台北五天自由行：陽明山櫻花+淡水、九份City Walk

文章發表日期：2026-02-07 | 文章分類：台灣旅遊攻略 | 作者：Dilbert MO

旅遊教室» 旅遊攻略» 台灣旅遊攻略» 台北五天自由行：陽明山櫻花+淡水、九份City Walk

這篇文章整理了我們到台北五天自由行的行程，去的時候正值初春，所以到了陽明山看櫻花，又去了淡水、九份City Walk，當然旅程的重點仍然是食食食，吃了阿宗麵線、鴨肉扁、鼎泰豐，到了饒河街夜市、士林夜市、基隆夜市掃街。

台北五天自由行：陽明山櫻花+淡水、九份City Walk

下面是這5天台北自由行的行程：

Day 1 – 到達台北，到西門町酒店Check-in後，吃碗阿宗麵線，然後到饒河街夜市
Day 2 – 到東門市場參觀，然後去永康街，吃鼎泰豐小籠包、誠記蔥抓餅，遊覽中正紀念堂
Day 3 – 到陽明山看櫻花，然後去淡水老街，最後返回士林夜市食食食
Day 4 – 到九份老街、基隆夜市。
Day 5 – 旅程結束

台北五天自由行 (Day 1) – 阿宗麵線、饒河街夜市

今次book左位於西門町中華路一段嘅寶格利時尚旅館，book佢嘅原因，係見佢係係間精品酒店，睇佢網頁D相又好有style，離西門町同捷運站又幾近，所以一連四晚都住佢。

但係住落覺得唔係太好，第一係呢間嘢似俾人偷情嘅時鐘酒店多D，如果一家大細住唔係咁好；第二係佢個沖涼房唔係太得，雖然佢嘅賣點係有個按摩浴池，但係除左呢樣之外，浴室內嘅其他設備就唔係太掂，尤其是佢個沖浴花灑，唔係唔出水就係漏水；第三係佢嘅地點，雖然係離西門町捷運站只有3分鐘路程，不過就係位於離西門町中心較邊緣嘅地方，並唔係一落銜就有店舖可以買嘢果隻，稍為唔方便。

係酒店check-in完放好行李之後，先係西門町行下，又係例牌食返碗阿宗麵線。

夜晚時段去左饒河街夜市搵食，先坐捷運到市政府站，順道係新光三越行左一陣，然後就坐的士去饒河街。其實係台北坐的士並唔會貴，今次有四個人去，所以好多時都搭的士，計起黎仲平過坐捷運。

饒河街夜市上次冇去過，聽朋友講幾好行所以咪去試下。不過我就覺得麻麻地，因為條街主要係一D賣雜貨嘅攤位，食賣食嘅只係夾係賣雜貨嘅攤位之間，隔幾檔先有一間，唔得集中，所以比較唔好行。不過呢度嘅十全排骨我覺得好正，比起士林夜市嘅仲好味。

Day 1完

台北五天自由行 (Day 2) – 東門外市場、永康街、鼎泰豐、中正紀念堂

第2日上午去又係一輪食食食，未食之前先去左位於中正紀念堂與永康街之間嘅東門外市場，不過冇咩睇。

之後就行過去永康街街口果間鼎泰豐食嘢，又係例牌叫左小籠包，仲有雞湯。因為仲有要去其他地方食嘢，所以並冇叫太多。

食完小籠包再入去永康街間冰館食冰，呢間冰館好受日本人歡迎，見到大部份黎食嘅人都係攞住日文旅遊書。不過佢果D係刨冰，我唔係太鍾意，所以食左一大半之後都冇再食落去。

最近睇台灣電視台新聞，原來冰館因為夫婦離婚爭產，已經close左，大家下次去台北唔洗去搵佢啦。

冰館斜對面有一間叫誠記賣蔥抓餅嘅街邊舖，佢D蔥抓餅超好味，熱烈推介。我一向對用蔥整嘅食物好抗拒，所以一開始都只係打算食少少試下就算架，但係食落發覺好好味，好想再返轉頭買多兩件。

由誠記向中山紀念堂方向直行，大約200米左右就係有名嘅永康牛肉麵，佢對面係間學校（金華國小），離遠已經見到個黃色扣牌，好易認。不過因為之前食左好多嘢，食唔落，所以決定先行去中正紀念堂遊覽完再返轉頭食。

