2013年日本关西、北陆赏樱自驾游 – Day 4：彦根城、高山市

因为关西嘅樱花提早左开花，所以我地将原来计划留系关西嘅其中三日时间改为去北陆，今日就离开京都向岐阜县嘅高山市进发。京都同高山相距270公里，行高速公路都要三个半钟头先到。

2013.4.8 | 晴

今日我地要离开京都啦，天气报告预测京都、大阪由今日起天天天晴，系唔系玩我呀。

今日唔食日式早餐，改食西式自助餐。

出发前准备好寻日买返黎嘅生果上路食

京都今日真系天朗气清

上高速公路

行左冇几耐先驶入去一个叫大津SA嘅休息站，因为呢度可以望到琵琶湖，所以入去停低睇下风景先。

从京都前往高山嘅途中会经过一个叫彦根市嘅地方，呢度有座彦根城，座落系琵琶湖旁边，系日本其中一座国宝级城堡，而且亦系樱花名所之一。寻晚上网睇过，彦根城嘅樱花正处于满开，所以临时决定先到彦根城睇睇。彦根城位于京都至名古屋之间嘅名神高速公路旁边，所以去呢度唔需要兜路，从彦根IC出去，行冇几耐就见到彦根城。

围绕住彦根城外护城河种满樱花树

跟住指示牌驶到彦根城临时停车场泊好架车先

彦根城系琵琶八景之一，不过今次黎嘅目的主要为赏樱，所以城堡就唔上去啦。

由于仲系满开，呢度嘅樱花比寻日京都嘅靓好多。

樱花开花期间彦根城下仲有个市集，有野食又有当地特产卖。

我地嘅午餐就系呢度搅掂

食完野重新上路向高山市进发啦。由彦根到高山大约200公里，过左名古屋进入岐阜县境内之后，都系山地地形，呢段东海北陆自动车道上有好多隧道，多到数都数唔清，而且仲好长，最长一条超过10公里。

路边仲有一D积雪未溶

大约下午四点终于抵达高山市，今晚入住高山阵屋附近嘅温泉旅馆飞騨高山本阵平野屋别馆。[想睇酒店介绍同住宿评价可以参考呢篇住@飞騨高山本阵平野屋别馆]

平野屋对面就系高山市主要景点上三之町，趁未天黑先过去行行。不过呢日高山游客唔多，周围都比较冷清。

上三之町周围唔系好大，行左一个圈都只系用左个半钟。因为check-in时约好左七点食晚餐，而我比较钟意食饭前先浸一次温泉，所以返旅馆先浸个温泉先。

晚餐系房内食，想睇多D晚餐食D乜可以参考呢篇住@飞騨高山本阵平野屋别馆。

– Day 4 完 –

>> 返回《2013年日本关西、北陆赏樱自驾游》总目录