2014年聖誕節北海道賞雪之旅(Day 5) – 踏雪遊小樽

今次旅行係hea遊，所以行程好輕鬆，而今日全日只得一個節目，就係留喺小樽慢遊，其實主要就係行小樽堺町通，遊完小樽傍晚時份先坐火車返札幌。

朝早天氣都OK，望出去小樽運河暫時都冇落雪。

食早餐前先浸多次溫泉

今日早餐係自助式

搵咗個對住小樽運河嘅位食早餐

雖然堺町通就喺我哋入住嘅旅館附近，不過為免行到一半要返旅館check-out咁麻煩，所以都係先check-out，再寄行李寄存喺旅館之後先出去慢慢行。

朝早雖然都落雪，不過個天都OK清，天氣算唔錯。

雪地上慢慢移動，先過前面小樽運河影下相。

氣溫只係-0.9度，並唔算低，不過感覺真係好凍。

喺咁凍的天氣之下影相係一大問題，因為帶住手套影相好麻煩，每次影相都要除手套先可以影，所以之前喺二去古影得好少相。雖然市面上有一啲手套嘅設計可以操控手機屏幕，不過實際使用上並唔係咁好用，而且呢類手套防寒能力一般比較低，除非買貴嘢。

今日喺小樽影相果陣發現咗一個方法，就係利用自拍神棍嘅遙控器，使用時最好唔用自拍神棍，只係將手機同遙控器用藍芽連線，然後用帶住手套嘅一隻手攞手機，另一隻唔帶手套嘅手攞遙控器插入衫袋裡面，咁就可以唔怕凍親又可以影到相。不過有樣好重要嘅嘢要留意，就係手機唔可以長時間留係室外低溫之下，如果唔係好快就會凍壞，甚至死機，所以只喺影相果度先攞部手機出嚟，影完即刻收返埋入衫袋保溫。如果你部相機都有遙控功能，都可以用呢個方法。

左邊呢款手套嘅母指、食指同中指都可以touch手機屏幕；右邊呢個就係自拍神棍嘅遙控器，相信好多人都有。

小樽運河

好多人落去行，我哋都落去行一段。

小樽嘅馬路就算係主幹道都照樣被雪覆蓋，可能清唔切。

行完小樽運河，轉過去手宮線舊火車路軌睇下。

跟住行去堺町通，沿路會經過小樽郵便局。

入去寄返張賀年卡俾自己，呢度對老人家嘅服務都幾周到，枱上面放咗老花眼鏡可以攞嚟用，啱晒。

從小樽郵便局開始向西南方向就係堺町通

呢日遊客唔係咁多，有啲冷清。

有啲屋簷已經結咗冰

中途休息陣，入去食啲嘢先。

除咗食碗紅豆湯暖下肚之外，呢個出名嘅彩虹雪糕就算出面凍冰冰都要試下。

繼續行

メルヘン交差点，呢度係堺町通盡頭。

先入去呢間龍貓館睇睇

再入去小樽オルゴール堂本館買返個音樂盒

買手信時間

回程時候，風雪又來啦。

趁住有風雪，先食個早晚飯，今次都係去小樽運河同出拔小路對面間政壽司食。

食完飯個天已經開始黑，其實都只係四點幾。

食完飯返去旅館攞返行李係時候去坐火車返札幌啦，雖然距離小樽駅唔遠，但都係叫旅館幫我哋Call咗架的士坐車過去。

小樽駅

小樽駅前面呢間Dormy Inn Premium Otaru係09年果次入住嘅酒店，呢間酒店都好正，如果我哋今次住嘅運河の宿 小樽 ふる川係First Choice，Dormy Inn Premium Otaru就一定係Second Choice。

買即走嘅火車飛

月台上超凍，火車頭都結晒冰。

返到札幌先過去酒店check-in，喺札幌最後兩晚住嘅係呢間札幌世紀皇家酒店(Century Royal Hotel Sapporo)，之前去二世古果日已經將兩個大喼寄存咗係度，所以check-in前先攞返行李。

呢間酒店位置超正，尤其係冬天唔想行出街就最啱住呢度，有關酒店嘅詳細介紹可以參考返呢篇《住@札幌世紀皇家酒店》。

出去札幌駅行下順便搵地方食晚飯

札幌駅南口廣場

最後係札幌駅嘅Stellar Place樓上搵到呢間十勝豚丼いっぴん，超正，之後喺其他店都食唔返呢種味。

食完晚飯要再搵啲嘢做宵夜，目標係JR札幌駅西口旁邊呢間手信店。

真正目標係呢個花畑牧場嘅牛奶軟糖(花畑牧場 生キャラメル)，呢隻糖喺09年第一次到北海道果次有間食店送俾我哋做飯後甜品，入口即溶，超好味，可惜之後搵咗好多地方都搵唔到，今次終於係呢度撞返佢。

呢隻花畑牧場軟糖一定要放喺雪櫃保存，常溫下好快就會溶，所以好難買返去做手信，只有在當地食多啲。

今晚嘅宵夜都好豐富，仲有呢啲喺小樽買嘅食物。

Day 5完，返回《2014年聖誕節北海道賞雪之旅》總目錄

相關文章：

• 住@札幌三井花園酒店
• 住@二世古ニセコ昆布温泉鶴雅別荘　杢の抄
• 住@運河の宿 小樽 ふる川
• 住@札幌世紀皇家酒店
• 札幌酒店推介
• 小樽酒店推介
• 2009年初秋北海道自駕之旅