《2009年圣诞首尔之旅》- 第一天(1) – 明洞百济参鸡汤、购买南怡岛车飞

2009年12月22日(星期二)，天晴，气温：around零度

一向以来都好少会系圣诞新年呢D大时大节嘅日子去旅行，因为好怕人多同人迫嘅环境，而且呢D日子去旅行，机票、酒店都会贵好多，唔化算。但系今年圣诞节，竟然忘记左呢条戒律。

原本嘅计划系打算去日本白川乡，只可惜到落实计划时，发觉果段时间日本嘅机位通通full晒，原来呢D日子外游嘅人真系咁多架。所以最后只好退而求其次，选择左短短地去几日韩国首尔。

今次首尔之行选择由澳门出发，贪佢方便。不过澳航去首尔嘅航班时间非常之差，如果下次有机会再去，都唔会再坐佢。

* * * * *

由澳门去首尔嘅航班系零晨2:10起飞，去到首尔大约系当地时间上午6:30。韩国海关都几有效率，好快就过左关，取回行李出到大堂都只系7:30。

人人都话换钱系仁川机场会抵D，所以出到大堂第一件事就系要换钱。系韩国换钱需要收手续费，之前系网上print左张coupon，换钱手续费有discount。

韩国最大面额嘅纸币系5万元，不过未见过，兑换店都只系全部俾1万元面额嘅我地，一张大约等于MOP70，我地只系换左HK20,000，等于大约3百万韩国元，足足有成差唔多300张，日日要带住成旧银纸出街，好惨。

* * * * *

换完钱第二件事就系去买机场巴士车飞。我地今次book左位于明洞嘅酒店，由仁川机场去，坐6015号巴士。

机场巴士售票处就系大堂里面，好容易揾到，只需要向counter职员讲要买嘅巴士number，以及人数就可以架啦，跟住佢会话你知系边个门口出去坐车，6015号巴士嘅乘车处系12号门外。

你可以系大堂counter买埋回程车飞，不过其实冇咁嘅必要，因为所有车飞上都只系有巴士number以及购买日期，并冇标示乘车日期、班次，亦唔会有划位。所以张车飞只代表你已经俾左钱，攞住张车飞系购买日起15日内任何时间都可以乘车，使用车飞坐车同上车俾钱系完全一样，所以冇需要买定回程。

* * * * *

由仁川去明洞车程大约70分钟，巴士到达下一个站前会有韩文同英文广播站名，但系佢D英文好难明，唔识听，不过都唔洗怕，因为当巴士进入南大门、明洞一带之后，广播会有埋普通话，虽然发音都系怪怪地，不过起码可以get到佢意思。

* * * * *

我地住嘅酒店叫Prince Hotel Seoul，就系明洞世宗酒店嘅对面马路。当初以为系世宗酒店落车行过去好方便，点知去到先知实际环境同想像好唔同。

Prince Hotel Seoul算系一间细酒店，大堂好细，不过房间都几大，地板系木地板，装修得几有现代感，住落真系几舒服。不过如果大家去首尔，我唔会建议大家住呢间酒店，最主要嘅原因有两个：

第一，Prince Hotel Seoul虽然话系位处明洞，不过佢系系明洞购物区对面马路，一路之隔气氛就好唔同，明洞购物区人山人海，商店林立，非常热闹；但系对面马路嘅Prince Hotel Seoul嘅周围就极之冷清，感觉上非常之唔爽。

第二，Prince Hotel Seoul与明洞购物区之间嘅马路系冇路面过路设施架，要过对面只可以行行人隧道，而韩国嘅行人隧道系唔会有扶手电梯，亦冇升降机，上落隧道要行几十级楼梯。所以当你坐机场巴士系世宗酒店落车，拖住个喼去Prince Hotel Seoul，以及回程由Prince Hotel Seoul拖住个喼去世宗酒店门口等巴士时，你就会发觉住Prince Hotel Seoul系一个错误嘅选择。

如果要以位置嘅方便作为标准系明洞揾一间酒店，我觉得Savoy Hotel系最佳嘅选择，呢间酒店就系明洞购物区之内，对于主打shopping嘅人士系最佳嘅选择。Royal Hotel亦都唔错，呢间酒店距离明洞街与中央通交界处只有廿几步路。另外，位于地铁乙支路入口站附近嘅ibis酒店以及乐天酒店位置都好好，呢两间酒店好接近乐天百货，方便shopping，而且亦近地铁站。其实明洞主要嘅购物区系由退溪路、南大门路、乙支路以及三一路所围成的四方形地带，而最旺嘅地方就系明洞站与乙支路入口站之间嘅地带，系呢个地带之内嘅酒店位置都唔错。

