2013年日本關西、北陸賞櫻自駕遊 – Day 4：彥根城、高山市

因為關西嘅櫻花提早左開花，所以我地將原來計劃留係關西嘅其中三日時間改為去北陸，今日就離開京都向岐阜縣嘅高山市進發。京都同高山相距270公里，行高速公路都要三個半鐘頭先到。

 

2013.4.8 | 晴

 

今日我地要離開京都啦，天氣報告預測京都、大阪由今日起天天天晴，係唔係玩我呀。

 

今日唔食日式早餐，改食西式自助餐。

 

出發前準備好尋日買返黎嘅生果上路食

 

京都今日真係天朗氣清

 

上高速公路

 

行左冇幾耐先駛入去一個叫大津SA嘅休息站，因為呢度可以望到琵琶湖，所以入去停低睇下風景先。

 

從京都前往高山嘅途中會經過一個叫彥根市嘅地方，呢度有座彥根城，座落係琵琶湖旁邊，係日本其中一座國寶級城堡，而且亦係櫻花名所之一。尋晚上網睇過，彥根城嘅櫻花正處於滿開，所以臨時決定先到彥根城睇睇。彥根城位於京都至名古屋之間嘅名神高速公路旁邊，所以去呢度唔需要兜路，從彥根IC出去，行冇幾耐就見到彥根城。

 

圍繞住彥根城外護城河種滿櫻花樹

 

跟住指示牌駛到彥根城臨時停車場泊好架車先

 

彥根城係琵琶八景之一，不過今次黎嘅目的主要為賞櫻，所以城堡就唔上去啦。

 

由於仲係滿開，呢度嘅櫻花比尋日京都嘅靚好多。

 

櫻花開花期間彥根城下仲有個市集，有野食又有當地特產賣。

 

我地嘅午餐就係呢度攪掂

 

食完野重新上路向高山市進發啦。由彥根到高山大約200公里，過左名古屋進入岐阜縣境內之後，都係山地地形，呢段東海北陸自動車道上有好多隧道，多到數都數唔清，而且仲好長，最長一條超過10公里。

 

路邊仲有一D積雪未溶

 

大約下午四點終於抵達高山市，今晚入住高山陣屋附近嘅溫泉旅館飛騨高山本陣平野屋別館。[想睇酒店介紹同住宿評價可以參考呢篇住@飛騨高山本陣平野屋別館]

 

平野屋對面就係高山市主要景點上三之町，趁未天黑先過去行行。不過呢日高山遊客唔多，周圍都比較冷清。

 

上三之町周圍唔係好大，行左一個圈都只係用左個半鐘。因為check-in時約好左七點食晚餐，而我比較鍾意食飯前先浸一次溫泉，所以返旅館先浸個溫泉先。

 

晚餐係房內食，想睇多D晚餐食D乜可以參考呢篇住@飛騨高山本陣平野屋別館。

 

– Day 4 完 –

 

>> 返回《2013年日本關西、北陸賞櫻自駕遊》總目錄