2015年韓國首爾+釜山賞櫻之旅(Day 4)上 – 釜山掛法櫻花隧道、坐巴士去鎮海

今日係2015年4月1日，係為期十日嘅鎮海軍港節嘅第一日。今次首爾+釜山賞櫻之旅為嘅主要都係去鎮海睇櫻花，所以今日係今次旅程最重要嘅一日。

 

尋日釜山落好大雨，天氣預報今日應該都會有雨落，所以都好擔心今日賞櫻嘅行程去唔去得成。一早起身落床第一件事就係睇下窗外點情況。都OK喎，雖然個天仲係陰陰地，但起碼雨唔大。

 

街上面都仲係濕濕地，但唔擔遮都可以。

 

出發前先食返個早餐先。豬肉湯飯係釜山其中一樣名物，尋晚行BIFF廣場嘅時候已經留意到有間食豬肉湯飯嘅舖頭，今朝早餐就試下。

 

認住門口呢隻豬，要行樓梯落去。

 

味道清清地，都真係幾唔錯，好好味。兩個豬肉湯飯盛惠14,000won，即係7,000won一個。

 

食完早餐開始出發去睇櫻花啦。雖然我哋有KR Pass坐火車唔使再俾錢，但係由於釜山同鎮海之間冇火車直接到，要轉車，再加上火車班次少，坐火車的話既麻煩時間又會用多D。所以我哋採用最直接同方便嘅方法，就係喺沙上嘅西部巴士總站坐巴士去鎮海。而且喺沙上仲有一個好正嘅櫻花隧道，比鎮海嘅櫻花仲要靚，坐車之前可以順道先去睇睇。

 

沙上距離南浦洞比較遠，坐地鐵要喺西面轉一次車，大約要坐40分鐘先去到。

 

去掛法櫻花隧道最近嘅地鐵站出口係3號出口，如果係直接去西部巴士總站，5號出口都可以，亦有地下通道連接巴士總站隔離個商場，穿過商場可以直接入到去西部巴士總站嘅售票廳。

 

到咗韓國三日其實都未真正見到過櫻花，所以今日心情好期待。喺沙上站行出路面，嘩！有櫻華啊。街邊嘅都已經咁靚，櫻花熱點嘅應該唔差啦，總算冇白行。而且個天已經唔再落雨，真係俾足面。

 

嚟到沙上我哋唔係即刻坐巴士去鎮海，而係先去附近嘅掛法站睇櫻花隧道。掛法站係個輕軌車站，由沙上地鐵站3號出口行過去大約700米，行10分鐘就到。如果唔想行路，亦可以係沙上地鐵站旁邊呢個輕軌沙上站坐一個站去掛法站。

 

我哋用腳行去，所以喺3號出口跟住輕軌向西行。

 

沿途會經過西部巴士總站

 

好快就見到掛法站啦

 

從車站下面呢個扶手電梯上去掛法站

 

再沿呢條行人天橋過去

 

喺行人天橋上面望過去已經可以見到馬路中間條步行徑上嘅櫻花啦

 

行人天橋上有樓梯可以行落去步行徑

 

嘩，步行徑兩邊種咗超多櫻花樹，密密麻麻真係好有櫻花隧道Feel。今日應該都算係滿開期，但地下已經開始有D飄咗落嚟嘅櫻花花瓣。呢條步行徑好長，不過望落去每段嘅景都一樣，就係櫻花隧道囉。因為唔係太多人嚟，所以感覺好寧靜，又唔使同人爭位影相。

 

下面係掛法櫻花隧道嘅位置地圖

 

睇完掛法櫻花隧道之後，行返去西部巴士總站坐巴士去鎮海啦。

 

先入去售票大堂買車飛，大人每位只係5,100won。鎮海個英文名係Jin Hae，買車飛果陣用英文拼音講就可以啦。

 

去鎮海嘅巴士喺17嘅泊位，由呢度出去。

 

巴士冇劃位，所以要排隊上車。軍港節期間巴士班次都好密，上唔到車等下一班都好快。

 

順便一提，由西部巴士總站去鎮海嘅巴士會行經掛法櫻花隧道，而櫻花隧道會係巴士右方，所以記得要坐右邊座位，即係上車個門口果邊。

 

Day 4 未完，睇埋Day 4下半Part，或者返回2015年韓國首爾+釜山賞櫻之旅目錄。

 

 

相關文章：

• 住@首爾明洞Loisir Hotel Seoul Myeongdong
• 住@首爾明洞天空花園酒店
• 住@首爾明洞王子酒店
• 住@釜山Hotel Aventree Busan(亞雲樹酒店)
• 首爾明洞酒店推介
• 韓國外國人專用火車通行證KR Pass
• 韓國MobilePOP Pocket WiFi Router使用分享
• 如何網上預約首爾昌德宮秘苑導賞團門票