台北烏來兩日一夜浸溫泉、遊老街、睇櫻花

文章發表日期：2026-02-12 | 文章分類：台灣旅遊攻略 | 作者：Dilbert MO

旅遊教室» 旅遊攻略» 台灣旅遊攻略» 台北烏來兩日一夜浸溫泉、遊老街、睇櫻花

去過幾次台灣都未試過佢嘅溫泉，今次想試下浸溫泉，由於旅程只有短短4日時間，所以決定係台北附近搵一個有溫泉嘅地方去。北投、陽明山、烏來以及宜蘭嘅礁溪都係台北附近比較著名嘅溫泉鄉，但係2月中台灣有櫻花，所以想搵一處既有溫泉，又有櫻花嘅地方，而符合呢兩個條件嘅地方就只得“烏來”。所以最終決定係台北住兩晚，烏來住一晚溫泉旅館。

台北+烏來溫泉四天自由行行程分享

行程第一日先到台北住一晚，今次入住嘅係位於天津街嘅台北丹迪旅店-天津店，分別係第一日同第三日各住一晚，中間果晚就住烏來，所以第二日Check-out之後可以將大件行李寄存係度，只係輕裝去烏來浸溫泉。

台北烏來溫泉之旅Day 1：先到台北

Day 1 到達台北後，先到旅店Check-in，之後去度小月食lunch。去到仲未夠11點半，唯有係度小月門口等開門。

台灣度小月D食物真係好好味，最中意食佢嘅擔仔麵，撈麵同湯麵都好正，NT$50一碗真係唔貴。另外蝦捲同麻油雞都係必試美食，大腸亦唔錯，不過要食鹵水大腸，炸大腸就麻麻。呢餐食左NT$850。

食完度小月，係台北周圍City Walk，夜晚去咗美麗華影城睇場戲。

美麗華百樂園就位於劍南路站隔離，出左車站行過馬路就係。

我地先搭扶手電梯直接上去五樓嘅售票處，買之前係網上訂好嘅戲飛。買飛時可以再加D錢買埋有飲品同爆谷嘅套票。

睇完戲已經係九點幾，出到街發現正在落雨，好彩早有準備帶左雨傘。回程我地選擇坐接駁巴士去劍潭站，先到士林夜市食完嘢，再返酒店。

第一天行程完結

台北烏來溫泉之旅Day 2：台北去烏來、遊烏來老街、坐台車

今日會由台北去烏來，因為唔洗趕時間，所以打算11點先chech-out。酒店嘅房租係包埋早餐，所以起身之後先落地下飯廳食早餐。早餐係自助餐形式，不過食物只有幾款，味道過得去咁啦。

因為第三晚會再返丹迪旅店住多晚，所以我地將大件行李寄存係旅店，只帶少少嘢入去烏來。

由台北去烏來最慳時間嘅方法係先坐捷運到新店站，然後由新店站坐公車到烏來。由於係假期關係，我地估計會有好多人去烏來，如果係新店上公車一定唔會有位坐，所以決定直接係台北車站附近嘅公車總站坐公車。

台北去烏來的公車係849號公車，以前係1601號。台灣車站總站嘅公車站就係青島西路中央健康保險局嘅馬路邊，以前係旁邊公園路。

由台北車站捷運站八號出口行出路面（下圖1），然後向住同車站大樓相反嘅方向直行就係，距離大約只有250米。首先會經過台北市政府警察局中正第一分局（下圖2~3），警察局斜對面馬路有一個巴士站（下圖4），綠色牌果個門口就係中央健康保險局其中一個門口，呢個站係公車由總站開出之後嘅第一個站，可以係度上車，不過總站只係前少少，所以最好行去總站上車。係警察局過馬路繼續向前直行，就會見到中央健康保險局另一個門口（下圖5），係呢度向前行10幾米就係公車總站啦，車站前面有間M記。

我地11點3到公車站，當時除左我地只有另外3個人上車。坐公車可以用悠遊卡，上車時拍一次卡，到落車時要再拍一次扣錢。

(更新: 由台北車站去烏來的公車NUMBER已經由1601號改左做849號，只係改左個NUMBER，其他野冇變。)

