2015年韩国首尔+釜山赏樱之旅(Day 1) – 明洞行街街、姜虎东食烤肉
今次去韩国嘅主要行程,系去釜山同镇海睇樱花,所以三月尾出发,一来想避开四月复活邮假期嘅人潮,二来三月尾四月头预计系釜山樱花满开嘅时间。
自从Air Macau每日增加咗一班飞首尔嘅航班之后,唔使再坐零晨机去,返嚟果阵亦唔使天未光就入机场,真系舒服好多。
澳门机场内嘅复活节装饰
入闸前先食返个M记早餐
去到韩国系当地时间下午2点几
今次系MobilePOP租左部WiFi蛋,要喺仁川机场攞机,所以到步后先上去离境大堂嘅指定位置攞机。关于MobilePoP WiFi蛋嘅详细介绍可以睇返我之前已经Post嘅呢篇《韩国MobilePOP Pocket WiFi Router使用分享》。
攞完WiFi蛋喺机场仲有一件事要做埋,就系去地下Korail嘅Travel Center换张KR Pass同埋出定之后去釜山嘅KTX车票。今次都系第一次坐KTX同埋买KR Pass,有关呢方面嘅经验之前已经写咗呢篇《韩国外国人专用火车通行证KR Pass – 网上购票与换票教学》同大家分享。
本来谂住出完KTX车票就返上一楼搭机场巴士去明洞,点不知俾counter出飞个姐姐sales我哋买呢种A’REX火车票加的士嘅套票,一时耳仔软就买咗啦,之后计返先知唔抵。呢个套票每位12,000won,包括一张由仁川机场到首尔站嘅A’REX火车票,同埋由首尔站去酒店嘅的士。如果你住嘅酒店冇机场巴士到又距离首尔站比较远,咁买呢个套票都抵,如果唔系呢个套票真系唔值得买囉。我哋间酒店距离机场巴士站好近,坐机场巴士比咁样转车方便好多,而且坐机场巴士每人只系10,000won,如果用埋呢张1,000won折扣券,只需要9,000won,平佢足足3,000won架。
A’REX火车
出闸
火车到首尔站出闸之后,会见到呢个counter,喺呢度通知职员等佢call的士司机,好快就会有司机过嚟接。架的士系停喺呢层嘅停车场,所以唔需要行出地面。
今次喺首尔住呢间酒店叫Loisir Hotel Seoul Myeongdong,位置真系好正,质素就普普通通过得去咁。详细介绍同评价可以睇返呢篇《住@首尔明洞Loisir Hotel Seoul Myeongdong》。
系酒店Check-in完都已经系4点几钟,因为中午都仲未食过嘢,呢个时候当然要先医肚先啦,所以行程第一站系喺明洞揾嘢食。
呢餐系食安东酱油粉丝鸡,一碟粉丝鸡两个人食,盛惠19,000won。
食完嘢都已经系5点几,去唔到其他地方唯有喺明洞行下街。
原来中国大使馆就喺明洞购物区,之前都冇留意到,今次因为酒店间房对正大使馆所以先知道。
中国大使馆旁边条小路有几间兑换店个Rate好似都几抵,如果唔够won使可以嚟呢度换。
喺明洞Young Plaza地下果层都有个细细地嘅Line Store,大间D果间喺新沙洞。
头先四点几先食完中午,未有肚食正餐,所以先喺明洞扫下街先。
晚饭时间到啦,不过都已经系夜晚10点嘅事啦,呢餐食姜虎东烤肉。
原来门口有大胶袋可以俾你装住褛同衫之类,咁就唔怕食完成身油烟味啦。
姜虎东最好味系猪肉,牛肉就麻麻,今晚错手点多咗牛肉添。两个人食到饱,卖单55,600won。
下面张地图红圈标示嘅系今日去嘅两间食店,安东酱油粉丝鸡同姜虎东烤肉。
食完晚饭仲有一件事要做埋先返得酒店,就系去买张T-Money,张卡事但入去一间便利店都有得卖,价钱间间都一样,2,500won。不过张卡有唔同设计,揾咗几间都系得呢款design。
买咗T-Money之后仲未用得,因为里面冇余额,要喺地铁站嘅增值机增值之后先可以用嚟搭地铁,除左首尔地铁之外釜山地铁都用得架。点增值?其实冇乜特别,度度嘅储值卡增值方法都一样,识用八达通冇理由唔识用T-Money。
Day 1 完,返回2015年韩国首尔+釜山赏樱之旅目录。
相关文章:
- 住@首尔明洞Loisir Hotel Seoul Myeongdong
- 住@首尔明洞天空花园酒店
- 住@首尔明洞王子酒店
- 住@釜山Hotel Aventree Busan(亚云树酒店)
- 首尔明洞酒店推介
- 韩国外国人专用火车通行证KR Pass
- 韩国MobilePOP Pocket WiFi Router使用分享
- 如何网上预约首尔昌德宫秘苑导赏团门票
你好, 我想请问张机场巴士1,000won折扣券可以几多人用?
一张折扣券可以俾一个人用, 所以如果有2个人坐车, 就要有两张折扣券, 2个就三张, 如此类推.
我5月去了一次首尔和釜山 一直都好怀念 再睇埋你游记 好想计划下明年3月尾4月头去睇樱花
过多2星期我出发泰国和不丹呀 好期待呀
好耐冇见啦, 去不丹, 正啊. 我都想去. 等你去完睇下你D游记啦.