東京一人自由行：東京出Trip一個人遊東京

文章發表日期：2024-06-23 | 文章分類：旅遊攻略

旅遊教室» 旅遊資訊» 旅遊攻略» 東京一人自由行：東京出Trip一個人遊東京

N年前去東京公幹出Trip，趁住每日開會前後嘅空檔時間，試吓係東京一人自由行嘅滋味。出Trip嘅時間係11月尾，已經過咗東京嘅紅葉季節，所以睇唔到好靚嘅紅葉，不過都仲有唔錯嘅黃葉美景。由於公幹時間只有4日，呢次一個人遊東京嘅時間唔多，只係去咗涉谷、新宿、銀座、上野、皇居等地打打卡，走馬看花。

用埋呢個95折Klook優惠碼，訂飛就更划算啦！

一個人遊東京Day 1：出發

今次經香港出發去東京，坐下午3點幾機，11點前到達碼頭，然後攪埋飛機check-in同行李寄倉，再係碼頭乾等個幾鐘，終於上得船，今次坐頭等位。

機場噴射飛航頭等位嘅早餐

由澳門坐船去香港機場只需要45分鐘，1點3就到左香港機場嘅海天碼頭，攞返HK$120機場稅退稅之後，就坐接駁車去候機大樓等上機。

下午3點35分飛機準時起飛，飛行時間大約3個半小時，去到日本成田空港大約係日本時間夜晚8點，不過成田空港真係好大，架飛機降落左之後行去停機位都足足行左10分鐘。

飛機上面

從飛機底部閉路電視影到地勤人員開始做嘢

8點15分落機之後，要再坐一段無人架駛小火車去入境大樓。去到見到好多人，而且外國人入境櫃位又少，D日本仔留返晒D櫃位俾自己人，我見D日本人一黎到好快就過左海關，而我地就排左成一個鐘先入到境。出到去取行李時，D行李已經放晒係地下等人認領，搭咁多次飛機今次係第一次行李等人。

一個人遊東京Day 2：夜遊涉谷

今日嘅schedule係9點半開始開會，中午有個半鐘lunch時間，下午又再開會，然後坐車去食dinner。由於逗留係東京嘅時間無多，所以想抓緊一D空檔時間去多幾個地方睇下，好為下次自己黎自由行探路。

所以今朝一早6點半（即係澳門時間5點半）就起身，然後由酒店附近個地鐵水天宮站坐左一個站去三越前站，睇下日本橋同東京車站附近景點。由於時間尚早，街上未有太多人，不過都已經有學生坐地鐵返學，而且有好多仲係5~6歲嘅小妹妹，單獨或者兩三個一齊坐地鐵返學，本來想影下佢地個得意樣架，不過怕俾人以為我想做咩，所以都係冇影佢地。

酒店門外

酒店出面條大街，好乾淨

地鐵購票機

買地鐵飛嘅方法同大阪一樣，係呢度講一講俾未買過嘅朋友知，已經係日本通嘅朋友可以跳過。

首先係購票機上面嘅路線圖睇下你想去嘅站顯示嘅價錢，然後入銀仔或者紙幣，當你要買嘅價錢著燈就可以按下佢出飛同找錢。

東京地鐵最低消費一程160円，就算一個站都要咁貴，而最貴係270円。通常市中心都係160円或者190円，由西面嘅上野或者淺草去到東面嘅新宿或者涉谷都係190円。

如果買單程飛又需要轉車的話，要留意係邊個站轉車，有D站轉車要行一段好長嘅路，有D就會短D。同埋係東京地鐵轉車一般需要先出左原來條路線嘅出口閘，再行去另一條線嘅入口閘入返車站上車。所以出閘果陣要睇清楚，一定要由寫有另一條線嘅閘口出閘，如果由普通閘口出，佢會以為你已經到站而唔係轉車，咁就會食左你張飛架啦，咁嘅話你就唯有再買多次飛。

除左JR之外，東京地鐵由兩間公司經營，分別係Tokyo Metro同都營，其實市區主要嘅景點坐Tokyo Metro都可以去到，最多係兜遠D路轉車，所以如果只係去市中心，最著數係買返張Tokyo Metro一日券或者兩日券，唔一定要坐都營或者JR。Tokyo Metro一日券710円，只要坐到4程以上已經抵返。