因為係年初二假期嘅關係，所以台北市區路上唔係好多車，架公車除左停站同埋紅燈訂車之外，都行得好順暢，由台北車站去到新站捷運站用左45分鐘時間，如果坐捷運，由台北車站到新店站大約25分鐘，快一半左右。

雖然係總站只得5個人上車，不過一路上都不斷有人上車，到達新店站之前已經冇晒座位，而且亦已經企左好多人。公車停靠新店站嘅時候，已經見到好多人排緊隊等上車，好彩我地選擇係總站上車，唔係都幾慘。由新店站到烏來嘅車程大約35分鐘，不過全程山路，又上又落，企足全程腳都軟。

公車係烏來嘅總站係烏來老街附近，如果入住烏來璞石麗緻或者馥蘭朵烏來渡假飯店，可以係總站之前個車站落車，呢兩間酒店就係公路旁邊。如果坐公車返台北，就要去返總站等車，因為係路邊車站上車係旺季應該好難有位坐。

可能係因為落雨關係，烏來山腰上漂浮住好多雲霧，空氣好清新，一落車即係吸多幾嗒。而且又見到又清又綠嘅河水，不過第二日走嘅時候發現河水由墨綠色變左做泥黃色。

從烏來公車總站向前行大約150米就係烏來老街入口，街口有一間全家便利店。

由全家便利店轉入去，過左呢條橋就係烏來老街啦。

烏來老街大約只有100米左右，街道兩邊集中左好多食店、小食檔、手信店同埋平價溫泉旅館。

係烏來老街入口附近，有一間烏來泰雅博物館，就係烏來婆婆美食店隔離。裡面展出泰雅族原住民嘅生活，展品雖然唔一定會吸引到你，但係佢入面有一樣好重要嘅嘢，你可能會有需要. . . . .就係洗手間。

烏來老街一帶嘅公廁並唔係好多，我見過係覽勝橋近老街嘅橋口有一間，另外係台車站內亦有一間，不過衛生只係一般，女士可能會唔慣。而係烏來泰雅博物館裡面亦有廁所供遊客使用，但衛生情況就好好多，好乾淨。博物館係免費入場架，大家可以好好利用，女廁係地下，男廁就係二樓。

烏來其中一樣出名嘅小食係山豬肉香腸，係老街靠近覽勝橋一邊有幾檔賣燒香腸嘅小食檔，不過多數冇乜人幫襯，但係唯獨以下呢檔就排晒長龍。

佢嘅山豬肉香腸真係超超好味，尤其是係層皮燒到好香，就連我一向唔中意食香腸嘅人都覺得佢好好食，我地仲前後買左三次黎食。

烏來老街嘅盡頭係覽勝橋，過左橋沿樓梯行上去就係台車車站，可以係呢度坐烏來觀光台車上去勇士廣場睇烏來瀑布。

台車單程車費NT$50，去勇士廣場除左坐台車之外亦可以行路上去，不過路程都唔短，所以最好都係坐台車，唔洗咁辛苦之餘仲可以試下呢種咁特別嘅交通工具。台車車速雖然只得40公里，不過因為架車冇門，所以都幾刺激架。

台車嘅車程大約只有5分鐘，好快就到達勇士廣場嘅台車站。

勇士廣場就係烏來南勢溪旁邊，對岸就係烏來瀑布，而瀑布上面嘅山頂就係雲仙樂園。勇士廣場地方好細，係呢度唯一景點就係睇烏來瀑布，可能因為有雨落，所以瀑布水量都幾豐富，幾有氣勢。

勇士廣場上只有幾間賣民族服飾嘅手信店，其餘並冇地方值得行。

今次吸引我地到烏來嘅其中一個原因，係因為時值台灣櫻花季節，而烏來係其中一處有名嘅賞櫻地方，可惜去到真係大失所望。

唔知係唔係天氣轉冷嘅關係，並唔係太多櫻花樹有開花，我地只係係坐公車來烏來嘅路上，台車車道旁邊以及之後坐車去溫泉旅館嘅路邊間中見到一兩棵開左花嘅櫻花樹。勇士廣場聽講係烏來最多櫻花嘅地方，可惜眼見就只有呢一棵櫻花樹係開得比較似樣。

