2007年東京公幹之旅(Day 2)- Part 1
今日嘅schedule係9點半開始開會,中午有個半鐘lunch時間,下午又再開會,然後坐車去食dinner。由於逗留係東京嘅時間無多,所以想抓緊一D空檔時間去多幾個地方睇下,好為下次自己黎自由行探路。
所以今朝一早6點半(即係澳門時間5點半)就起身,然後由酒店附近個地鐵水天宮站坐左一個站去三越前站,睇下日本橋同東京車站附近景點。由於時間尚早,街上未有太多人,不過都已經有學生坐地鐵返學,而且有好多仲係5~6歲嘅小妹妹,單獨或者兩三個一齊坐地鐵返學,本來想影下佢地個得意樣架,不過怕俾人以為我想做咩,所以都係冇影佢地。
酒店出面條大街,好乾淨
地鐵購票機
買地鐵飛嘅方法同大阪一樣,係呢度講一講俾未買過嘅朋友知,已經係日本通嘅朋友可以跳過。
首先係購票機上面嘅路線圖睇下你想去嘅站顯示嘅價錢,然後入銀仔或者紙幣,當你要買嘅價錢著燈就可以按下佢出飛同找錢。
東京地鐵最低消費一程160円,就算一個站都要咁貴,而最貴係270円。通常市中心都係160円或者190円,由西面嘅上野或者淺草去到東面嘅新宿或者涉谷都係190円。
如果買單程飛又需要轉車的話,要留意係邊個站轉車,有D站轉車要行一段好長嘅路,有D就會短D。同埋係東京地鐵轉車一般需要先出左原來條路線嘅出口閘,再行去另一條線嘅入口閘入返車站上車。所以出閘果陣要睇清楚,一定要由寫有另一條線嘅閘口出閘,如果由普通閘口出,佢會以為你已經到站而唔係轉車,咁就會食左你張飛架啦,咁嘅話你就唯有再買多次飛。
除左JR之外,東京地鐵由兩間公司經營,分別係Tokyo Metro同都營,其實市區主要嘅景點坐Tokyo Metro都可以去到,最多係兜遠D路轉車,所以如果只係去市中心,最著數係買返張Tokyo Metro一日券或者兩日券,唔一定要坐都營或者JR。Tokyo Metro一日券710円,只要坐到4程以上已經抵返。
Tokyo Metro一日乘車券,係酒店買只需要600円,平左110円
地鐵入閘機
地鐵月台,好多都好窄,人又多,好難行
電車埋站
地鐵車廂內
由水天宮前坐去三越前只需3分鐘,一出地鐵站就係三越百貨公司,同埋日本橋。
三越百貨公司對面嘅日本橋
日本橋附近街道
高島屋百貨
東京車站,呢度係背面,由於時間關係冇行去正面嘅舊車站建築,不過第二日去左
東京車站係JR總站,呢個係新幹線閘口
日本銀行,行返去地鐵站時影,冇時間行埋去睇
酒店附近嘅水天宮神社,專保佑順產
咁樣兜左一圈只係用左一個鐘,返到酒店係8點鐘,跟住換埋衫去join埋同事食早餐,然後開始開會……食lunch……再開會。5點3左右終於開完第一日會議,然後坐大會安排嘅巴士去到另一間位於六本木嘅酒店入面間日本餐廳食晚宴。
出發之前睇天氣預報,話東京溫度係5度至15度之間,黎到呢幾日都維持係10至12度左右。不過之前聽人講東京室內都有暖氣,所以都唔敢帶太多衫,除左西裝西褲之外,casual衫只係帶左兩件長袖衫,同埋一件羽絨褸。點不知都仲係感覺帶錯衫,因為D長袖衫同件褸都仲係太厚。
係東京室內嘅暖氣真係太勁,連地鐵站都有,一入到去感覺好焗,再坐耐D就成身汗,有時感覺就算只係著一件短袖衫係室內都會覺得熱。但係一行出門口就會好凍,因為室內同室外溫差好大,一冷一熱,唔習慣好易早招,小弟就係咁去到last day就帶埋感冒返黎做手信。
我諗冬天去東京最好只帶一D簿身長袖衫,再加一件長褸,係室內除左件褸,出門口之前著左件褸再行出去,咁就冇咁易病,又唔怕室內熱。至於羽絨,我覺得11月尾同12月都仲未需要。仲有就係千其唔好著一D難除嘅衫,例如羊毛內衣同冷衫呢類,一定唔著得,唔係出到去又熱又除唔到盞死……
人氣文章:
Klook / Kkday最新優惠碼
Agoda最新10%折扣代碼
Hotels.com最新折扣代碼
Trip.com最新優惠碼
永安旅遊最新推廣碼
樂天旅行最新住宿折扣券
樂天旅行最新租車折扣券
日本樂天市場最新優惠券
Klook.com
如果喜歡這篇文章,請點個「讚」吧!