第一次首爾自由行：5天行程規劃分享

文章發表日期：2026-02-11 | 文章分類：韓國旅遊攻略 | 作者：Dilbert MO

旅遊教室» 旅遊攻略» 韓國旅遊攻略» 第一次首爾自由行：5天行程規劃分享

第一次去韓國唔知去邊度好，或者可以參考吓我第一次首爾自由行嘅行程。行程只有短短5日，凌晨機去晨早機返，所以玩嘅時間只得4日，不過只係去首爾都夠使，去咗景福宮、首爾塔、鷺梁津水產市場呢D首爾主要景點，仲可以去埋南怡島。

呢次旅程係12月聖誕節去，首爾嘅天氣都幾凍，氣溫around零度。

下面係第一次去首爾自由行嘅5天行程規劃：

Day 1 – 朝早到仁川機場之後，坐機場巴士入首爾，到酒店Check-in，在明洞、仁寺洞行吓街食吓嘢。
Day 2 – 到南怡島一日遊，夜晚到東大門食豬腳。
Day 3 – 朝早去景福宮參觀、睇士兵換更，下午返明洞行街，夜晚上首爾塔睇夜景。
Day 4 – 上午去鷺梁津水產市場食海鮮，下午返明洞繼續Shopping。
Day 5 – 坐晨早機返屋企。

首爾5天自由行Day 1：明洞、仁寺洞Walk & Eat

今次去首爾嘅航班係紅眼航班，零晨2:10起飛，去到首爾大約係當地時間清晨6:30，取回行李出到大堂都只係7:30。

仁川機場去明洞機場巴士

我地今次book左位於明洞嘅酒店，由仁川機場去，坐6015號巴士。機場巴士售票處就係大堂裡面，好容易搵到，只需要向counter職員講要買嘅巴士number，以及人數就可以架啦，跟住佢會話你知係邊個門口出去坐車，6015號巴士嘅乘車處係12號門外。

你可以係大堂counter買埋回程車飛，不過其實冇咁嘅必要，因為所有車飛上都只係有巴士number以及購買日期，並冇標示乘車日期、班次，亦唔會有劃位。所以張車飛只代表你已經俾左錢，攞住張車飛係購買日起15日內任何時間都可以乘車，使用車飛坐車同上車俾錢係完全一樣，所以冇需要買定回程。

由仁川去明洞車程大約70分鐘，巴士到達下一個站前會有韓文同英文廣播站名，但係佢D英文好難明，唔識聽，不過都唔洗怕，因為當巴士進入南大門、明洞一帶之後，廣播會有埋普通話，雖然發音都係怪怪地，不過起碼可以get到佢意思。

機場巴士車票除咗現場買之外，都可以係Klook、Trip.com等平台買到，即買即用，價錢比現場買仲平D，下面係Klook、Trip.com嘅購票Link：

除咗搭機場巴士之外，都可以坐機場鐵路從仁川機場到首爾站，再轉坐地鐵到明洞站，不過坐巴士一站到底，唔使拖住行李轉車，舒服好多。

首爾王子酒店

我地住嘅酒店叫Prince Hotel Seoul(首爾王子酒店)，就係明洞世宗酒店嘅對面馬路。

落車後過斑馬線就係王子酒店。

Prince Hotel Seoul算係一間細酒店，大堂好細，不過房間都幾大，地板係木地板，裝修得幾有現代感，住落真係幾舒服。

↓ 我們住的Red Double A房，面積不大，床是Queen Size ↓

↓ 廁所和淋浴間 ↓

坐零晨機真係好辛苦，上次去北海道領教過，今次又再試多一次，超眼訓，真係好想即係入房訓返幾粒鐘。可惜酒店要等到下午兩點之後先可以check-in，唯有暫時寄存行李，等夠鐘再返來。

