2008年東京春季賞櫻＋溫泉之旅（第六天） – 仙石原一之湯、大涌谷、箱根湯本

2008年3月31日（上午有雨，下午天晴，氣溫7~14度）

行程：一之湯溫泉旅館 _ 大涌谷 _ 箱根湯本 _ 新宿 _ 涉谷

呢一晚真係成個行程中訓得最好嘅一晚，不過半夜就發生左一D不可思議事件。話說我地係雨天下聽住雨聲好舒服咁入睡之後，訓訓下去到大約半夜時份，俾D”沙沙”聲嘈醒左，本來唔想理佢架，不過嘈住晒好硬耳，於是咪起身睇下囉，原來係個電視自己開著左，不過畫面就只得雪花。我估可能係之前只係用遙控器熄部電視，之後因為機器故障而引至自動開返啦。不過當時都唔得閒分析咁多，因為好眼訓，所以將電視機個制熄左佢就繼續訓覺，好彩佢之後冇又再開返。

訓左一覺好覺果朝7點半就起左身，可能呢幾日都習慣左呢個時辰起身啦。於是趁住未有早餐食同埋唔係咁多人，再去浸多一次溫泉。今次又係得我一個包晒個場，朝早因為光D，所以可以睇清楚個室外溫泉嘅環境，同前一晚浸嘅Feel又有D唔同。

其實朝早8點開始就有得食早餐，只要入去食堂有位就可以食架啦。我地摸到8點半先去食，發現果晚除左我地之外，仲有幾個香港人同幾個台灣人。

早餐，左下角條魚係主食，味道唔錯架，而左上角果舊係豆腐球，超難食

因為個天仲係不停咁落雨，所以我地都唔急住走，慢慢食完早餐之後再摸到差唔多10點先Check-out走人。因為落雨關係，所以決定今日只係去大涌谷，然後返去箱根湯本買完手信就早D返新宿。

因為諗住從桃源台坐吊車上大涌谷，所以今次唔係去返尋日落車個大原巴士站坐巴士，而係去仙石原文化センター前個巴士站等車，發現路程比去大原長左一半，不過其實都係好快到姐。

仙石原文化センター前個巴士站

可能朝早巴士班次少，我地足足等左20分鐘先有車，當時又凍又落住雨，巴士站附近又冇瓦遮頭，好慘。

可能星期一又早嘅關係，大涌谷唔係太多遊客，主要都係一車車旅行團。

呢度就係大涌谷啦，未行出去已經聞到好刺鼻嘅硫磺味

係一之湯浸嘅溫泉就係呢D水

擔住遮行上去都好唔方便，其實主要都係上去上面間屋仔度買返一包黑玉子姐

大涌谷出名嘅黑玉子就係呢度賣，500円一包有6隻，平過山下賣果D，又新鮮D

黑玉子其實就係用溫泉水煮熟嘅雞蛋，不過因為有硫磺，所以浸完個外殼變成黑色，聽講食一隻可以延長壽命十年架，我地買左一包，有6隻，每人分左兩隻，各增加左20年壽命，嘻嘻。

係大涌谷逗留到大約12點，之後我地就坐返吊車轉纜車到強羅，再轉坐登山電車去箱根湯本，準備買完手信就返新宿。

箱根湯本駅出口

一出箱根湯本駅就係手信街，好多手信賣，所以如果打算係箱根湯本坐車返東京，可以留返係呢度先買手信，唔洗係山上買左攞住咁辛苦啦。

箱根湯本手信街

都係箱根湯本手信街

好古老嘅收銀機啊

箱根湯本手信街後面有條咁嘅河

河上有條橋，對面就係富士屋

我地係箱根湯本行左兩個鐘，搵左間舖頭食完Dinner就走人囉。因為人唔多，好容易可以買到指定席飛。因為係箱根湯本上車嘅人唔多，其實就算唔買指定席飛都有位坐，不過費事中途俾人叫起身，所以都係用多870円買個安心好D。

唔知係唔係個天玩我地，當火車開始離開箱根湯本時，個天就唔再落雨，之後仲慢慢有返陽光添，不過沿途仍然冇機會睇到富士山。

回程都係坐左大約個半鐘多D，4點4左右就返到新宿駅，跟住先順便行過去買定後日去機場嘅巴士車飛，車費要3,000円一位。5點返到新宿太子Check-in，之前幾日住對住火車軌果邊，覺得火車經過時有D嘈，所以今次要求佢俾另一邊對住歌舞伎町嘅房，不過覺得都係無乜分別既。

係酒店休息左個幾鐘，係時候出去搵食啦，今晚決定去位於涉谷嘅美登利食壽司。美登利就係對住涉谷車站嘅Mark City4樓，Mark City入面冇咩舖頭，不過因為係轉車必經之路，所以都好多人。我地去到果陣大約係7點，已經有20幾人排緊隊啦，最後排左45分鐘先入到去食，真係好受歡迎啊。

美登利門口

我地點左嘅其中兩樣野，一個壽司Set，另外一個海鮮蒸水蛋，好味…..

食完野跟住係涉谷行下，然後就返酒店休息啦。

涉谷車站外，棵櫻花樹好靚啊

涉谷