2007年吉隆坡公幹之旅（Day 2 – Part 1）

由於會議要到今晚6點半先有個welcome reception，所以今日有大半日時間可以周圍玩下。出發前上網搵過下D資料，知道雙子塔中間個Skybridge可以上去，不過要一早去排隊攞飛，所以今朝又晨咁早起身，7點就一丁友離開酒店向雙子塔出發。

出到街度周圍靜英英，人都唔多個，而且個天都好似仲未光得晒。由酒店行去雙子塔只係一條直路，10分鐘就到架啦，不過第一次行，一路行一路影下相咁，所以最後行左約半個鐘先到。

由酒店行去雙子塔嘅路上

終於到左KLCC商場門口

KLCC附近，可能星期日關係，周圍人又冇車又冇

從KLCC望返酒店，吉隆坡塔係正酒店後面

雙子塔就係正KLCC隔離（兩座野好似相連），去到KLCC門口之後問左個security哥哥點去，跟住入到KLCC，再行到中間之後轉左就到左雙子塔個lobby。

雙子塔Lobby，由於係星期日冇人返工，所以靜英英

跟住照指示牌落一層，就去到skybridge個入口大堂啦。

時間早上7點半，已經有50~60人排緊隊等攞飛

Skybridge即係雙子塔兩座塔中間條天橋仔，大約係正塔高度嘅中間，有41層樓高。雙子塔主要係office，所以唔俾遊客上去，但Skybridge就可以上去（好似逢星期一close），不過每日只限1,600幾人上，上去唔洗俾錢，不過要一早去排隊攞飛，攞飛果陣仲要話明攞幾點鐘飛，然後按時上去。

派飛時間由朝早8點開始，我7點半到，要等成個鐘時間。其實如果唔想排隊，都可以試下10點後去碰下運氣，如果好彩11點前都仲有飛派，不過可能係下午5點後嘅飛。如果想攞早D嘅飛又或者好想上去一定要攞到飛，咁可以搵個抵得諗嘅friend（好似我咁），叫佢一條友晨早去排隊攞飛，因為一個人可以攞好多張架，唔洗個個都去。

等緊嘅時候不斷有遊客黎排隊，多數係鬼佬同埋中東遊客，好似唔多覺有其他中國人。去左8點，成個大堂都迫滿人，起碼有300人。8點半準時開始派發，不過速度好慢，我排第60位左右都要等到9點先攞到飛。

開始派飛之後有工作人員問你要幾多張、咩時間同係邊度人，然後俾個籌你

終於攞到兩張10:45嘅飛

走果陣仲有咁多人掛緊隊

攞完飛行返酒店食早餐，10點鐘就搵埋另一個同行嘅同事一齊去雙子塔，上Skybridge。

酒店食早餐嘅地方

KLCC商場入面

又係KLCC商場入面

10點8左右到左skybridge入口（即係之前攞飛果度）準備上去，上去之前先安排左去睇一套介紹馬來西亞石油公司嘅3D電影（賣廣告），後段加插少少講雙子塔點起嘅介紹。然後先至分批放人上去skybridge，每批大約20人（怕條skybridge負荷唔到）。

上skybridge前要做保安檢查

Skybridge上

雙子塔下嘅KLCC公園

雙子塔遠望，遠處個摩天輪應該就係為2007馬來西亞旅遊年整嘅Eyes on Malaysia

每批人只限係Skybridge上停留10分鐘，時間一到就要走人。落到地下大約係11點3，跟住我地到外面影下相，然後去對面Avenue K商場下面嘅地鐵KLCC站坐車去唐人街。

雙子塔下面冇辦法影佢全相，只可以影到佢宏偉嘅一面

雙子塔對面嘅Central Bank大廈

雙子塔出面大街

待續……….