Tokyo Metro一日乘車券，係酒店買只需要600円，平左110円

地鐵入閘機

地鐵月台，好多都好窄，人又多，好難行

電車埋站

地鐵車廂內

由水天宮前坐去三越前只需3分鐘，一出地鐵站就係三越百貨公司，同埋日本橋。

三越百貨公司

三越百貨公司對面嘅日本橋

日本橋附近街道

高島屋百貨

東京車站，呢度係背面，由於時間關係冇行去正面嘅舊車站建築，不過第二日去左

東京車站係JR總站，呢個係新幹線閘口

日本銀行，行返去地鐵站時影，冇時間行埋去睇

酒店附近嘅水天宮神社，專保佑順產

Agoda優惠碼

咁樣兜左一圈只係用左一個鐘，返到酒店係8點鐘，跟住換埋衫去join埋同事食早餐，然後開始開會……食lunch……再開會。5點3左右終於開完第一日會議，然後坐大會安排嘅巴士去到另一間位於六本木嘅酒店入面間日本餐廳食晚宴。

出發之前睇天氣預報，話東京溫度係5度至15度之間，黎到呢幾日都維持係10至12度左右。不過之前聽人講東京室內都有暖氣，所以都唔敢帶太多衫，除左西裝西褲之外，casual衫只係帶左兩件長袖衫，同埋一件羽絨褸。點不知都仲係感覺帶錯衫，因為D長袖衫同件褸都仲係太厚。

係東京室內嘅暖氣真係太勁，連地鐵站都有，一入到去感覺好焗，再坐耐D就成身汗，有時感覺就算只係著一件短袖衫係室內都會覺得熱。但係一行出門口就會好凍，因為室內同室外溫差好大，一冷一熱，唔習慣好易早招，小弟就係咁去到last day就帶埋感冒返黎做手信。

我諗冬天去東京最好只帶一D簿身長袖衫，再加一件長褸，係室內除左件褸，出門口之前著左件褸再行出去，咁就冇咁易病，又唔怕室內熱。至於羽絨，我覺得11月尾同12月都仲未需要。仲有就係千其唔好著一D難除嘅衫，例如羊毛內衣同冷衫呢類，一定唔著得，唔係出到去又熱又除唔到盞死……

日本仔真係幾有時間觀念，plan左晚宴會係8點半結束果然就真係準時結束。8點9就坐返專車返酒店，因為呢個時間放晒工冇塞車，所以唔洗15分鐘就由六本木返到酒店。之前睇雜誌話六本木D聖誕燈飾好靚，但係車上沿途都唔覺有咩燈飾，之後去銀座、涉谷同新宿都唔多覺有咩聖誕燈飾。

返到酒店好快咁換埋衫，就即係出發去涉谷。今晚發現原來酒店地下就係地鐵站入口，好方便，等我今朝仲行左一段路去左另一個入口添。

由水天宮前去涉谷坐地鐵半藏門線唔洗轉車可以直到，車費190円，車程20分鐘，未到10點就到左涉谷。

涉谷果然係旺區，一出車站周圍都係人，同我地住嘅酒店附近水靜河飛真係兩個世界，不過呢度似乎唔係太多係遊客，好似都係日本人，周圍所見只係得我同個同事兩個人係度影相，感覺有D怪，不過都唔理，黎到影返多D相先。

涉谷地鐵站出口

地鐵站出口隔離就係涉谷JR站出口

呢度係涉谷車站前嘅廣場

呢度就係涉谷車站前嘅十字路口

呢度又係涉谷車站前嘅十字路口

呢度都係涉谷車站前嘅十字路口

係涉谷車站前影左一輪相之後就過馬路周圍行下，其實都係D橫街窄行，好多食店同埋……風俗案內所（唔知係咩，遲D問下人），周圍仲有好多人派傳單好似想叫你幫襯，好好其想入去睇下架，不過由於時間關係冇去到。

