《2010年新春台北之旅》- 第四天 – 鼎泰豐

[ 2010年2月17日 (星期三，年初四)；天陰有雨；氣溫：around 15度]

好快又到左旅程最後一日，今日又係好晏起身。雖然丹迪旅店有包早餐，不過我地今日要去食小籠包，所以唔係旅店食。我地先攪左check-out，將行李寄存同埋拜託旅店幫我地接收李儀餅店送黎嘅手信之後，就由丹迪旅店直接坐的士去永康街鼎泰豐。

去到鼎泰豐啱啱開門冇幾耐，不過已經有好多食客。又係點左D例牌嘢，食左NT$787。

食完鼎泰豐本來想再去食上次試過好好味嘅蔥抓餅，點知要初五先啟市。

蔥抓餅對面間冰館，已經結左業囉。

原來度小月係永康街開左間分店。

去完永康街今次旅程安排嘅行程已經完成，跟住剩返D時間就係去買手信，然後返丹迪旅店攞返行李，再坐的士到台北車站隔離嘅國光巴士總站坐巴士入機場。

係機場等check-in嘅時候有好幾團香港旅行團，好多團友都推住一盒二盒寫住”維格”嘅手信。聽講維格嘅鳳梨酥同埋綠豆糕都幾好食架，而我地亦買左唔少。係桃園機場第一航廈亦有維格嘅分店，位置就係進入離境櫃位之前嘅購物區，即係由check-in大堂搭扶手電梯上一層。如果打算係佢度作最後沖刺買D手信，最好唔好去航空公司櫃檯做check-in住，先上去買完放入喼先，再落返去check-in都未遲。

入左禁區之後都仲有D商店行下，不過就冇咩好買。

短短四日嘅新春台北之旅完滿結束