中正紀念堂上次都有黎過，不過今次已經改左叫自由廣場。

行完中正紀念堂因為太累，決定坐的士返去永康牛肉麵。好多人都話永康牛肉麵好好食，不過我地食完只係覺得麻麻地。

試過永康牛肉麵之後，我地去左忠孝新生站一帶行下，因為係星期日，所以亦去左附近嘅希望廣場，睇下台灣農產品，主要都係一D米同生果之類，冇咩特別，而且攤位亦唔多。

跟住去左食東區粉圓。

之後返西門町行下，買左少少手信返酒店。

今日晚餐去位於美麗華百樂園附近嘅伍角船板食，不過而家已經結咗業。

伍角船板係上次到台北時去過，覺得地方特別，食物味道又唔錯，所以決定再去。不過今次去到佢D菜色完全變晒，味道麻煩，選擇又少。

飯後係美麗華百樂園行左一陣，再係佢對面嘅家樂福超市行下同買左D嘢就返酒店休息. . . . .

Day 2完

台北五天自由行 (Day 3) – 陽明山櫻花、淡水老街、士林夜市

台灣由1月尾至3月係櫻花季節，雖然冇日本咁多咁靚，但一場黎到都想去睇下，所以今日行程主要係上陽明山賞花。

之前做左功課，以遊客黎講上陽明山最方便係先坐捷運到劍潭站，再坐紅5或260號公車上山，公車站就係面向士林夜市果邊嘅捷運站旁邊。因為係花季，所以搭車嘅人都唔少。

第一次去台灣嘅時候已經上過陽明山，不過果陣唔係花季，好少人，而家係花季遊人就多好多，如果係盛開時節可能仲更加多人。

陽明山嘅櫻花集中係陽明公園，如果係陽明山公車站步行去要行差唔多30分鐘，如果坐公車班次好少，所以最方便都係坐的士。我地去嘅時候係3月中，已經係花季尾聲，所以見到嘅櫻花好疏落，而且亦唔係太靚。

係陽明山睇完櫻花之後，又坐公車去返捷運劍潭站，然後坐捷運去下一個目的地：淡水。

上次係淡水食過一間叫本港快餐嘅魚丸好好味，今次又去同一位置間舖頭再食，但係覺得味道差好處，好難食。返黎睇返張相先知原來間舖改左名，多左個“新”字，可能換左老細，唔怪得唔同味啦。

行完淡水老街，再坐船去漁人碼頭，原來而家連坐船都可以用悠遊卡，真係好方便，所以去到台北真係記得買返張，坐捷運、公車都可以用，方便快捷，臨走前又可以全數退回未用餘款，唔會蝕架。今次去漁人碼頭嘅時間因為接近黃昏，所以可以睇到好靚嘅日落景色。

遊覽完淡水漁人碼頭之後，我地選擇坐公車返去淡水老街，公車站就係過左白色情人橋對岸，不過要留意行車方向，問清楚司機係返去淡水老街嘅先好上車。返到老街已經開始入黑。

離開淡水之後我地就去左士林夜市，所以又再一次去到捷運劍潭站。隔左咁多個月已經唔記得當晚係士林夜市食左D乜啦，因為當時冇睇相，只係記得有食我係台北嘅至愛 – 紅豆牛奶綿冰。

唔知點解其他夜市搵唔到呢種綿冰，只係士林夜市有，而係士林夜市入面有兩間食綿冰嘅舖頭，大家係正對面。今次食呢間唔係咁好味，唔知係唔係第一次嘅關係，覺得上次食果間好味好多，但係因為已經食唔落，所以冇再試埋果間，下次去一定再試下。

經過一日豐富行程返到酒店已經好累，不過用佢個按摩浴池沖完涼又真係精神返喎。所以趁未眼訓又落街行下，掃下便利店D特色飲品，又買左件Mister Donut，跟住再試埋西門町口嘅Cold Stone炒雪糕做宵夜。

Day 3完

台北五天自由行 (Day 4) – 九份老街、基隆夜市

今日嘅行程主要係去九份同埋基隆夜市，九份上次有去過，不過基隆夜市就係未去過嘅新景點。朝早起身之後先去西門町嘅鴨肉扁食早餐。

食完早餐先去台北車站買去瑞芳嘅火車飛，因為中午12點先有自強號列車去瑞芳，所以仲有時間係台北車站上面新開嘅微風台北車站(商場)行下。

行到咁上下時間可以去等火車啦. . . . .