韓國嘅插蘇係兩腳圓腳果種，佢嘅插座全部係圓形凹入去嘅，一定要用圓形插頭先可以插到入去。

明洞餃子、百濟蔘雞湯、燒肉食食食

去首爾果程機只係每人派左個包，食完都唔飽。再加上天氣咁凍，真係有D饑寒交逼嘅感覺。所以放低行李之後，首要任務係去醫左個肚先。

可能係購物區嘅關係，上午10點嘅明洞仲係水靜河飛，D舖頭都仲未開門，想搵個地方食D嘢都唔容易。

最後去左呢間“百濟蔘雞湯”食人蔘雞，每份₩13,000。如果只打算食一次人蔘雞湯，咁最好留返個肚去“土俗村”先食，因為“土俗村”嘅味道會好好多，不過亦有朋友話“百濟蔘雞湯”好味過“土俗村”，所以味覺呢家嘢有時真係見仁見智。

食完熱辣辣嘅人蔘雞湯之後總算回復返D體力同精神，可以出去行下街。因為明洞未有舖頭開門，所以第一站選擇去仁寺洞。

先係自動售票機買地鐵車飛，步驟如下：1.選擇語言，2.按橙色嘅“一次性”按鈕，3.按目的地車站，4.選擇人數，5.按照所顯示嘅金額入錢，攪掂攞飛。

韓國嘅栗子真係好大粒，不過可能因為咁嘅原因，所以街邊炒栗子好多都炒得唔熟，如果買記得睇清楚先。

仁寺洞街主要賣各種有韓國特色嘅手信。

行完仁寺洞差唔多lunch時間，決定先返明洞食午飯，再去酒店check-in。

中午時間嘅明洞，人流明顯多左D。

午餐去左食明洞餃子，去到見到好多當地人排隊，諗住味道一定唔錯啦，點知食落感覺味道麻麻。

食完野周圍行下，行到兩點幾終於可以去酒店check-in啦。入到房第一時間做D乜？當然係上床訓覺啦。坐夜機真係好辛苦，試過上次去北海道同埋今次去首爾之後，以後都要盡量避免坐夜機。可能年紀大左，成晚冇訓第二日真係會完全冇晒精神。

就係咁，我地係酒店度冇較鬧鐘，訓左四粒鐘，一直訓到七點先起身。再沖埋個熱水涼，成個人精神晒先至正式出動遊首爾。

夜晚嘅明洞真係同日間完全唔同，唔知係唔係臨近聖誕節關係，成條街都係人。由於已經係八點幾食晚飯時間，所以決定先醫左個肚先。對於唔食得辣嘅人係韓國食野，燒烤似乎係少數可供選擇嘅其中必然之選。

因為唔識佢餐牌上寫D乜，所以要左一個兩人份量嘅拼盤，再加多一份頂級牛肩肉。

先來好多前菜，一來由於太辣，二來唔想食飽左食唔落主菜，所以唔係食太多。左邊碟菜係用黎包住牛肉食嘅。

呢間烤肉店係有專人幫你燒架，唔洗自己動手，燒完夾黎食就得架啦。

第一天行程完結

首爾5天自由行Day 2：南怡島一日遊

今日主要係去南怡島，由首爾去南怡島主要有兩種方法，一種係由首爾坐火車去加平，再轉坐的士去，另一種就係坐巴士去，不過每日只得一班車。

我哋去果時巴士係係仁寺洞上車，而家改咗地方。而家首爾去南怡島嘅接駁巴士，會係弘益大學站開車，經過明洞南山藝場公共停車場，再經東大門歷史文化公園站，所以呢三個地方都可以上車，回程同樣會停呢三個站。

由於每日只有一班車，所以最好提前網上買定車飛為，Klook、KKday同Trip.com都可以買飛。

南怡島

首爾去南怡島大約個半小時車程，巴士終於抵達南怡島嘅碼頭啦。落車嘅時候司機會叫大家四點返黎落車地點，之後四點半準時開車返回首爾，不過佢係用韓文講架，我地都係聽其他乘客翻譯。

