2008年东京春季赏樱＋温泉之旅（第五天 [3]） – 仙石原一之汤

我地去到强罗大约系4点40分，出左强罗车站就有个巴士站，不过去到都未黎得切睇路线图架巴士已经到左，咁唯有上车问个司机去唔去我地想去个站啦。

强罗车站，左边系缆车月台，右边系电车月台

仙石原一之汤网页度教人搭巴士去到”仙石原文化センター前”站落车，然后再行6分钟路就可以去到，不过之前系网上见有去过嘅人介绍系”大原”站落车会比较方便，所以我地都谂住坐去大原站。问左司机原来架车唔去仙石原文化センター前，但就会去大原，咁当然啱晒我地啦。

大原站位于一个三叉路口，因为之前已经Print左大原站同一之汤附近嘅卫星图片出黎，所以好快认得D建筑物，落左车揾啱条路直行唔洗3分钟就到啦。

仙石原一之汤出面条马路

呢间就系我地Book左嘅仙石原一之汤啦

仙石原一之汤近镜

仙石原一之汤好细架，就得果两层，有十间和室，五间楼上五间楼下

我地间房系楼上，房名叫冈崎宿

房入面嘅被炉，个暖炉系台下面，而且系凹入去架，放对脚落去就好似坐系度咁，暖立立好正架

第一次住和室，感觉真系几新鲜，不过间房并唔系太大，住三个人都迫迫地，如果要住四个人真系唔多够位。间房入面原来都有个洗手间，仲有个冲凉缸，不过就好细，而且冇冲凉用品架，所以冲凉一定要去温泉果度个浴室冲。

由于旅馆嘅食堂唔系好大，所以要分开食晚饭，Check-in果阵会同你安排大约嘅食饭时间，我地安排左系7点3先食。本来想系食饭之前浸返次温泉先架，不过去左几次，都有几个人系度浸紧，所以最后都冇浸到，系房到休息到食饭时间就去饭堂食晚饭啦，饭堂就系二楼，著住和服拖鞋去食饭，真系有一种家嘅感觉。

因为系平价旅馆（一间房包三人早晚两餐都系HK$2,490），所以都冇预到D野好食得去边，不过食落D食物都几唔错，主菜系呢煲野

仲有呢条鲷鱼，甜甜地几好味架

食到最后原来仲有个雪糕甜品，不过我地食完饭拍拍个罗由就想走，行到出门口好彩个侍应叫住我地，不过佢又唔识英文，讲左一轮都唔知佢想讲乜，后来讲讲下佢走去厨房，我地咪企系度你眼望我眼囉，跟住佢就攞住三杯雪糕走出黎，咁我地先知原来有饭后甜品。不过个饭后雪糕系用柑桔做架，好酸，但系见个侍应咁有心栏住我地都要攞俾我地，点都要俾面食D啦。

食完饭之后，因为出面落紧大雨，而且附近亦冇地方好去，咁唯有留系房度。原来坐系被炉上面一边冲茶一边睇电视系好舒服架，唔怪得睇电视见D日本人咁Enjoy啦。

不过黎呢度主要目的都系浸温泉，所以冇理由成晚留系间房度架，但系又唔想同其他人一齐浸㖞，可以点呢？其实一之汤嘅规矩系夜晚11点至早上6点可以包起个温泉半个钟黎浸，不过等到11点都已经训左囉，所以我地耐不耐都走落去温泉睇下有冇人，好好彩，未到9点男汤果边已经冇晒人，入到去只得我一个人浸，可以包晒个场黎浸。其实佢个温泉好细架，最多只可以5个人一齐浸。

大浴场（温泉）就系楼下

温泉系分开男汤同女汤架，因为唔好意思攞部相机入去影，所以只系影左个门口

入到去浴场度，会先有个地方俾你揾衫，除晒所有衫裤后可以放系个篮度，之后就要光脱脱入去浸囉。其实小弟今次系第一次浸温泉，入到去见到有个池，池附近有D登仔同花洒，开头傻傻地以为个水池就系温泉，后来先发现仲有度门出去室外嘅，个温泉原来系系出面露天果个先系，真系失礼。

第一次浸唔敢浸太耐，不过浸一阵已经觉得好舒服啦，几日来嘅疲劳都舒缓左好多。浸完温泉之后觉得好舒服好想训返个好觉，第一次训他他米感觉都好正，可能因为出面落紧雨，听住雨声又咁近大自然训觉真系好舒服。