坐自強號由台北車站去瑞芳只係需要45分鐘時間，因為上次黎過，所以出左車站好熟路咁行過對面馬路巴士站等巴士。係瑞芳度有一D只係本地人先可以坐嘅免費小巴，遊客唔坐得架。去九份嘅巴士係大巴黎架，由基隆開出去金瓜石或者九份方向嘅巴士就上啦。因為瑞芳屬於基隆市範圍，台北嘅悠遊卡係呢度唔用得，所以記得準備定散紙，不過唔記得巴士費係幾多。

同上次經驗一樣，基隆嘅巴士司機好狼死，由瑞芳上九份全程山路，彎多路窄，但係個司機照樣飛車同高速掟彎。真係一路坐一路驚. . . . .

上九份架巴士係唔會廣播下一站係乜，而且九份只係中途站，所以要自己留意住幾時落車。不過如果係旺季，應該巴士上多數乘客都係九份落車，再唔係認住九份基山街街口間7仔落車就冇錯，巴士駛到黎呢度係個“S”形彎位，一定會慢駛，足夠時間俾你睇清楚按鐘落車。

黎到九份都係係基山街行下，食下路口果檔舊道口牛肉麵，再食下魚丸，又食下賴阿婆芋圓呢D例牌地道小食，跟手再買返D手信。

係基山街街口對面馬路，即係回程巴士站隔離，有一間幾出名嘅手信店叫“李儀餅店”，佢嘅鳳梨酥幾好食架。不過如果係度買自己攞住走會好麻煩，好在佢係台北車站地下街都有間分店，而且可以免費送去酒店。所以我地係呢度order晒我地要嘅種類，然後叫佢係第二日我地臨走前送去酒店，咁當然要先俾晒錢先啦。

遊覽完九份之後我地下一個目的地係去基隆廟口夜市。係李儀餅店隔離巴士站等車，寫住基隆方向嘅巴士就啱架啦。由九份去基隆大約要40分鐘車程，今次個司機一樣係咁狼死，落山時係咁衝，幾驚佢會衝落山崖。

因為唔知係邊個店落車會比較近廟口夜市，所以都係直接去到位於基隆火車站嘅公車總站落車。落車之後按照地圖行去廟口夜市，大約要行10分鐘左右。

基隆夜市比起台北市內嘅夜市似乎管理較好，地方比較整齊乾淨，而且好多店鋪都有地方可以坐係度食。

基隆近海，所以廟口夜市有好多食海鮮嘅檔口，但係D海鮮就咁放晒出黎，感覺好似唔係好衛生，不過都唔理咁多，一於搵間黎食。

另一樣只係基隆廟口夜市先食得到嘅美食係螃蟹羹，真係好好味$50新台幣一碗，好抵食。

由基隆返台北可以坐公車，不過我地選擇坐火車，好方便。由基隆去台北嘅火車好似都係區間車，即係站站停果種，所以時間都幾耐下。係火車站度買左張車飛就可以入閘等車，車飛上係冇標明時間同座號架，有車就可以上，上到車自己搵位，同坐地鐵一樣。

雖然係基隆夜市食左唔少嘢，不過坐左成個鐘火車返到台北之後，開始有D肚餓，所以都係要食返D正式嘅晚餐。於是決定照旅遊書介紹，去左捷運中山站附近嘅肥前屋食鰻魚飯，不過而家已經結業啦。

我地由台北車站直接坐的士去，好快就到。肥前屋係橫街入面，架的士直接車我地到門口，所以唔洗搵，不過黎到已經見到好多人排緊隊。

肥前屋入面地方好細，為左等多D人食，一張枱要坐滿晒人，所以幾乎張張枱都要搭枱，坐到唔係咁舒服。

旅遊書介紹肥前屋最出名係鰻魚飯，所以主菜當然點呢樣啦，另外佢嘅玉子亦唔錯。唔知係唔係受環境太迫影響，對食物味道覺得只屬OK，唔係非食不可果種。下次如果人少D再黎試下有冇唔同。

離開肥前屋之後，我地再坐的士去阿蘇介紹嘅江記華隆買豬肉乾。間舖頭位於西門町北面嘅迪化街，呢條街都好舊下，感覺有D似下環街。雖然有地址，但係的士司機都唔知係邊，搵左好耐都見唔到。因為當時已經8點幾，條街D舖頭都關晒門，以為江記都係關左。正當我地想放棄返酒店之際，竟然發現前面街邊有一間唯一有燈火嘅舖頭，停車睇真D原來就係我地想搵嘅江記華隆，真係好彩，原來佢都正在關門中，遲一步都買唔到。