2008年東京春季賞櫻+溫泉之旅(第八天) – 中目黑 (完)
2008年4月2日(天晴,氣溫12~18度)
行程:新宿 _ 中目黑 _ 新宿 _ 成田空港 _ 香港 _ 澳門
今日係東京之旅嘅last day,因為係下午六點半機,所以仲有半日時間用,不過因為想去嘅地方都去左,而且對腳又累,所以今日只係去左中目黑睇櫻花,之後就係新宿D百貨公司行下等夠鐘坐巴士去機場。
由新宿去中目黑要坐JR去惠比壽轉地鐵,由酒店出發計大約要20幾分鐘時間架。其實中目黑冇咩特別野睇,今次去都只係去睇下目黑川兩傍嘅櫻花,不過真係好靚架。
係惠比壽轉車果陣影
目黑川似條水渠多過條河
目黑川上有好多條橋,係影相嘅好地方
由橋上影嘅中目黑櫻花,好靚啊
目黑川兩邊D樓都好正架,聽講好貴
由於我地早出門,所以去完中目黑返到酒店都仲未到10點,仲可以去食返個酒店自助早餐添,雖然唔好食但都冇理由浪費啦。酒店規定11點前check-out,雖然check-out之後可以寄存行李,不過因為費事又要行返去攞,所以我地都決定攞埋行李走,剩返兩個幾鐘時間就係小田急百貨同京王百貨裡面渡過,因為機場巴士車站就係京王百貨出面。
如果拖住大件行李,坐巴士真係比電車方便架,一來巴士站係路面,唔洗好似坐電車咁攞住行李上落樓梯,二來機場巴士站係新宿駅西口果邊,由新宿太子去西口條路闊D,人又少D,好行好多,如果坐Narita Express,就要去新宿駅東口,果邊人又多路又窄,拖住喼行都幾麻煩架。
係小田急百貨同京王百貨,都係行下佢地個食品部,因為D食物真係好吸引。
係京王百貨買嘅北海道海膽蟹肉便當,盛惠1,200円,好味
係新宿京王百貨出面嘅Airport Limousine Bus車站,去成田空港嘅車次好密架,每15分鐘有一班,而且每班車都會有位剩,所以就算去到先買車飛都冇問題。我地之前已經買左飛,去到果陣仲未到時間,不過因為啱啱要開出果架車仲有位剩,所以我地就決定早D去機場,就咁結束8日東京箱根之旅啦。
去到機場仲有樣野要做,就係去返入境時買Narita Express車飛果間JR Counter,攞返Suica Card嘅按金,每張有500円按金攞返架,不過最好用盡佢先,唔好蝕底啊。
因為要經香港搭船返澳門,返到屋企差唔多係第二日零辰一點半架啦,由上機場巴士起計,差唔多用左12小時先由東京返到澳門。
人氣文章:
Klook / Kkday最新優惠碼
Agoda最新10%折扣代碼
Hotels.com最新折扣代碼
Trip.com最新優惠碼
永安旅遊最新推廣碼
樂天旅行最新住宿折扣券
樂天旅行最新租車折扣券
日本樂天市場最新優惠券
Klook.com
如果喜歡這篇文章,請點個「讚」吧!