2009年12月23日(星期三)，天晴，氣溫：around零度

今日主要係去南怡島，聽講係一處因為拍攝韓劇《冬季戀曲》而出名嘅地方。按照旅遊書介紹，由首爾去南怡島主要有兩種方法，一種係由首爾坐火車去加平，再轉坐的士去，另一種就係直接係仁寺洞坐巴士去，不過每日只得一班車。為免交通麻煩，我地前一日已經去左買定飛（詳細介紹可參考第一天內容）。因為巴士會係上午九點半出發，所以我地八點九出門口，由酒店坐的士直到去仁寺同塔洞公園。

架巴士就停係公園旁邊面向仁寺洞街果邊嘅馬路邊，車身大大隻字寫住仁寺洞至南怡島船著場（日文），好易搵架。因為我地前一日已經俾晒錢買左套票，所以只需要將張收據俾個司機，等佢係張list搵到個名，跟住佢就俾左一set正式車票同入場券我地。

見仲有時間，而且車程都要差唔多1.5小時，所以先去附近M記買早餐上車食。

可能唔係旺季，架巴士只係坐左一半乘客，而司機亦係九點半準時開車。經過大約個半小時車程，巴士終於抵達南怡島嘅碼頭啦。落車嘅時候司機會叫大家三點半返黎落車地點，之後四點準時開車返回首爾，不過佢係用韓文講架，我地都係聽其他乘客翻譯。

南怡島碼頭嘅巴士乘車處就係南怡島購票處隔離，架巴士會一直停係度，等到四點鐘。

因為我地已經買左套票，所以直接入去等船。南怡島係係河上嘅一個小島，由碼頭坐駁船五分鐘就到架啦。

本來以為去南怡島可以睇到雪景，可惜天公唔做美，我地係韓國呢幾曰並冇雪落，當然冇雪景可睇，只係見到水池結冰。

如果遇到適合時間，南怡島會係影相幾靚嘅地方，例如深秋紅葉季節以及滿佈積雪嘅時候。如果唔係呢D時節，風景只係一般。介紹就唔多講啦，大家睇相算啦。

其實南怡島面積都好細，基本上三小時已經行晒。因為返回仁寺洞嘅巴士係四點先開車，所以唯有被迫留足五小時。另外，島上面並冇乜嘢食店，多數遊客（包括我地）都只係食燒餅同公仔面充饑。

回程嘅時候，除左原來乘客之外，亦都有一D坐返回首爾嘅乘客上車，所以架車坐滿晒。司機係四點鐘準時開車，不過由於首爾市區放工時間好塞車，所以用左兩小時先返到仁寺洞。

待續. . . . . .