2013年首爾賞楓自由行 – Day 3 (Part 2)：巧遇首爾初雪

離開南山公園之後我地再去埋山下嘅南山谷韓國村，之後再去南大門市場同樂天百貨shopping，係冇諗過嘅情況下，今日竟然俾我地遇到一場初雪，對於未見過落雪嘅團友真係喜出望外。

從南山公園行落去就係巴士站，旁邊係旅遊巴停車場，如果跟團一定要由呢度行條斜路上去南山公園，超辛苦。

睇左巴士路線之後，決定坐2號車去韓屋村。

巴士站就係地鐵忠武路站旁邊，落左車向前行轉右就係韓屋村。

繼續行程之前先係路口呢間食店食個簡單午餐

落雪啊，不過落左一陣就停左。

韓屋村其實冇咩睇，不過因為唔洗俾入場券，所以都有唔少旅行團入去。

睇完韓屋村返去明洞同南大門市場行，去到世宗酒店附近又再落起雪黎，而且仲好大，要入去避一避。

係南大門市場只係行左一陣，冇咩興趣行。

不過對食嘢就好有興趣，呢間係南大門市場Gate 2入口嘅燒餅攤檔好多韓國人排隊，我地又再跟住排。

呢間D餅甜咸都有，我地兩樣都買，咸嘅好好味，甜嘅都OK，不過就冇上一日係仁寺洞果間咁好食。

由南大門市場行冇幾耐就可以去到樂天百貨，樂天免稅店就係位於百貨公司嘅9-11樓。係呢度買韓國牌子嘢護膚化妝品比街上嘅專門店平，而且可以用呢張5-10%嘅折扣券，所以塞滿人，尤其係攞住大疊人仔嘅同胞們。上去前記得準備足夠彈藥、護照同埋以下呢張折扣券啊。呢張折扣券print一張出黎就夠，用完唔會收，可以再用。

呢晚晚餐去左明洞姜虎東烤肉店食烤肉，係明洞餃子或者鳳雛向Nine Tree Hotel方向行，再係呢間舖旁嘅小巷行入去就係。

旅遊書話佢營業時間只去到夜晚9點，我地去到果陣已經係9點，心諗應該打烊食唔到，但入到去又唔覺佢有關門嘅準備，仲有唔少食客食緊，而且到我地10點幾食完走人果陣都仲有客人入去。

虎東烤肉店嘅招牌菜係五花肉，所以大家去到記得只係食豬肉好啦，唔係叫牛肉啊，因為佢嘅五花肉的確好好味，但牛肉就……

果然係食貨，食完烤肉仲未夠，返酒店前仲要買D宵夜返房食~_~。

韓國嘅栗子係就係好大粒，但係好難燒得熟，我地買返去呢包冇一粒甩到殼，俾人呃左。

不過粟米就好好味

– Day 3 完 –

相關文章：

• 首爾明洞酒店推介
• 2014年韓國首爾新酒店
• 住@首爾明洞天空花園酒店(Hotel Skypark Central Myeongdong Seoul)
• 住@首爾明洞王子酒店(Prince Hotel Seoul)
• 首爾免費無線上網 (Seoul Free WiFi)
• 2013年首爾賞楓自由行 – Day 1 (Part 1)：坐真航空澳門飛首爾
• 2013年首爾賞楓自由行 – Day 1 (Part 2)：夜遊清溪川首爾燈節
• 2013年首爾賞楓自由行 – Day 2 (Part 1)：土俗村人參雞、遊覽景福宮
• 2013年首爾賞楓自由行 – Day 2 (Part 2)：仁寺洞、平安道豬手
• 2013年首爾賞楓自由行 – Day 3 (Part 1)：南山公園睇紅葉
• 2013年首爾賞楓自由行 – Day 3 (Part 2)：巧遇首爾初雪
• 2013年首爾賞楓自由行 – Day 4 (Part 1)：德壽宮
• 2013年首爾賞楓自由行 – Day 4 (Part 2)：梨大、宏大、東大門批發市場
• 2013年首爾賞楓自由行 – Day 5 (Part 1)：廣藏市場、鷺梁津水產市場
• 2013年首爾賞楓自由行 – Day 5 (Part 2)：明洞購物、景福宮烤肉
• 2013年首爾賞楓自由行 – Day 6 (Part 1)：昌德宮秘院賞紅葉
• 2013年首爾賞楓自由行 – Day 6 (Part 2)：坐首爾機場火車去仁川機場，首爾再見了
• 2009年聖誕首爾之旅