涉谷一帶

又係涉谷一帶

都係涉谷一帶

仲係涉谷一帶

樹上嘅燈泡就係呢度嘅聖誕燈飾

涉谷車站對面嘅藥店，係我所見呢區唯一一間，不過去到已經關門

優良風俗？

呢D書仔入面唔知有D咩？好想攞返本睇下

呢區仲有好多呢D咸書店，唔記得買返本送俾個friend添

行行下有D肚餓所以搵左間壽司店食下野，兩個人食左10幾件都係一千円多D。

企係度食嘅壽司店，未試過企係度食所以入去試下

壽司店內唔係好大

D餐牌都係日文，唔識睇，好彩壽司就係面前整，有樣睇，手指指攪掂

壽司放係竹葉上

一個人遊東京Day 3：皇居外苑、銀座、新宿

同尋日一樣，今日一大早就起身，6點50分左右又坐車鐵出去，今次主要係去東京車站同埋附近嘅皇居外苑。由於今日計劃會去幾個唔同地方，所以前一日係酒店買左一張特價東京地鐵一日券，600円可以一日內無限次乘搭東京地鐵八條線，最後計返全日坐左六程車，如果散買加埋要1,020円，節省左420円。

地鐵站內嘅自動擦鞋機，只需100円，可惜冇著皮鞋出黎

由酒店下面嘅水天宮前坐半藏門線，坐兩個站去大手町站，約需4分鐘，一出地鐵站對面就係東京車站正面，尋日去日本橋果邊係東京車站背面。

東京車站係20世紀初建築，可惜正在進行維修，俾木板圍住晒

東京車站出面街道

東京車站出面街道，呢頭係商業區，不過因為仲早，唔係太多人

東京車站內

東京車站門外嘅警崗，個警察係真人黎架

係東京車站影完相之後，照地圖向西方向行去天皇住嘅皇宮，日本人叫皇居。皇居係正東京嘅正中央，睇地圖地方真係好大架，皇居好似冇得入去，我地都只係係皇居外苑同埋護城河外圍影下相咁。

途經進入皇居外苑嘅和田倉門遺址

和田倉噴水公園，D樹好靚

皇居外苑，一邊係空曠寧靜嘅皇居，另一邊就係高樓林立嘅商業中心，好大對比

皇居外苑

穿過皇居外苑嘅大街-內堀通，前面遠處係東京鐵塔

護城河內嘅皇居

皇居

皇居重地，有警察把守

皇居入口-二重橋

二重橋近鏡

櫻田門

Trip.com最新優惠

係皇居外苑行左45分鐘左右，大約8點2就係櫻田門附近坐地鐵返酒店，8點半返到酒店，上房換埋衫再食埋個早餐，啱啱好9點半準時開會。今日只有半日開會時間，11點9開完會，12點就坐專車去附近嘅東京交易所食farewell lunch，食完lunch再去交易所交易大廳參觀一陣，再影埋張大合照，全部官式活動就完結啦，下午可以有半日時間自由活動，好嘢……

東京交易所交易大廳，平時電視見到講東京股市都會播呢個地方，不過因為而家已經係用電子交易，個交易大廳已經唔會有人係度做交易，只係用黎俾人參觀

下午2點返到酒店，換完衫之後就先坐地鐵去銀座，由水天宮前去銀座要去三越前轉銀座線，不過中間要行成400米路，好長，車程加行路時間total用左15分鐘。

銀座中央通

Fancl Square，係地鐵銀座線銀座站嘅銀座四丁目交差點出口一出黎就係（向南行少少）

Fancl門口，地下賣護膚品，不過唔係好大，先入去幫人掃貨，只係照單拾藥，好快就攪掂走人

掃完Fancl再向南行，仍然係銀座中央通

第二站係Burberry日本旗艦店，係銀座八丁目，由Fancl行三個街口對面馬路就係

Burberry Blue Label，係地下負一層，好多講廣東話嘅人係入面買嘢，呢度原來唔俾影相，影影下俾佢sales發現，好彩冇叫我delete

呢度雖然係旗艦店，不過手袋款式都唔係好多，受人所託我地兩個人total買左三個袋，扣埋稅九萬幾円。記得帶護照去，俾錢果陣俾本護照佢，就會同你扣埋稅收net數，唔洗去其他地方退稅架。