* * * * *

坐零晨机真系好辛苦，上次去北海道领教过，今次又再试多一次，超眼训，真系好想即系入房训返几粒钟。可惜酒店要等到下午两点之后先可以check-in，唯有暂时寄存行李，等够钟再返来。

坐air macau去首尔果程机只系每人派左个包，食完都唔饱。再加上天气咁冻，真系有D饥寒交逼嘅感觉。所以放低行李之后，首要任务系去医左个肚先。

可能系购物区嘅关系，上午10点嘅明洞仲系水静河飞，D舖头都仲未开门，想揾个地方食D嘢都唔容易。

最后去左呢间“百济参鸡汤”食人参鸡，每份₩13,000。如果只打算食一次人参鸡汤，咁最好留返个肚去“土俗村”先食，因为“土俗村”嘅味道会好好多，不过亦有朋友话“百济参鸡汤”好味过“土俗村”，所以味觉呢家嘢有时真系见仁见智。

食完热辣辣嘅人参鸡汤之后总算回复返D体力同精神，可以出去行下街。因为明洞未有舖头开门，所以第一站选择去仁寺洞。

2006年尾时曾经去过首尔公干，当时地铁仲系用紧人手卖票，但今次黎到，发现全部换晒自动售票机。自动售票机好易用，步骤如下：

1.选择语言，2.按橙色嘅“一次性”按钮，3.按目的地车站，4.选择人数，5.按照所显示嘅金额入钱，搅掂攞飞。

如果往来首尔市内各主要车站，一般每程车费都系₩1,000，较远嘅站可能要₩1,100或₩1,200。用自动售票机买单程车票飞时，要收取₩500按金，出闸后需要将车票放入退款机退返按金。

按照旅游书介绍，可以买张T-Money，方便搭地铁。不过其实买T-Money并唔系太化算，一张T-Money要用₩2,500购买，冇得退返，但系之后每程车费可以平₩100，即系话要坐超过25程地铁先可以回本。其实如果行程唔紧凑，一般一日只会坐到3~4程地铁，就算5日full day都系首尔市内，乘坐地铁嘅次数都唔会超过20程，所以除非长住，否则买T-Money一定回唔到本。其实每次购买单程车票并唔会好麻烦，所以绝无需要去买张T-Money。

如果距离短坐的士亦唔会太贵，系光化门、明洞、仁寺洞一带嘅主要旅游区，日间车费都只₩4,000左右，如果有四个人share费用同坐地铁一样。

* * * * *

韩国嘅栗子真系好大粒，不过可能因为咁嘅原因，所以街边炒栗子好多都炒得唔熟，如果买记得睇清楚先。

仁寺洞街主要卖各种有韩国特色嘅手信。

去仁寺洞除左买手信之外，系要买定去南怡岛嘅车票。系仁寺洞塔洞公园旁边有去南怡岛嘅巴士，每日一班，早上9:30由首尔去南怡岛，下午4:00由南怡岛返回首尔。如果游客少可以去到上车先买飞，不过如果怕到时冇位，亦可以系附近嘅旅游服务中心买定飞。南怡岛套票₩23,000，包括来回车费₩15,000以及入场劵₩8,000，套票同单买相同价钱。系旅游服务中心买套票时，佢只会用A4纸print一张收据俾你，上面有你个名、人数、坐车日期，睇落好简陋，不过佢唔会呃你嘅，到坐车时俾张纸个司机，佢会系张list度对返你个名，之后就会俾正式车票同入场券俾你架啦。

呢度就系南怡岛系首尔嘅旅游服务中心，位于仁寺洞街靠近塔洞公园附近，由红色招牌门口入去上二楼就系。

塔洞公园向仁寺洞街呢边就系上车嘅地方，巴士number系1029。

* * * * *

行完仁寺洞差唔多lunch时间，决定先返明洞食午饭，再去酒店check-in。

中午时间嘅明洞，人流明显多左D。

按照旅游书介绍，午餐去左食明洞饺子，去到见到好多当地人排队，谂住味道一定唔错啦，点知食落感觉味道麻麻。

待续. . . . . .