2012年京阪之旅(Day 2[晚饭篇] – 丸龟制面)

离开清水寺之后，我地行落去东大路通坐巴士返河原町，然后揾地方食晚饭。今朝早揾地方食早餐嘅时候，系河原町通Loft隔离见到有间叫丸龟制面嘅赞岐乌冬店，当时好想试下，但系佢开11点，当时试唔到，所以决定今晚揾佢做晚餐。

由于小弟见识小，当时唔知原来呢间丸龟制面系好出名嘅平民食店，今日写呢篇嘅时候search佢网址，先知原来好多Blog有介绍佢，真系失觉晒。

入到丸龟制面就好似去左个食堂咁，你需要自己系counter攞个托盘，然后点一碗乌冬。攞左碗乌冬之后，再根据自己喜好自取各式天妇罗，有炸虾、炸番薯、炸南瓜，样样都好好味架。

乌冬推荐首选咖哩乌冬，另一款牛肉乌冬都好好味，天妇罗就一定要食佢嘅炸番薯同炸南瓜，好甜好好味。

呢餐虽然食得好平，两个人只系食左1,120円，但就系成个行程之中食得最满足嘅一餐。

丸龟制面系日本各地有好多分店，之后我地再系大阪心斋桥见到一间，又再食多一次。不过呢间分店系南船场果边，离道顿堀较远。

以下系丸龟制面京都河原町店嘅位置地图(click入去可以连去店铺网页)：

呢张系河原町店嘅舖面照片，系第二朝影架。

以下系丸龟制面大阪心斋桥店嘅位置地图(click入去可以连去店铺网页)：

注意：系大阪心斋桥亦有另一间叫はなまる讃岐うどん嘅赞岐乌冬店，不过呢间超难食，千其唔好入去食啊。我地食过丸龟制面见咁好味，所以又试埋呢间，点知就出事。

Day 2 End…