2014年環瀨戶內海自駕遊(Day 5)下篇 – 宮島一日遊(下)

上篇講到我地係海水退潮嘅時間黎到宮島嘅嚴島神社，所以可以行落去水退之後嘅海灘同大鳥居影相，影夠之後我地上返岸，準備入去嚴島神社裡面參觀啦。

 

嚴島神社入口，要入去參觀當然要買入場券啦。

 

入神社前巡例先潔淨下雙手

 

其實嚴島神社地方唔係好大，而且主要都只係沿住廻廊由入口行到出口咁參觀，唔需要太多時間。

 

嚴島神社嘅本殿，只可以係殿外參拜。

 

每間神社例必有嘅賣符嘅地方

 

本殿對出嘅平台分別叫高舞台同平舞台，係度望出去可以對正大鳥居影相。

 

接近神社出口仲有個能舞台

 

神社出口，雖然出口冇人看守，但呢度只可以出唔可以入，唔好偷雞唔買飛係呢度鼠入去啊。

 

係嚴島神社出口旁邊仲有個小神社同寺院，不過唔係重點景點，所以冇入去睇。我地下一個景點係要去紅葉谷坐纜車上去彌山。去紅葉谷嘅路係宮島消防署旁邊，所以要由嚴島神社出口先行返轉頭。

 

跟住路牌指示行就會去到呢個路口

 

前面就係消防署

 

未到消防署之前，轉右上去就係去紅葉谷嘅山路。

 

係呢度3月至11月期間會有免費穿梭巴士上去紅葉谷，不過每20分鐘先至有一班。我地黎到果陣距離下班車時間太耐，所以決定自己行上去紅葉谷。

 

從巴士站行去紅葉谷唔係好遠，大約10-15分鐘就可以去到，沿途會經過呢D地方。

 

中途有一間食店，俾佢嘅燒蠔香味吸引，就係度坐低食返幾隻燒蠔先，不過呢間舖D蠔味道麻麻地，唔建議係度食。

 

食店範圍其實已經係紅葉谷公園，再行前少少有條紅葉谷橋。

 

果然冇改錯名，就算係五月呢度都仲有紅葉睇。

 

穿梭巴士係紅葉谷嘅車站

 

呢架就係穿梭巴士，我地行到黎佢都仲未開工。

 

纜車站仲要再向上行多一段路

 

紅葉谷纜車站就係呢個隱蔽嘅地方

 

纜車售票處就係地下，如果有買廣島電車嘅一日乗車券，買纜車票果陣記得出示，可以有450円折扣。

 

上車地方係纜車站二樓

 

由紅葉谷上去彌山唔係一架纜車直接上去，需要先坐細纜車到中轉站，再轉坐大纜車。

 

細纜車只由紅葉谷去到海拔367米嘅榧谷駅

 

從榧谷駅去山頂獅子岩駅嘅大纜車每15分鐘一班，纜車其實並唔算大，只可以坐30個人，所以如果人多都可能要排好耐，好彩呢日冇乜人。

 

係纜車上可以俯瞰好靚嘅瀨戶內海美景

 

獅子岩駅高度係海拔430米

 

獅子岩未係彌山頂，如果要上到山頂展望台，要再行起碼半個鐘山路。

 

我地冇咁好腳骨力，只係獅子岩駅旁邊嘅獅子岩展望台睇風景。

 

落到山腳咁啱有穿梭巴士到，當然坐車返出去啦。

 

坐巴士話咁快就返到消防署附近

 

買D燒番薯食，好味…

 

再行返嚴島神社附近，發現呢間食店嘅燒蠔好香，而且好多遊客係度買黎食。

 

兩隻蠔400円，抵食。

 

呢間D蠔好大隻，味道比紅葉谷果間正好多。

 

再返到嚴島神社前面，發現海水已經浸左入去今朝落去影相嘅海灘。

 

大鳥居都成個被海水包圍住

 

係表參道上見到呢間包店，套卡通片有D熟口面。

 

行左半日都未正式食午餐，離開宮島前係表參道食左野先。

 

從宮島返到廣島市區已經差唔多四點啦，本黎打算去埋原爆紀念館，但又想行下街，最後都係只係外圍影幾張相就算。

 

遊覽結束，之後係shopping時間……

 

– Day 5 完 –

 

返回遊記主目錄 >> 2014年環瀨戶內海自駕遊 – 序章

 

↓ 在Google地圖上查看今日行車路線和景點 ↓

 

往年日本關西遊記：

• 2013年日本關西、北陸賞櫻自駕遊
• 2012年京阪之旅
• 2008年秋季京阪神紅葉＋白浜溫泉之旅
• 2007年大阪、京都五天自由行