買完Burberry再行下隔離間toy park，因為有幾袋嘢在手，所以決定行返去銀座四丁目交差點個地鐵站坐地鐵返酒店放低D嘢先。

銀座中央通，時間係下午4點11分，呢個時節東京好早天黑，四點幾就已經開始黑啦

另一個方向嘅銀座中央通

銀座四丁目交差點地鐵站

銀座四丁目交差點

由於唔想再係三越前轉車，因為要行400米路先轉到車，所以決定行過去少少嘅丸之內線銀座站坐丸之內線去大手町站轉半藏門線返酒店。

去到地鐵站入口附近，見到有間好大嘅藥房，因為受同事所託要同佢地買D藥同化妝品，但之前都見唔到有大嘅藥房，所以今日見到就拿拿聲入去買左先囉，驚之後買唔到交唔到差嗎。點不知夜晚去新宿果陣先發現新宿超多藥房，梗有5,6,7,8間係你左右，成個新宿可能有成二十間，入去夾下價先發現原來同一間藥房，新宿D貨平好多架，化妝品仲平成30%，因為新宿有得7折，銀座就冇，今次真係慘.…..，自己買貴左都話姐，同人買貴左真係個心好唔舒服。

所以各位千其唔好學我地咁蠢，東京買藥最好去新宿買，因為藥房數量好多，價錢一定平，其他地方就算有，都唔係好多。（因為時間關係其實都唔係去過好多地方，不過所到幾個地方都唔係太多藥房，包括日本橋、銀座、六本木、涉谷同埋上野，都係一間起兩間止，上野多少少都係見過三間左右）

五點半返到酒店，因為行到出晒汗又有D累，所以先沖個涼抖抖先，七點左右先去食dinner。今次大會每人派左一張dinner餐券，可以去酒店入面任何一間餐廳食一餐set dinner，黎到日本當然係選擇去食日本餐啦，聽講呢餐要成萬幾円。

好好味魚生

睇返都想再食，仲有好多道菜架，呢度只post兩張出黎

食完dinner之後，八點左右就出發坐地鐵去新宿（坐半藏門線去大手町站轉丸之內線到新宿三丁目站落車，全程連等車約30分鐘），一出黎，嘩，好多人同埋……藥房。

新宿街頭

新宿橫街

歌舞伎町門牌，其實每條橫街出口都有呢個牌

歌舞伎町內

風俗情報館？

新宿比起涉谷仲多人，而且有好多旅行團遊客黎，特別係歌舞伎町一帶。呢頭好似主要得三大類店舖：食店、藥房同埋風俗XXX。

難得見到間生果店，最後買左一盒三個嘅富有柿，500円

新宿車站附近

新宿車站外

今晚冇咩心機同精力行，一來係之前買貴左嘢唔開心，二來可能係感冒開始黎緊唔係太舒服，所以10點幾就坐地鐵返酒店休息啦。

一個人遊東京Day 4：上野恩賜公園

今日會坐下午3點半機去香港，然後再坐船回澳，所以上午都仲有時間去多一個地方行下，最後決定去上野，因為聽講果度買嘢食嘅手信又平又多款，為左有手信俾人，所以決定去呢樹囉。

話說尋晚開始唔係咁舒服，因為作感冒，成晚喉嚨鬼死咁痛，訓得唔好，而且仲校錯鬧鐘攪到唔知醒添，等到起身時已經係八點鐘。於是又拿拿林洗面換衫，落去快快趣趣食埋早餐出去。其實間酒店嘅早餐自助餐都唔係咁好食，淨係覺得佢D蜜瓜最正，所以今朝主要都係食蜜瓜做早餐。

食完早餐差唔多八點九，用左15分鐘由酒店坐地鐵去上野站（要係三越前轉銀座線，又用左7分鐘行左400米）。九點鐘到達上野站，因為時間尚早，所以先去上野恩賜公園行下。

JR上野站出口，右手邊係地鐵出口

地鐵出口外嘅馬路

地鐵出口對面就係京成電車上野站，可以係呢度坐火車去機場，右邊樓梯上去就係上野恩賜公園

上野恩賜公園正門，棵樹都已經冇晒葉啦

上野恩賜公園內嘅西鄉隆盛銅像（唔識佢）

上野恩賜公園內嘅清水觀音堂

上野恩賜公園內

11月尾東京嘅紅葉大部分都落晒葉，呢度係今次見到最多紅葉嘅地方

上野恩賜公園內嘅不忍池上嘅小島

不忍池原來係種滿晒荷花，不過呢個季節全部謝晒

延仲閱讀：

東京賞櫻自由行：東京櫻花景點推薦、滿開時間、行程規劃和遊記分享

因為時間有限，所以只係係上野恩賜公園前半part遊覽，後面D展覽館同動物園冇時間去。九點九左右就行返去Ame橫丁準備買手信，點不知去到發現大部分店鋪都仲未開門，原來多數都係10點或者10點半先開門架。