南怡島碼頭嘅巴士乘車處就係南怡島購票處隔離，架巴士會一直停係度。

因為我地已經買左套票，所以直接入去等船。南怡島係係河上嘅一個小島，由碼頭坐駁船五分鐘就到架啦。

本來以為去南怡島可以睇到雪景，可惜天公唔做美，我地係韓國呢幾曰並冇雪落，當然冇雪景可睇，只係見到水池結冰。

如果遇到適合時間，南怡島會係影相幾靚嘅地方，例如深秋紅葉季節以及滿佈積雪嘅時候。如果唔係呢D時節，風景只係一般。介紹就唔多講啦，大家睇相算啦。

其實南怡島面積都好細，基本上三小時已經行晒。因為返回首爾嘅巴士係四點半先開車，所以唯有被迫留足五小時。

回程嘅時候，除左原來乘客之外，亦都有一D坐返回首爾嘅乘客上車，所以架車坐滿晒。司機係四點半準時開車，不過由於首爾市區放工時間好塞車，所以用左兩小時先返到。

落車時已經天黑，決定去東大門行下，順便去食豬腳，因為中午冇正式食過嘢，好肚餓。

東大門食豬腳

出左東大門地鐵站之後，途經東大門城樓以及清溪川。

因為我地唔係shopping達人，所以東大門尋寶式嘅shopping並唔太適合我地，行左一陣之後決定去搵嘢食。

從東國大學入口站地鐵站3號出口行出地面，沿行人路向前行200米左右就會見到好多間專賣豬腳嘅食店。最後去左一間好多人食嘅，見佢招牌寫有電視台介紹過，應該都唔差得去邊。

入到去見枱枱都係一碟豬腳，所以跟住叫。豬腳有大、中、細三款。我地點左細嘅，已經足夠兩人食。D豬腳都煮得好入味，用生菜包住黎食好好味。

食飽之後見仲有精神體力，所以決定去光化門廣場行下。聖誕節期間光化門廣場好似舉行光節，有燈飾以及激光表演。

第二天行程完結

首爾5天自由行Day 3：景福宮、南山首爾塔

今次旅行唔打算去太多地方，所以跟住呢兩日冇set定幾點起身，一於訓到夠為止。就係咁，今日差唔多十一點先至出門口。今日主要係去參觀景福宮，下午就留係明洞一帶行街shopping，夜晚會上南山首爾塔睇夜景。

土俗村人參雞

到達地鐵景福宮站之後，先去有名嘅人參雞店土俗村食返個人參雞湯當係早餐連午餐。土俗村係一條橫街入面，由景福宮站2號出口行出地面，然後直行見到一條橫街嘅街口有一間GS25（便利店），左轉入去行5步就到架啦。

同之前係明洞百濟食嘅相比，土俗村嘅參雞湯確實係好多D。

景福宮

食完嘢我地就沿路行返地鐵站再行去景福宮，到達嘅時候啱啱舉行完守城兵換班儀式，不過唔緊要，換班儀式係每小時一次（整點），呢班睇唔到可以較啱時間睇下一班。

其實景福宮並唔係好大，如果唔係好有興趣去慢慢欣賞古建築的話，一個鐘時間已經足夠。我地用左啱啱好一個鐘，出返黎剛好睇到守城兵換班儀式。

明洞行街街

遊覽完古蹟，下午嘅行程又返回現代都市行街shopping啦。首先搭地鐵去會賢站，一出黎就係南大門市場，係賣各式平價雜貨嘅地方，真係乜都有得賣，可惜睇唔啱，一樣嘢都冇買到。

其實南大門市場就係明洞購物區隔離，只係隔左一條大馬路。係南大門市場行左一陣，見冇嘢啱睇所以行返去明洞。

今日係平安夜，所以係明洞成街都係人，人迫人好辛苦。

所以行左幾間舖頭有少少收獲之後，搵左一間叫o’sulloc嘅餅店飲下嘢食件餅hea下。

呢幾日係街上見到好多人都攞住一盒蛋糕，原來韓國人興聖誕節食蛋糕慶祝，而且D蛋糕仲整得好靚架。

High tea完先返酒店放低嘢順便又休息左一陣，黃昏時候出發去南山首爾塔。

首爾塔

南山係位於明洞南面嘅一座山，而首爾塔就係座落於山上。上南山一般會坐纜車上去，以前由明洞去纜車站需要行一段10幾分鐘嘅斜路，而家起左一條南山傾斜電梯，可以坐上去纜車站，舒服好多。南山傾斜電梯位於南大門路近隧道口嘅路邊，由明洞站行去的話，先向南大門方向行，到到大路口時再轉左(南面)，然後直行就會見到架啦，路程大約需時10分鐘。

