2012年京阪之旅(Day 4[下篇] – 日產租車難波OCAT店還車)

去到大阪只係12點幾仲未夠鐘可以check-in，於是我地先開架車去Hotel Vista Grande Osaka放低行李。(想睇酒店介紹嘅朋友可以去睇我呢篇住@大阪Hotel Vista Grande Osaka)

然後再係大阪市內兜下，想睇下邊度有櫻花開左，不過兜左幾個地方都唔見有，大阪城、造幣局嘅櫻花通通都仲未開。算吧，呢兩日大阪主打shopping算啦。

兜完一輪個天開始有D雨點，所以都係先還左架車再算。還車地點係難波JR駅地下負一層(B1層)嘅日產租車なんばOCAT店，因為間店唔係街舖，要駅入地庫停車場，所以係京都攞車果陣，個職員已經俾左張地圖我，仲好有心機咁教左我點入去，不過聽左都唔係好明。

行完一次之後覺得其實都唔係好難，下面用圖解方式講解一下，如果你又係咁啱係日產租車，又咁啱係呢間難波OCAT店還車，希望可以幫到你啦。

下圖係難波OCAT周邊嘅街道圖，如果你由千日前通方向駛黎，就應該靠左行(圖中橙色線)，係出入口處按紅色線駛入停車場入口，落到去就係B1層。如果你係由圖中下方駛黎(紫色線)，應該先靠右線行，係中間出入口處轉右過線，按紅色線駛入停車場入口。

下面呢張圖片就係出入口處嘅實景，圖片來自Google Map實景照片嘅截圖。

下面呢張係日產租車俾嘅難波OCAT地下停車場B1層嘅平面圖，入到去可以將車暫時停係紅框位置，最好有個人睇住架車，然後搵個人由玻璃門入去，照箭咀咁行去租車店Counter叫人黎接收架車。

____________________

還左架車我地就沿住地下街行返去難波，途中見到有間鰻魚飯專門店，於是就食左呢個饅魚飯做午餐。

呢日之後嘅行程，全部都係心齋行街shopping，所以冇影到相，唯一係影左呢間g.u.，佢係Uniqlo嘅平價版副線，價錢比Uniqlo平4成左右，當然質素會差少少，但係都好抵著。間舖頭就係心齋橋步行街，由戎橋向北行200米左右就會見到。

g.u.心齋橋店位置圖

講開g.u.，不如講埋Uniqlo啦，以前係心齋橋，都會去佢係難波0101上面果間分店，不過呢間舖面積好細。今次發現原來Uniqlo係心齋橋開左另一間好大嘅分店，有四層，貨物品種齊好多。Uniqlo心齋橋店就係心齋橘步行街大丸百貨北館斜對面，接近長堀通，由戎橋向北行大約600米左右。不過以而家匯率黎計，Uniqlo日本嘅價錢絕對唔會平得過香港，除非遇正大減價啦。

Uniqlo心齋橋店位置圖

Day 4 End…