM6.5一個，碟菜係另叫架；個飯係雞油飯（即係海南雞飯果種），好好味，碟雞唔知點整，唔係海南雞，不過好好好味，唔怪得個個都叫呢味。

食完飯之後行左過去對面D商場行下，因為第一次黎，雖然有地圖在手，但係都攪唔清楚D商場嘅位置。不過之後幾日再黎過兩次，已經摸清晒D位置。

Bukit Bintang可以以Sultan Ismail路做分界，西面係一D比較大眾化嘅商場同食店，而東面睇落就high好多，有好多名店同餐廳。

其實Bukit Bintang一帶都好細，D商場又係好細，而且一個連住一個，如果唔買野，唔洗半個鐘就行完。Bukit Bintang西面主要嘅商場有Sungei Wang Plaza（金河廣場）、BB、Low Yat Plaza、Imbi Plaza，另外行過Imbi路對面有間呢區最大嘅Time Square。而東面就有Lot 10…..其他唔知，因為太high冇行過，只係過去影下相。

星光大道

金河廣場門口

從馬路對面影嘅金河廣場正門（呢張相係第二日影架）

金河廣場入面，同旺角D商場冇咩分別

金河廣場隔離嘅Plaza Low Yat，專賣電腦產品同手提電話

第一日到步，行到9點幾探完路就坐返Monorail返酒店休息先，今次坐去Bukit Nanas站落車。