因為係平安夜，上南山嘅人好多，所以排左超過20分鐘隊先上到纜車。纜車係由山腳去南山公園，如果要上首爾塔，要另外買飛。因為上塔係坐升降機，每次只可以載10幾人，所以又要再排15分鐘隊。

南山公園並唔係好大，我地只係用左兩小時就行完，其中有差唔多一半時間用係排隊上。落返山腳我地又返去明洞搵地方食晚餐啦。

其實明洞地方好細，撞啱聖誕節人人都黎晒明洞，比起下午更加人山人海，今次真係唔洗自己行，因為其他人會推住你向前。

想搵食飯嘅地方，但係間間都爆晒，最後去左一間叫“鳳鄒”嘅食醬油粉絲雞，不過人太多，等左40分鐘先有位。“鳳鄒”似乎又係獨孤一味，人人都係叫一碟雞，睇個樣以為唔辣，但其實都係有少少辣。

雖然係平安夜，但係好多舖頭都係冇延長營業時間，尤其係百貨公司，照樣係一早關門，但係條街又係一樣咁多人架喎。十點幾之後，連街邊小販都開始收檔，所以又係時間返酒店訓覺囉。

第三天行程完結

首爾5天自由行Day 4：鷺梁津水產市場食海鮮

同尋日一樣今日又係訓到好晏，十一點先離開酒店。今日嘅行程係去位於首爾江南嘅鷺梁津水產市場食海鮮。

由明洞去鷺梁津，可以先坐2號線到首爾站再轉1號線，不過因為係首爾站轉車要行一大段路，所以我地選擇左由明洞坐2號線去忠武路轉3號線再轉新開嘅9號線，以為可以行少D，點不知轉9號線車時一樣要行一大段路，路程仲長好多添。

出左地鐵站之後並冇明顯嘅指示教你點行去鷺梁津水產市場（可能有，不過只係得韓文，有都唔識睇啦。），不過其實去鷺梁津水產市場嘅路好易認，因為市場就係鐵路另一邊嘅旁邊，出左地鐵站（如果坐9號線就係鷺梁津站2號出口行上地面），行上天橋再行過鐵路對面就到。

鷺梁津水產市場地方都幾大，有好多檔賣海鮮嘅檔販，不過因為地面濕泣泣，我地只係行左前面一排檔口。而由於言語不通，開頭問左兩檔都買唔成，之後有一檔識講一D普通話，終於買左幾件海鮮，包括皇帝蟹、螺同埋鮑魚。因為事隔太耐所以都唔係咁記得用左幾多錢，不過印象中記得雖然係平過日本，不過亦唔係想像中咁平。

買好海鮮之後只要攞上二樓嘅食店，就可以交俾食店為你整黎食架啦，收費以人頭計算，如果整蟹仲要另外每隻計錢，收費方面依稀記得都唔平架。檔主教我地去左以下呢間食店，因為佢有個服務員係由東北到韓國打工嘅中國人，可以用普通話溝通。

一入到食店，個老板娘就即時攞左我地袋海鮮，又唔問下我地想點整喎。睇黎佢地整法可能只係千篇一律，所以都費事問你啦。後來問個中國勞工服務員先知原來鮑魚會整刺身，皇帝蟹同螺會用水烚熟，仲以為有螺肉刺身食。

可能韓國人嘅煮食技巧唔係咁好，雖然D海鮮幾新鮮，但係整出黎味道只係一般，冇預期咁好，不過同呢幾日其他幾餐相比，呢一餐都已經好滿足啦。

食完海鮮離開鷺梁津水產市場嘅時候，發現開始落雨，而且越落仲越密。咁唯有返去明洞樂天百貨shopping啦，其實今日都plan左行呢度，因為一來要去樂天百貨9樓免稅店買雪花秀，二來要去地下樂天超市買士多啤梨返澳門。

因為要去嘅地方都去晒，所以呢日下午將部相機放左係酒店，減輕D負擔等shopping時可以輕鬆D，所以冇影到相，但係就因為咁而錯過左拍攝呢晚首爾落第一場雪嘅機會。今次去韓國好期待可以睇到雪景，可惜果幾日因為天氣回暖，遇唔到落雪，而就係我地臨走前呢晚竟然落起雪黎，不過因為時間太短，等唔到佢成地都係雪嘅景色出現，因為我地第二朝晨早就要走啦。