2015年韓國首爾+釜山賞櫻之旅(Day 4)下 – 鎮海軍港節櫻花祭

由釜山嘅西部巴士總站去鎮海，車程大約個半鐘，沿途嘅公路旁邊種咗好多櫻花樹，而且越接近鎮海密度就越大。入到鎮海，大街小巷所見嘅都係櫻花，真係有D懷疑呢個城市除咗櫻花樹之外，仲有冇種其他樹木？！

先嚟睇下鎮海嘅地圖同埋我哋行程嘅步行路線(藍色線)

巴士喺鎮海巴士總站停車，呢個巴士總站位於鎮海市區最南邊嘅山邊，返去釜山嘅巴士亦喺呢度上車。

落咗車過馬路向北行300幾米就係鎮海軍港節嘅主會場

軍港節期間有穿梭巴士，不過由巴士總站去市中心嘅主會場、帝皇山公園、鎮海火車站同埋余佐川都唔遠，行路都可以，但如果要去慶和火車站甚至長福山公園呢D較遠嘅景點，就一定要坐穿梭巴士啦。

到咗鎮海之後天氣冇今朝行掛法櫻花隧道果陣咁好，天陰陰仲間中落下雨咁。

鎮海真係每條街都係櫻花，成個城市都係賞櫻景點。

行咗冇幾耐見到街上有成排帳篷嘅物體，睇怕呢度應該就係軍港節會場啦。

軍港節會場其實主要就係一條食街，乜都有得食，有正餐當然亦有很多小食啦。

先搵檔坐低食飽個肚先

食完嘢行去鎮海最主要嘅賞櫻景點余佐川，途經右手邊呢度係鎮海郵政局。

再直行300幾米就係鎮海火車站

鎮海火車站細細地，冇乜嘢睇，行入嚟主要係因為呢度有廁所。

車站度停咗架軍港節期間先有嘅櫻花火車，每日上午7點左右由首爾開出，12點幾到鎮海。

余佐川喺鎮海火車站後面，要經過火車站左邊嘅行人隧道過去。

因為係最主要嘅賞櫻熱點，所以呢度超迫人。

余佐川上第一座橋迫滿晒人，完全行唔到埋去。呢度咁多人唔係因為呢個景最靚，而係因為呢度最近入口，D人一嚟到就走晒埋去影相，尤其係旅行團，其實更靚嘅美景係後面，而且余佐川好長，唔使係度迫餐死。

下面係余佐川最近入口呢段嘅相

呢度因為有心形佈景，所以係影相熱點，要埋去影相就要自覺排隊啦。

過咗心形佈景板之後，余佐川上面開始有唔同嘅裝飾，襯托起嚟影相更加靚。

去到後段，會有樓梯可以行落去余佐川河底。

余佐川旁邊嘅馬路亦都設有好多小食檔位

最後俾多兩張櫻花近照嘅大特寫大家睇下

去完余佐川我哋再行返去市中心嘅軍港節會場，目標係會場旁邊嘅帝皇山公園。

上去帝皇山公園可以行樓梯上去，又或者坐小型纜車上去。

坐纜車要排幾個字隊

來回纜車一個人3,000won

從纜車上睇落去會場

帝皇山唔係好高，坐纜車一陣就到。

上山嘅樓梯

其實帝皇山公園冇乜特別，呢度嘅櫻花亦唔係特別靚，唔上去都冇乜損失。

遊完帝皇山公園落返去再掃多一輪街之後，係時候返去啦。

去返中午落車嘅鎮海巴士總站坐巴士

返到釜山今朝上車嘅西部巴士總站，喺售票大堂可以跟住指示牌穿過旁邊嘅商場直接落去地鐵站。

今晚嘅天氣唔錯，BIFF廣場上面嘅小食檔比尋晚都多D。

Day 4 完，返回2015年韓國首爾+釜山賞櫻之旅目錄。

相關文章：

• 住@首爾明洞Loisir Hotel Seoul Myeongdong
• 住@首爾明洞天空花園酒店
• 住@首爾明洞王子酒店
• 住@釜山Hotel Aventree Busan(亞雲樹酒店)
• 首爾明洞酒店推介
• 韓國外國人專用火車通行證KR Pass
• 韓國MobilePOP Pocket WiFi Router使用分享
• 如何網上預約首爾昌德宮秘苑導賞團門票