2009年台北自由行 (Day 1) – 寶格利時尚旅館、西門町、饒河街夜市

2007年之後,2009年三月又去左第二次台灣,今次只係去台北hea五日,基本上都係去返上次去過嘅地方。其實呢次行程應該係北海道之旅之前寫完post出黎,不過因為工作關係未有時間,而之後又提唔起勁寫,所以一拖再拖。而家趁住剛剛寫晒首爾聖誕之旅嘅餘興,順便補返呢次台北之旅嘅網誌。另一個推動補寫呢次遊記嘅原因,係黎緊農曆新年將會第三次到訪台北,所以希望可以係發表下次台北旅遊網誌之前,先完成第二次台北之旅嘅遊記。不過由於事隔太耐,好多細節都唔係記得太清楚,所以只可以概略咁寫。

 

 

費話少講,快快進入正題. . . . .

 

 

由於已經去過一次,所以唔需要再好似第一次咁攪咁複雜既申請入台證手續,可以選擇到步時係機場辦入台證,或者通過網上申請。因為怕到步時人多要排隊,所以選擇上網申請,申請手續相當簡單,只須到網上申辦入台證網址填寫基本資料,提交申請之後過 一兩 分鐘就有批核,之後記低個批核number,帶埋身份證Passport同HK$75費用去到出證地點(澳門係位於皇朝廣場嘅台北經濟文化中心)取證就得架啦(叫人代領亦可以)。

 

今次去台北坐中午12點幾由澳門起飛嘅air macau航機,到達桃園機場差唔多係下午3點。自從兩岸直航之後,Air Macau生意差左好多,係咁蝕錢,所以樣樣都要cut cost,你睇下,呢個就係今次航程既飛機餐既全部,淨係得盒飯,以前有嘅面包同生果通通欠奉。不過已經好過聖誕節去首爾果次啦,果次只係每人派得個包食,可憐

 飛機餐

 

 

出到機場大樓第一時間搵巴士出市區,不過就俾國光巴士個售票員呃左,攪到好鬼慶。雖然上次去台灣已經差唔係兩年前嘅事,不過仲依稀記得有機場巴士直達西門町嘅主要酒店門口。但係當我地去到國光巴士嘅counter問佢時,個售票員話冇巴士去西門町,仲好肯定咁話間間巴士公司都冇車直達西門町,又話架巴士就開,係咁催我地快D買車飛,就係咁俾佢攪到失晒魂,買左飛。點知買左之後因為架車full晒上唔到巴士。澳門航空係係桃園機場嘅第一航廈,而國光巴士係由第二航廈嘅上車點開過黎,所以車上已經坐左好多人,剩返嘅座位唔多,而且多數係單丁位,最後等左好耐先有第二班車。

 

機場巴士售票counter

 

等車期間我地先發現原來隔離counter嘅飛狗巴士係會直達西門町主要酒店門口架,我地上次就係坐飛狗。不過係網上見好多人話飛狗D司機技術唔好,比較危險,坐國光好D,但係我嘅經驗就覺得冇乜嘢,而且飛狗D巴士大DD,座位又舒服D,同埋佢係由第二航廈開出,所以一定有位坐,最重要係佢可以直接去到西門町,如果住西門町一帶嘅酒店,就唔洗坐去台北車站再轉車咁麻煩。

飛狗巴士

 

 

今次book左位於西門町中華路一段嘅寶格利時尚旅館book佢嘅原因,係見佢係新開只有年幾嘅精品酒店,睇佢網頁D相又好有style,離西門町同捷運站又幾近,所以一連四晚都住佢。但係住落覺得唔係太好,第一係呢間嘢似俾人偷情嘅時鐘酒店多D,如果一家大細住唔係咁好;第二係佢個沖涼房唔係太得,雖然佢嘅賣點係有個按摩浴池,但係除左呢樣之外,浴室內嘅其他設備就唔係太掂,尤其是佢個沖浴花灑,唔係唔出水就係漏水;第三係佢嘅地點,雖然係離西門町捷運站只有3分鐘路程,不過就係位於離西門町中心較邊緣嘅地方,並唔係一落銜就有店舖可以買嘢果隻,稍為唔方便。

寶格利時尚酒店1寶格利時尚酒店2寶格利時尚酒店3寶格利時尚酒店4

 

 

係酒店check-in完放好行李之後,先係西門町行下,又係例牌食返碗阿宗麵線。

西門町1西門町2西門町3西門町4

 

 

夜晚時段去左饒河街夜市搵食,先坐捷運到市政府站,順道係新光三越行左一陣,然後就坐的士去饒河街。其實係台北坐的士並唔會貴,今次有四個人去,所以好多時都搭的士,計起黎仲平過坐捷運。

 

饒河街夜市上次冇去過,聽朋友講幾好行所以咪去試下。不過我就覺得麻麻地,因為條街主要係一D賣雜貨嘅攤位,食賣食嘅只係夾係賣雜貨嘅攤位之間,隔幾檔先有一間,唔得集中,所以比較唔好行。不過呢度嘅十全排骨我覺得好正,比起士林夜市嘅仲好味

饒河街夜市1饒河街夜市2饒河街夜市3

 

 

Day 1

fb share

如果喜歡這篇文章,請點個「讚」吧!

fb share

發佈留言

發佈留言必須填寫的電子郵件地址不會公開。 必填欄位標示為 *

收到您的留言後,小弟會盡快回覆。如果您在留言中提供的電郵地址正確,且已勾選同意接收電郵通知,當您的留言通過審核並有回覆時,系統會寄出電郵通知您。回答您留言所查詢的問題有時候需要一些時間研究,請耐心等待。另外,如果您還未讚好過本Blog Facebook專頁,可以請給我一個讃嗎?!就當作是我花時間和精神解答您問題的一點支持吧。謝謝!

fb share

如果喜歡這篇文章,請點個「讚」吧!

fb share