《2010年新春台北之旅》- 第三天(1) – 烏來泰雅婆婆、五分埔shopping

[ 2010年2月16日 (星期二，年初三)；天陰有雨；氣溫：around 13度]

 

因為係山上而且又落雨嘅關係，呢一晚訓得好舒服，訓左足足12小時。因為尋晚領教過佢嘅食物，所以今朝都唔敢再去食旅館嘅早餐。起身之後再浸多次溫泉，大約11點就check-out走人。

 

因為未食早餐，所以返到烏來老街之後，我地先去搵地方食嘢。按照旅遊書介紹，我地去左泰雅婆婆美食店。叫左竹筒飯、排骨湯、麻油雞同埋一碟清炒龍鬚菜，總體味道一般啦，食左NT$440。

 

係泰雅婆婆美食店食完早+午飯之後，再去食買多次好好味嘅山豬肉香腸，之後就行去公車總站準備坐公車返台北。係公車總站有好多的士係度搵客，當我地排隊等車嘅時候，就有個的士司機黎問我地坐唔坐，每人收NT$200，由烏來去到新店捷運站，不過就要上齊四個人先走得。因為當時啱啱走左一部公車，所以決定坐的士出去，慳返一D時間。個司機好快又搵到另外两個乘客，夠人可以開車。坐的士由烏來去到新店客運站大約需時20分鐘，比起公車快15分鐘左右。

 

因為要去台北車站地下街嘅李儀餅店買手信，所以先由新店站坐捷運直去台北車站，車程大約25分鐘。係李儀餅店落左單，叫佢地係第二日中午送去丹迪旅店。之後再上去微風台北車站行下，上面有間專賣日本得意產品嘅商店，中山站上面嘅SOGO頂樓亦有分店，而且面積仲大。

 

行完微風台北車站差唔多三點，於是沿中山地下街行返去中山站，不過呢條地下街完全冇嘢睇架。

 

下午三點半再次返到丹迪旅店check-in，去到職員已經幫我地辦好手續，攞返之前寄存嘅行李之後就入得房。今次入住嘅係最高級嘅精緻雙人房，入到房真係好大驚喜，感覺好正。房間介紹係第一天行程中已經講左，呢度就唔再重複啦。

 

而今日下午嘅主要節目係去五分埔shopping。五分埔係位於捷運後山埤站附近嘅平價成衣市場，就係饒河街夜市附近。從捷運後山埤站1號出口出到地面之後，行向馬路對面嘅萊爾富，再行過另一條馬路對面嘅康是美就係架啦。

 

康是美對面有間鬍鬚張魯肉飯，見到當然入去食下嘢先啦，佢除左魯肉飯出名之外，豬手同雞湯都好好味架，我地叫左三樣盛惠NT$155。

 

五分埔係由永吉路、松山路、松隆路、中坡北路所圍成嘅地帶，由多條横街窄巷所組成，而大部份横街都加裝左簡單嘅上蓋，所以即使好似我地果日落到咁大雨都可以係入面shopping架。

 

係五分埔行左唔係好耐，買左幾件衫之後就走人啦，下一站係去西門町。

 

待續. . . . . .