2015年韓國首爾+釜山賞櫻之旅(Day 5) – 釜山南川洞櫻花路、札嘎其市場
短短三日嘅釜山行程今日就要結果啦，今日返首爾嘅KTX買咗下午四點半車飛，所以仲有六、七個鐘可以用，而今日嘅行程主要會去釜山另一個賞櫻熱點南川洞櫻花路。
嚟釜山三日落咗兩日雨，今日要走，釜山終於好天啦。望出窗外天氣好好，仲可以見到遠處山上嘅櫻花添。
喺酒店先Check-out再寄存好行李，出到街果然冇落雨，路面亦都好乾爽。
出發囉，不過唔係直接去南川洞，而係先去中途站地鐵大淵站附近嘅雙胞貽豬肉湯飯食早餐。喺大淵站3號出口行出路面之後，行返轉頭係大馬路轉左，直行三個街口大約150米就到。
下面係雙胞貽豬肉湯飯嘅位置地圖
餐牌有英文，不過睇咗都唔知有D乜，我哋點左最貴嘅Boiled pork with rice，一人7,500won，要咗兩人份量，盛惠15,000won，現場所見似乎大家都係點呢款。
呢個set，豬肉、湯、飯三樣嘢係分開嘅，要食豬肉湯飯就自己撈埋佢，又可以分開淨食豬肉，當係餸咁食飯再飲湯，又可以用生菜包住豬肉食。
雙胞貽豬肉湯飯就喺南川洞附近，坐地鐵只係兩三個站。南川洞櫻花路喺南川站同金蓮山站呢兩個地鐵站中間，喺事旦一個站落車行過去都得，我哋選擇喺金蓮山站落車行過去。由金蓮山站過去南川洞櫻花路嘅優點最少有兩個，第一個係由金蓮山站去南川洞櫻花路嘅路比較好行，亦容易認路，唔怕行錯路。第二個優點係由金蓮山站去南川洞櫻花路會經過廣安里海水浴場，可以順便睇一睇呢個都算係旅遊景點嘅沙灘，亦可以見到沙灘對開嘅廣安大橋。
從金蓮山站3號出口出去地面，呢個出口有升降機。
出到地面會見到呢條向海邊傾斜嘅石仔路，沿住呢條路一直行就係廣安里海水浴場。
呢個沙灘就係廣安里海水浴場，範圍都好大，對出海面上嘅條橋就係廣安大橋。
面向海右手邊近海果幾座民居大廈就係南川洞櫻花路所在嘅地方啦
沿住沙灘行到路口再轉左
呢條就係南川洞櫻花路啦，又係一條迷人嘅櫻花隧道。呢條馬路雖然唔係交通要道，但不時都有車輛行駛，影相嘅時候要留心，確保自己安全之餘都要唔好阻住人哋啊。
南川洞櫻花路附近有南川站同金蓮山站兩個地鐵站，所以可以行去其中一個站坐地鐵。如果要去返金蓮山站，可以有兩條路行，一條係沿嚟嘅路行返去金蓮山站，另一條係喺櫻花路中段向西行，再沿斜路轉右行出大路。
如果要去南川站，亦有兩條路可以行，第一條係沿住櫻花路向南走到盡頭，再沿住海邊條大路行到Mega超市，然後過馬路喺Mega超市旁邊條小路一直行出去就會去到南川站嘅3號出口。呢條路嘅優點係可以行晒成條櫻花路，而且係平路唔使上斜，但需要嘅時間就耐少少，如果唔趕時間可以行呢條。另一條路係喺櫻花路中段向西行，再沿斜路轉左行出大路，呢條係我哋選擇嘅路線。
下面張地圖係南川洞櫻花路嘅位置同埋我哋嘅步行路線
由櫻花路向西行到呢度，轉右上斜條路可以行返去金蓮山站。
轉左呢斜條路就可以行去南川站，亦即係我哋行嘅路線。
返到南浦洞仲有時間，可以去埋札嘎其市場兼食埋午餐。札嘎其市場就係BIFF廣場對面，行過馬路對就係。
遊客到札嘎其市場主要都係去呢座市場大樓二樓嘅食店食海鮮
兩個人食唔到太多，只係點咗三樣嘢，不過除咗隻蟹算係OK之外，其餘兩味嘅整法好唔掂，尤其係鰻魚，呢個韓式整法完全入唔到口，最後成碟原封不動放喺度。三樣嘢食咗130,000won，感覺唔係太值。
市場後面可以睇到釜山港，影返張相留下念。
要離開釜山啦，三日嘅行程實在太短，仲有好多地方都未去，下次再嚟。
要坐三個鐘火車，買定D小食車上食。
今日喺釜山天氣已經由雨轉晴，點知舊雨雲跟咗我哋返首爾，到首爾嘅時候傾盤大雨，幾乎出唔到去食dinner。
最後又係喺明洞食返第一晚食嘅安東醬油粉絲雞，不過係喺另一間分店。
飯後甜品係買返牛奶條雪返酒店食
Day 5 完，返回2015年韓國首爾+釜山賞櫻之旅目錄。
相關文章：
- 住@首爾明洞Loisir Hotel Seoul Myeongdong
- 住@首爾明洞天空花園酒店
- 住@首爾明洞王子酒店
- 住@釜山Hotel Aventree Busan(亞雲樹酒店)
- 首爾明洞酒店推介
- 韓國外國人專用火車通行證KR Pass
- 韓國MobilePOP Pocket WiFi Router使用分享
- 如何網上預約首爾昌德宮秘苑導賞團門票
如果喜歡這篇文章，請點個「讚」吧！