《2010年新春台北之旅》- 第二天(4) – 烏來三好米溫泉會館

打完電話去旅館之後5分鐘，三好米溫泉會館架私家車就黎到約定地點接我地，架車車身有三好米字眼，好易認得出。

三好米溫泉會館座落係山上嘅環山路旁，可以居高臨下望見南勢溪，由烏來老街坐車去只需大約5分鐘車程。

去到旅館原來已經可以check-in，唔洗真係等到5點。因為我地係網上訂房，已經俾晒錢，所以去到只需要俾張e-mail printout佢就可以check-in。三好米嘅職員感覺上好似都係part-time，唔係咁專業，而旅館大堂裝修亦係麻煩，感覺有D老土。

原來三好米真係做米架，仲每人送左一支佢地出產嘅玄米酵素，聽講話可以清腸胃咁話，不過試左一嗒超難飲。

攪完手續之後佢會講解一次旅館設施以及一D要注意嘅事，跟住話俾我地知點去我地間房。客房係地下一層，由呢個入口行落去就係。

入到房第一個感覺係間房好大，應該有成七、八百呎。除左一間大睡房之外，仲有日式起居室。

我地住呢間房叫和風雙人套房，係房入面有埋私人溫泉架，而且亦有一張石床，床下面有溫泉流過，暖暖地訓落去都幾得意，不過唔係咁舒服，所以只係訓下做意思. . . . . .

雖然間房好大，裝修睇落又幾好，不過睇真D就會發現唔係好掂。D裝修好求其，設施又舊又冇乜保養。總體黎講，間房除左大之外冇乜優點。

今次去烏來主要係去浸溫泉，所以先去試下佢個大池。三好米溫泉會館只有男女各一個公眾池，男湯係客房同一層，而女湯就係大堂reception隔離。

同日本一樣，浸溫泉都係要全裸架，不過就冇浴袍俾客人換，所以需要係溫泉嘅更衣室換衫。要浸溫泉先要到大堂問職員要一條儲物櫃鎖匙，跟住就可以打開溫泉更衣室嘅儲物櫃，除左衫就放入儲物櫃，而櫃入面亦有一條毛巾，用黎浸完溫泉後抺身。雖然同日本比仲係差好遠，不過都算OK囉。

可能三好米溫泉會館都知道自己嘅餐飲質素好差，所以房租冇包晚餐，不過就有包埋早餐。本來我地想係浸完溫泉之後出去烏來老街食晚飯，如果要去老街就需要旅館車我地，而按照規矩，旅館只會免費車住客兩次，一次由老街去旅館check-in，另一次就係check-out之後車返出去老街。如果需要另外車出車入，來回一次需要額外俾NT$100，不過都冇所謂啦。只可惜係個天由下午開始就不停落雨，而且越落越大又冇停嘅跡象，所以最後只好打消出去食晚餐嘅念頭，改係旅館入面食。不過旅館只係提供一D固定嘅套餐，其實就只係碟頭飯加一碗湯再加一杯飲品，每份NT$250。以下係我要嘅饅魚飯，超難食！

求其食完餐飯之後唯有返入房聽下雨，今晚就早D訓，希望聽日好天。臨訓前又試下房入面嘅私人溫泉。

第二天行程完結