2007年吉隆坡公干之旅（Day 2 – Part 4）

之前讲到下午3点半返到酒店之后，个天开始行雷闪电，跟住仲落埋雨添。本来打算放低野之后再出去行吓嘅，不过睇黎而家只可以被迫留系酒店等今晚大会个welcome reception啦。

等啊等…..，等到6点零可以换衫落去酒店个ball room参加welcome reception啦。参加welcome reception之前要先完成个registration程序，不过今次主办机构安排得唔系咁好，搅咗好耐先搅掂。原来个welcome reception只系个大会开幕嘅仪式，跟住就系俾大家倾计social嘅时间，由于同其他地方嘅人都唔系太熟识，所以只系so咗冇几耐就走人。

本来以为个welcome reception有埋晚餐食，点知原来冇，只得饮品同埋一D小食，咁唯有自己出去揾野食啦。

我地拿拿林返房换埋件衫大约7点半就出去食野，今晚打算去双子塔下面个KLCC商场，顺便可以影吓夜景。点知出到门口个天仲系落紧雨，本来谂住行路过去，而家唯有坐一程的士去啦。呢间酒店都几好架，门口有队的士车队（可能系同出面公司合作），唔洗自己出去揾车，又唔怕俾人屈。不过呢度嘅的士一样都系冇咪表，问counter话要RM10。我觉得系吉隆坡坐的士最低消费可能系RM10，不过系市区之内好多地方都系RM10就可以，如果系街度截的士，大家应该开价RM10，唔好俾人屈咁多。

今次去吉隆坡外出主要都系坐Monorail或者RapidKL，只系来回机场同埋有两次落大雨冇办法坐咗的士（包括今次）。虽然坐的士可以有单据claim公数，而坐Monorail同RapidKL因为冇收据claim唔到数，不过我都系钟意坐公交多D，一来系可以体验吓自由行嘅感觉，二来唔想claim太多公数，话晒出街食野都唔系公干嘅必要部分，不过话返转头，如果唔出街食而留系酒店食，咁餐费一定贵double以上，所以出去食一来可以同公司节省多D钱，二来自己又可以体验一D特别美食，一家便宜两家著。

KLCC总共有四层，去到先行咗个圈睇下，最后应用咗小弟一向嘅揾食原则“最多人食嘅一定系最好食”，所以去左四楼嘅Madam Kwan’s食今晚嘅晚餐。

成个KLCC商场呢间Madam Kwan’s最多人帮衬，网上都好多人推介

椰浆饭系Madam Kwan’s嘅招牌菜，网上都好多人推介，不过因为唔like食椰子，所以冇order

最后点左几味家常小菜

食完饭同同事又分道扬镳，各行各，而且讲定各自返酒店。因为出面仲系落紧雨，所以只可以系商场入面行下睇下嘢。点知…..，行行吓竟然遇到大陆黎嘅骗子同胞。唔系瓜……….，骗子集团都学大集团咁“走出去”？

话说当我食饱饱周围行周围睇同周围影之际，突然有个靓女行埋黎，然后同我讲：“我说华语你听得懂吗？”（普通话对白），由于黎得突然黎唔切反应，再加上又系靓女，咁我第一反映就讲左句：“听得懂。”（普通话对白）。跟住佢就讲：“我是北京来的，我家人明天才到，我现在身上没有钱，你可以请我吃饭吗？”

吓……….，唔系瓜，身为港澳同胞，平时train咗咁多一听就知咩事啦，以为大陆有，澳门有，同香港有姐，势估唔到黎到马来西亚都有呢D屎桥。以前细个见识少就话俾人呃姐（其实都唔系俾人呃左好多次，数埋都系得三次，一次广州，两次澳门咁大把），冇理由而家仲会上当。

所以我即刻同佢讲我系黎旅行架，你不如试吓揾当地人或者警察帮你啦，佢一听完就转头走左去。

见佢走咗我就行去另一度再影过相啦，点不知…..，又黎多个（吓，唔通我个样真系成个蠢字，咁多骗子揾我埋手）。不过今次黎嘅系一个成个骗子样嘅男人，佢行埋黎同我讲：“我说华语你听得懂吗？”（普通话对白），吓，同一句开场白。今次我诈帝听唔到，继续行同影相，点知佢仲跟住黎，仲行去我面前再同我讲：“我刚才问你我说华语你听不听得懂？”。死，今次冇得扮听唔到，于是唯有扮唔识“煲冬瓜”，同佢讲： “Sorry, I don’t understand what you say.”，跟住佢就转身走人。

终于甩难，好彩之后冇再黎多件，大家都要小心D…..

KLCC商场内，2至4层

KLCC商场内一角

KLCC商场内另一角

KLCC商场中间个电梯

虽然KLCC夜晚10点先关门，不过9点开始已经有舖头关门架啦，所以决定出去出面影下双子塔嘅夜景。出到去点知仲系落紧雨，不过就唔系好大。我睇都冇机会会停，所以决定冒雨出去影返几张相。好彩有带到雨伞，可以唔怕俾雨淋，不过因为要一手攞伞一手影相嘅关系，所以好多张相都影得唔好。

先影一张双子塔对面嘅大厦夜景

呢张系唯一一张见得吓人嘅双子塔夜景相，其他都因手震走晒样

当我冒雨影紧双子塔嘅时候，有个security哥哥行过黎，不过又冇同我讲嘢㖞，只系一路企系我附近，我估可能系佢见成个广场咁大，只得我一个人系度，所以过黎睇吓我做紧咩，跟住可能又怕我俾贼仔打劫，所以企系度保护吓，不过当时仲系落紧雨，佢虽然有顶帽，但系都淋湿晒，真系唔系咁好意思。

影完双子塔夜景之后，都系时候返酒店，由于行返去只需10分钟，雨又唔系太大，自己又有雨伞，所以决定行路返去，顺便可以睇下酒吧街。不过可能落雨关系，酒吧街度D酒吧唔系太多人。

好有亚热带特色嘅酒吧

酒吧街上，都有一D外国人行

呢间吧系正酒店对面，入面坐晒清一色马来西亚靓女，不过太黑又怕影相俾人打，所以影得好差

9点9左右返到酒店，冲埋凉就训啦。