2007年吉隆坡公干之旅（Day 1 – Part 1）

五日吉隆坡公干终于完满结束啦，星期三晚8点半终于安全返抵家门，祖先保佑。
今次出门主要系去公干，所以只系趁住唔洗开会嘅空档时间周围行下街、食下野同埋睇下景。

上星期六（本来放假可以训晏D，点知要去公干，又冇OT收，惨！），晨咁早就出门坐的士去港澳码头（呢程车费冇得claim返，用左成40蚊），去到码头当然系print返张香港入境纸先啦（去果程因为直去机场禁区，唔洗入境，所以张入境纸系留返由吉隆坡飞返香港果阵用），跟住去码头二楼出境大堂度嘅机场TurboJet柜位办理登机手续同埋行李托运（好似只有Cathay先可以系澳门码头预办登机手续，不过要俾$20手续费）。

澳门港澳码头二楼新开嘅喷射飞航机场快线登记柜位

Check-in完都只系9点左右，系码头坐左一个钟，等到10点钟终于可以坐TurbotJet去香港机场码头，10点9左右就到左香港嘅机场码头啦。因为已经搅掂登机手续，所以落左船直接去排队攞返HK$120机场税退税，跟住排队坐去候机大楼嘅接驳巴士。

香港赤立角机场码头至候机大楼嘅接驳巴士

系机场等到12点3，终于上得机啦，12点9都算准时起飞，大公司果然冇delay。

坐国泰长途机有戏可以睇，所以第一时间睇下有咩新片先。原来有哈利波特-凤凰会的密令、变形金刚、虎胆龙威4.0…..，不过都睇过晒。好彩回程果阵有套嚟多件衰鬼上帝未睇过，等回程果阵睇下先。之前上网听人讲坐国泰有雪糕食，点知原来得果一条雪条，失望。

每个座位都有部卫星电话？只系个Remote Control

新片速递

国泰嘅飞机餐真系麻麻地，个人觉得Air Macau果D好食过佢

坐左3个半钟，终于到达吉隆坡机场。落左机先要坐返程无人架驶小火车去入境大楼，好彩冇咩国际航班，好快过左关，跟住攞埋行李就可以出去坐的士去酒店啦。

吉隆坡机场上空

落机之后

等紧坐无人架驶小火车去入境大楼

由机场去吉隆坡市区一般可以坐的士或者KLIA Express，坐KLIA要去到火车站再转车去酒店，而且单程每人都要RM35，而坐的士只需要RM70左右，直接去到酒店门口，如果有两个人或以上，当然系坐的士啦，既方便又省钱。

不过坐的士之前要去Budget Taxi柜台度买飞，个counter就系攞完行李之后行去接机大堂嘅路上，埋到去话佢知你去边，佢就会打张飞俾你同埋收埋车钱，因为路程唔同，所以唔同地方车费会唔同，不过市中心应该都系RM65~RM70之间。（注：而家马来西亚币对港币汇率大约系2.3~2.4左右）

买完taxi飞照佢指示行去3号出口，跟住D人排队上的士就可以啦。上车前会有工作人员问你攞张飞，因为张飞上面已经写左你去嘅地方，所以全程唔洗同个司机讲，又唔洗再俾钱，到站落车就可以，好方便又唔怕俾人屈。（我地行紧去3号出口等的士果阵，有个的类似的士佬嘅中国人埋黎问我地系唔系要坐的士去市区，我地话已经买左budget taxi，佢就好似吓你咁话起码要等一个钟，其实budget taxi都好多，不停咁有车黎，所以唔洗排好耐就上到车，千其唔好帮衬D自己拉客嘅的士啊。）

排紧队等上的士（注：前面个靓女我唔识架）

Budget taxi车票收据，机场去Shangrila Hotel车费RM67.40

由机场坐车去市区大约一个钟左右（如果系返工时间就大获，事关由郊区去市区返工嘅人好多，塞车都塞死你，我估当放工时间由市区去郊区应该都系好塞车）。下午6点半终于到达酒店，搅埋check-in再入房放低行李之后大约7点零。

酒店门口

间房都算几大间

Queen-size大床

淋浴间好似细佐D

吧柜度有好多好吸引嘅小食，不过超贵，一包M&M都要RM17，点敢食佢

左边支evian要成RM24，右边两支冇牌子嘅系酒店赠饮

待续……….