係勇士廣場沿下圖呢條樓梯行上去就係纜車站，可以坐纜車上去對岸山頂嘅雲仙樂園，來回要NT$200幾蚊。因為冇乜興趣所以我地冇坐上去，只係行上纜車站影左幾張相就走人。

因為冇上去雲仙樂園，所以只係大約半小時時間已經遊覽完勇士廣場，之後再坐台車返回烏來老街。遊覽烏來老街加勇士廣場兩個半小時已經足夠，即使上埋去雲仙樂園，三小時已經OK，如果食埋飯應該都唔洗四小時。

溫泉旅館要等到5點先可以check-in，估計下午時段房間係用黎招待日歸旅客。我地由勇士廣場返到烏來老街時都仲未到3點，唯有放慢腳步再行多圈，食下小食，當然包括再食多次好好味嘅山豬肉香腸啦。

行到3點9真係已經唔知行去邊度好，而且雨勢開始變大，所以決定打電話去旅館，叫佢地黎車我地入去旅館先，心諗就算要等係旅館等有得坐起碼舒服D。

由於烏來大多數旅館都離開老街好遠，所以一定要坐車先可以去到，除左係公路邊嘅旅館，例如烏來璞石麗緻或者馥蘭朵烏來渡假飯店可以坐公車之外，其他遠離公車路線嘅旅館就只可以坐的士，或者叫旅館專車接送。

大部份旅館亦有專車接送住客往來烏來老街與旅館之間，而係烏來老街嘅等車地點，就係老街入口前，即係全家便利店前面。係便利店斜對面係烏來警察局，可能因為易認，旅館一般會同客人講係警察局門口等，所以係呢一個由警察局、便利店以及老街入口所組成嘅三角地帶，會見到有好多人企係度等車。

如果想旅館派車到老街接你，當然需要先打個電話通知佢地啦，所以記得抄低旅館電話號碼帶係身啊。可能會有人同我一樣會擔心打電話去旅館call車嘅問題，其實一D都唔洗擔心，即使你手提電話冇漫遊或者甚至冇帶手提電話都冇問題，因為係警察局隔離就有一排電話亭。

我哋今次入住嘅溫泉旅館，係三好米溫泉會館，不過而家已經結咗業。

台北烏來溫泉之旅Day 3：從烏來返回台北

第二日Check-out後，再返到烏來老街，我地先去搵地方食嘢。係呢間泰雅婆婆美食店叫左竹筒飯、排骨湯、麻油雞同埋一碟清炒龍鬚菜，總體味道一般啦，食左NT$440。

食完早+午飯之後，再去食多次好好味嘅山豬肉香腸，之後就行去公車總站準備坐公車返台北。

係公車總站有好多的士係度搵客，當我地排隊等車嘅時候，就有個的士司機黎問我地坐唔坐，每人收NT$200，由烏來去到新店捷運站，不過就要上齊四個人先走得。因為當時啱啱走左一部公車，所以決定坐的士出去，慳返一D時間。個司機好快又搵到另外两個乘客，夠人可以開車。坐的士由烏來去到新店客運站大約需時20分鐘，比起公車快15分鐘左右。

因為要去台北車站地下街嘅李儀餅店買手信，所以先由新店站坐捷運直去台北車站，車程大約25分鐘。係李儀餅店落左單，叫佢地係第二日中午送去丹迪旅店。之後再上去微風台北車站行下，上面有間專賣日本得意產品嘅商店，中山站上面嘅SOGO頂樓亦有分店，而且面積仲大。

下午三點半再次返到丹迪旅店check-in，去到職員已經幫我地辦好手續，攞返之前寄存嘅行李之後就入得房。今次入住嘅係最高級嘅精緻雙人房，入到房真係好大驚喜，感覺好正。房間介紹可以睇返呢篇台北丹迪旅店-天津店住宿介紹。

今日下午嘅主要節目係去五分埔shopping。五分埔係位於捷運後山埤站附近嘅平價成衣市場，就係饒河街夜市附近。從捷運後山埤站1號出口出到地面之後，行向馬路對面嘅萊爾富，再行過另一條馬路對面嘅康是美就係架啦。