Ame橫丁與上野恩賜公園之間嘅上野中央通

Ame橫丁入口，上野JR站對面

Ame橫丁內，好多都未開門

Ame橫丁就係JR架空鐵路下面嘅兩邊橫街

又係Ame橫丁，好多賣魚生檔

Ame橫丁

二木之菓子，好多書介紹呢度買手信平，不過10點先開門

終於等到佢開門啦

樂天旅行最新優惠

用左半個鐘係二木之菓子買手信，買左成袋大包細包，都只係九千幾円，不過D嘢食真係好重，返到酒店用左九牛二虎之力先至將佢地質晒入喼。

返到酒店拾埋行李11點半check-out完，跟住行過酒店隔離嘅Airport Limousine Bus坐機場巴士去機場，巴士班次都好密架，10~15分鐘有一班車，去到先買飛，好似買地鐵飛咁，入錢入去自動售票機，然後按下個掣就有車飛出，仲有埋張收據，方便claim數。

上面果張係行李單，落車攞行李果陣俾佢，咁就唔怕俾人攞錯行李啦。下面果張係車飛收據，單程2,900円

Airport Limousine機場巴士

高速公路沿途風景

高速公路沿途田園

巴士行左45分鐘就到左成田空港Terminal 2，一落車就係離境大樓，架巴士仲會繼續開去Terminal 1，記得睇清楚自己坐果架飛機係邊個Terminal登機先好落車啊。

機場巴士站

可能早左黎，國泰check-in櫃位冇咩人攪緊check-in，唔洗排隊好快就攪掂登機check-in啦，之後就即刻過海關入去候機大樓，因為仲有個重要mission未完成。

進入海關嘅離境閘口

離境比起入境快好多，一陣間就攪掂入到去候機大樓，可以進行最後一個任務，就係買免稅化妝品。原來成田空港個候機大樓都唔係好大，好快搵到要買嘅目標。

海關櫃位對面嘅化妝品免稅店

係呢間免費店入邊豪花左東京之旅最後一筆接近十萬円嘅巨款，不過都只係換來幾樽仔嘢

完成左最後一項任務之後仲剩返差唔多兩個鐘時間，咁唯有周圍行下睇下野。

日本真係樣樣都有自動售賣機，連旅遊保險都可以係機場上機之前用自助投保機購買

京都面油紙，上面綠色果種淨係機場先有得賣，睇睇下又買左D做手信

好得意嘅菓子啊

呢盒嘢一千円，見有兩個台灣女仔攞住本書黎買，所以我又跟佢地買左一盒，不過俾左人做手信，唔知好唔好食呢

行到咁上下開始肚餓，所以坐低食D嘢，不過呢個時候身上只剩返1,400円，只夠食呢餐

食完嘢時間差唔多，可以去等上機，不過要坐一程無人架駛小火車過去登機嘅地方。

等緊無人架駛小火車

無人架駛小火車

對頭車

無人架駛小火車車廂內

可以開始上機啦

今次回程呢隻機又同黎果陣唔同，最大分別係個電視有好多自選電影可以睇，唔洗照佢嘅播放時間，仲有就係有得打機添

控制器背面係遊戲機手掣

下午三點七左右飛機準時起飛（好似係，因為太累，起飛前小弟已經訓著左），不過唔知點解，去果程飛左3.5小時，但回程就要5小時，足足多左1.5小時，唔係時差啊，係真係5小時，3點35分(日本時間)起飛，7點35分(香港時間)到達，即係日本時間8點35分，8減3等於5，真係足足5個鐘架。

到左香港機場，我地冇入香港境，而係直接買10點由機場碼頭去澳門嘅噴射飛航船飛，票價HK$180，雖然要等兩個鐘，不過唔洗轉的士，又唔洗攞行李，舒服好多架，D行李會直接由機場送去架船度架。如果要轉船，記得千其唔好過海關啊，賣船飛嘅counter就係海關入境counter附近，對住扶手電梯，落機之後坐完無人架駛小火車，一上黎就見架啦。

因為要等船，所以係香港機場又食左餐dinner。10點開船，10點9到澳門，等埋行李出黎，返到屋企11點半，成個公幹旅程終於告一段落啦。