2008年東京春季賞櫻＋溫泉之旅（第二天[1]） – 築地市場

2008年3月27日（天晴，氣溫9~17度）

行程：築地市場 _ 淺草寺 _ 隅田川遊覽船 _ 台場

今次旅行每日都係大約7點半（即係澳門時間6點半）起身，今日係旅程第二日，早起都冇乜難度，起身洗完面著埋衫就出發去築地市場。由新宿坐地鐵丸之內線係霞ケ関轉日比谷線，去到築地站落車就到，出左車站大約行100米就見到築地外市場架啦。

一出地鐵站就會見到嘅築地本願寺

築地外市場

一到築地外市場，即刻可以見到呢間好多人食嘅井上拉麵

650円一碗拉麵，有四塊肉，真係好好味，係今次係日本食過最好食架

築地外市場，由呢個路口行左邊同右邊都可以去到築地市場同魚之橫丁，行左邊會多野睇D，直行到神社轉右過左橋就係築地市場

築地市場嘅運輸車，好有特色

豆類散賣用斗黎量

呢個季節只得士多啤梨當造

去到築地市場除左行下市場之外，最主要係想去試下食出名嘅築地壽司。出名嘅老店集中係築地市場對出嘅魚之橫丁，最多人排隊係壽司大同大和壽司呢兩間。其實老實講食嘅人唔係好多，有咁多人排隊只因佢嘅舖面好細，壽司大只有約10個人位，而大和壽司最多亦唔超過20個位，所以形成好似好多人排隊嘅感覺。

最多人排嘅係呢間壽司大，前面係大和壽司

我地選擇左食大和壽司，不過係呢度排隊都幾受氣，個侍應成日出黎質D人排密D，可能怕阻塞條路掛，不過個侍應唔係太有禮貌囉

排緊隊冇野做影嘅大和壽司店內，另外仲有一邊，每邊大約只有9個位，好迫

我地排左大約都有9個字時間，入到去發現地方真係好迫，坐得唔舒服。一坐低佢就每人俾一個放壽司嘅木板，只係講左一個字“Set?”，跟住我地望下左右隔離，見每人都係一人一set，咁咪每人要左一set囉，後來先知原來可以幾個人叫一set黎share架，蠢左。

放滿晒呢塊板就為之一set，好似total有10件壽司，本來想等佢俾晒先影，但係佢見我唔食好似唔想再整俾我咁，唯有少少都影張先囉

本來抱住好大期望排左成大半個鐘諗住會食到D好好食嘅靚壽司，點知食左之後發現味道真係麻麻，食剩幾舊都唔想再食，唔只係我地，隔離幾個香港人都係。而且個壽司師傅好似好不滿咁，我地話好飽食唔落，佢仲話出面好多人好肚餓等緊入黎，即係明催我地走姐。最後賣單走人total 10,500円，即係一個set要3,500円，好貴。

隔離條橫街都有D舖頭好多人排

食完壽司我地又行左去築地市場入面睇左一陣，然後係11點半左右就出發去下一站 – 淺草。

築地市場裡面，不過地下濕立立，冇乜野睇