《2009年聖誕首爾之旅》- 第二天(2) – 夜遊東大門、光化門廣場

今日係南怡島消磨左成日，返到仁寺洞已經係六點，落車之後決定去東大門行下，順便去食豬腳，因為中午冇正式食過嘢，好肚餓。

 

出左東大門地鐵站之後，途經東大門城樓以及清溪川。

 

 

因為我地唔係shopping達人，所以東大門尋寶式嘅shopping並唔太適合我地，行左一陣之後決定去搵嘢食。

 

 

* * * * *

 

我地睇左旅遊書，見到佢介紹嘅平安道豬腳好吸引，所以決定今晚試一試。由於旅遊書嘅介紹放係東大門度，所以以為間食店位於東大門，搵左一輪先知原來豬腳食店位於東國大學入口站（東大入口站）附近，離東大門有一大段距離。

 

從東國大學入口站地鐵站3號出口行出地面，沿行人路向前行200米左右就會見到好多間專賣豬腳嘅食店。本來打算搵旅遊書介紹嘅平安道，可惜始終搵唔到，所以去左一間好多人食嘅，見佢招牌寫有電視台介紹過，應該都唔差得去邊。

 

 

入到去見枱枱都係一碟豬腳，所以跟住叫。豬腳有大、中、細三款，價錢分別係₩30,000、₩25,000、₩20,000。我地點左細嘅，已經足夠兩人食。D豬腳都煮得好入味，用生菜包住黎食好好味。

 

 

* * * * *

 

食飽之後見仲有精神體力，所以決定去光化門廣場行下。聖誕節期間光化門廣場好似舉行光節，有燈飾以及激光表演。

 

 

係呢度順便插一段，推介一下韓國嘅雪條，雖然天氣只得零度左右，但係佢D雪條真係超好味，就算幾凍我地都忍唔住口每日食，尤其是密瓜味超好味。

 

第二天行程完結