2013年日本關西、北陸賞櫻自駕遊 – Day 1：大阪城夜櫻

今次去大阪都係坐Air Macau，因為佢嘅時間真係好正，由澳門去大阪係上午11點起飛，而由大阪返澳門就係下午4點半起飛；而且唔需要經香港，慳時間之餘又唔會咁辛苦。不過自從Air Macau同ANA成為合作伙伴之後，多左好多日本人坐，想買到提前60日或30日嘅平機票已經越黎越難，而我地今次嘅機票就真係超貴。

2013.4.5 | 雨

今日澳門機場並唔係太多人，9點幾check-in完先去閣樓M記食早餐先。

Air Macau嘅航班雖然比人話成日delay，不過飛日本嘅航線就好少delay。

我地今次都係住心齋橋，所以到達關西機場之後，即刻上2樓對面嘅車站坐南海電鐵去難波總站。買飛果陣因為有架空港急行列車就開，所以冇買特急ラピート(Rapit列車)車飛，而係坐左呢架空港急行。

由關西機場去難波，坐特急ラピート嘅時間係39分鐘，而空港急行就要43分鐘，其實兩者時間相差不大，不過特急ラピート嘅車廂同座位比空港急行舒服好多，又係指定席，而且仲有放行李嘅地方，而空港急行只係普通列車，冇指定席，又冇專門地方放行李，所以要全程扶住個行李喼。其實特急ラピート嘅車費只係1200円，比空港急行嘅890円只係貴少少，不過就舒服得多，所以回程時都係坐返特急ラピート。

大約五點半左右終於到達今晚入住嘅大阪Cross Hotel，今次係第三次住呢間酒店，不過今晚只係住一晚，第二朝就會出發去京都啦。[想睇酒店介紹同住宿評價可以參考呢篇住@大阪Cross Hotel Osaka]

係酒店放低行李抖左一陣之後，係時間出去玩啦，今晚計劃去大阪城睇夜櫻。

出發前先醫下肚先，由於時間有限，今餐只係求其食左碗牛肉飯。

以前曾經去過大阪城一次，當時係坐地下鐵到谷丁四丁目駅，由西面入口進入大阪城公園，不過今次跟旅遊書指示，坐地下鐵到大阪城公園駅落車，由東面入口進入，點知咁就出事啦，俾佢老點左。

一出大阪城公園駅冇錯就係大阪城公園，不過大阪城公園面積唔細，而大阪城同大阪城西の丸庭園係位於公園西邊，距離大阪城公園駅比距離谷丁四丁目駅遠好多。我地嘅目的地係要到大阪城西の丸庭園睇夜櫻，但因為咁去到果陣已經過左最後入場時間。

下面係大阪城公園裡面嘅櫻花，不過已經過左滿開期，開始凋落啦。

行左一大段路終於到左大阪城，不過西の丸庭園就已經閂左門。

行完大阪城公園之後，返酒店休息啦。係心齋橋駅行返酒店途中，係大丸百貨附近見到呢間餅店好多人排隊，所以都湊熱鬧買返件撻返酒店食，不過味道非常麻麻，唔知一早售罄果隻芝士餅會唔會用食D。

臨訓前有D肚餓，所以行過去一蘭食碗拉麵做宵夜。

– Day 1 完 –

>> 返回《2013年日本關西、北陸賞櫻自駕遊》總目錄