2013年日本关西、北陆赏樱自驾游 – Day 5 (Part 1):宫川朝市、白川乡
系高山市留宿一晚之后,今日再向北行,游览白川乡同金沢市,不过因为时间有限,系金沢只会去近江町市场同兼六园游览,而且亦唔会系金沢留宿。
2013.4.9 | 晴,一时雨
高山本阵平野屋嘅房间面对贯穿高山市区嘅宫川,朝早起身第一时行出露台睇下朝阳升起嘅美景同感受下清新嘅空气先。
之后再浸多次温泉,跟住就去食早餐啦。
食完早餐,步行5分钟去到宫川朝市参观,不过因为呢日唔系星期六日,营业嘅档摊唔系太多,行嘅人亦好少。
临走时有一班外国游客到达。系日本除左京都会经常见到西方游客之外,另一个最多西方游客嘅城市可能就系高山。
参观完宫川朝市,再行返去旅馆附近嘅中桥影下相先,呢度系高山市其中一个樱花景点,不过由于高山天气较冷,仲未开花。
中桥前面就系高山阵屋,不过里面冇乜特别,要买飞先入得,所以冇入去。
高山阵屋前面系高山市另一个朝市,叫阵屋朝市,规模其实好小,只系卖D生果同农产品之类。
行完高山市两大朝市,都系时候要返旅馆check-out出发啦,今日会去白川乡同金沢。其实高山、白川乡同金沢呢三个地方系2010年曾经到过一次,今次故地重游主要系带屋企人去行一行,而且由于时间唔多,所以只系重点游览几处景点。
从高山市去白川乡行高山清见道路同东海北陆自动车道唔洗一个钟就到,超方便。
白川乡嘅中心就系呢条白川街道,景点都系街道两边,两至三个钟就可以参观完毕架啦。
2010年黎嘅时候白川街道两旁都仲有几个停车场可以泊车,不过由2012年3月31日开始因为保护环境嘅关系,街道两旁嘅停车场都关闭左,个牌指示可以泊去河对岸嘅村营停车场。
不过系白川街道两旁仲有一两处私人空地开放俾人泊车,泊一次收费800円,我地就系将架车泊呢度。
进入春天容雪时间,白川乡旁边嘅庄川河水量比较大,河水都好清,相信D水应该都好冰冷。
河上嘅吊桥相逢桥,对岸主要有个村营停车场,旅行团嘅旅游车就系泊呢度,由高山或者金沢驶黎嘅巴士亦系停呢度。另外,对岸亦有个景点-合掌造民家园,以及一间食店。
白川乡景色
如果要俯瞰整个白川乡景色同影返张全景,就要上去半山上嘅荻町城遗址上嘅白川乡展望台。上去展望台可以从和田家向北沿斜路步行上去,大约要行半个钟,上次就系咁样行上去,超辛苦。
如果自己开车,可以直接开车上去,今次去我地就系直接开车上去。展望台嘅Map Code系549 049 190,如果架车嘅GPS唔support输入Map Code,就要自己系地图上微调目的地位置。
在较大的地图上查看白川乡展望台位置
由于开车上去果阵冇时间影相,以下借用Google Map几张街景图片黎说明上去展望台嘅行车道路。
从白川街道向北行冇几耐,会见到右边呢条山路(360国道),由呢度驶上去大约8-10分钟就会去到展望台。
呢条路虽然系国道,但其实同一条乡村道路冇乜分别,呢一段已经算系比较宽阔嘅路段,足够两边对头车行驶,但再向山上行D路就会变得越来越窄,所以如果冬天落雪嘅时候黎就唔好开车上去啦。
见到天守阁个牌就转右行
呢段路面好窄,只足够一架车通过,如果有对头车,就要互相让路先过到。
终于到达展望台,呢度有个停车场可以免费泊车。
– Day 5 未完,待续 –
>> 返回《2013年日本关西、北陆赏樱自驾游》总目录
人气文章:
Klook / Kkday最新优惠码
Agoda最新10%折扣代码
Hotels.com最新折扣代码
Trip.com最新优惠码
永安旅游最新推广码
乐天旅行最新住宿折扣券
乐天旅行最新租车折扣券
日本乐天市场最新优惠券
Klook.com
如果喜欢这篇文章,请点个“赞”吧!