2007年吉隆坡公幹之旅(Day 3)

今日嘅活動主要係參加研討會,研討會由朝早8點開始(洗唔洗咁早啊…..),到下午5點結束,中午有一餐由大會提供嘅自助午餐,跟住係夜晚8點有一個formal dinner,一路食到10點半先結束。

 

不過由研討會5點結束至晚宴8點開始之間,有3個鐘空檔時間,所以一個人趁住呢段時間又出去行咗一陣。今次係去地圖上標示嘅另一處購物區 – 印度人社區逛逛。印度人社區係吉隆坡市區嘅西面,主要街道係Jalan Tuanku Abdul Rahman,中心區域係Sogo百貨。

 

由ShangriLa Hotel去如果坐Monorail只得一個站,見咁近所以決定行去,不過由酒店出發,經過Monorail Bukit Nanas站、RapidKL Dang Wangi站一路行過去Sogo都足足行咗15分鐘。

 

途經RapidKL嘅Dang Wangi車站
RapidKL車站1

 

行去Sogo路上,Jalan Dang Wangi
DangWangi_1

 

終於到左Sogo,不過冇入去
DangWangi_2

 

Jalan Tuanku Abdul Rahman成條街都係一D賣印度服裝嘅舗頭(好娘),冇咩好行
DangWangi_3

 

位於Jalan Tuanku Abdul Rahman嘅戲院

DangWangi_4

 

由Sogo沿Jalan Tuanku Abdul Rahman向南行就係獨立廣場,再行落去就係唐人街,由於條街冇咩好睇,所以決定一路行去尋日因落雨冇時間去嘅吉隆坡火車站,同埋順便再去唐人街個超市買多幾包拉茶做手信

 

Jalan Tuanku Abdul Rahman末段,穿過條架空路軌之後就係獨立廣場
DangWangi_5DangWangi_6

 

沿途經過RapidKL嘅Masjid Jamek站
RapidKL車站4

 

呢個站係RapidKL Kelana Jaya線同Ampang線嘅交匯站,但係原來兩條線係唔可以轉車架,如果想從一條線嘅車站上車,然後坐去另一條線嘅車站落車的話,只可以係交匯站先落車再走出車站,再過對面馬路再買飛坐另一條線嘅車,咁都叫轉車 真係唔知D馬來西亞人點諗嘢,希望澳門第日嘅輕軌唔好學佢咁…

 

乘客買票中
RapidKL車站5

 

RapidKL有自動售票機(Monorail冇),不過好少見有人用,咁難得有幾個學生用緊,影下佢先

RapidKL車站6

 

由酒店出發,經過印度人社區行到去唐人街,大約用左一個鐘時間(包括睇嘢同影相時間)。去到中央市場之後,係中央市場同RapidKL Pasar Seni車站之間有條橋,過左橋沿住行人路行就可以去到吉隆坡火車站,呢個火車站係20世紀初建築,不過入面似乎冇咩好睇,我諗呢座嘢只宜遠觀,近看就大可不必啦

 

吉隆坡火車站內
獨立廣場周圍16

 

吉隆坡火車站月台
獨立廣場周圍17

 

睇完吉隆坡火車站都已經接近6點半黃昏時間,唔知點解呢區咁多烏鴉,一到黃昏就鴉…鴉…鴉…咁叫,氣氛好似好恐怖。所以都唔敢久留,拿拿林行返去Pasar Seni車站附近嘅uo超市買埋幾包拉茶就坐RapidKL返酒店。不過呢個鐘數係放工時間,好多人坐RapidKL,而且一部RapidKL又只得四卡車,等咗兩班車先至迫到入去呀。

 

好迫人啊…
RapidKL車站3

 

雖然最終都上咗車,不過因為手上攞住兩袋嘢,人又迫又冇位坐,所以終於感受到坐吉隆坡地鐵嘅真實苦況。原來係人多嘅時候係吉隆坡坐地鐵真係好慘架,一來要忍受大家嘅汗味同蘇味(體味),二來原來吉隆坡地鐵同巴士冇咩分別架,時不時有上斜落斜,仲有90度轉彎添。好彩只係坐兩個站,好快就到左Dang Wangi站可以落車。

 

Dang Wangi站外影嘅日落影照下嘅雙子塔
雙子塔19

 

返到酒店之後沖埋涼,就去參加晚宴,完咗都成10點半,所以冇再出去,呢日就咁就完咗。

fb share

如果喜歡這篇文章,請點個「讚」吧!

fb share

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share