大阪、京都5天自由行提案：第一次去關西旅遊照著走

文章發表日期：2026-01-14 | 文章分類：日本旅遊攻略 | 作者：Dilbert MO

旅遊教室» 旅遊攻略» 日本旅遊攻略» 大阪、京都5天自由行提案：第一次去關西旅遊照著走

大阪是很多人去日本旅遊的第一個地方，我第一次去日本旅行就是去大阪同京都。對於日本旅遊小白，在計劃第一次大阪自由行時，難免會有點不知從何入手。

第一次去大阪應該去哪些景點？大阪關西空港如何入境？如何從關西機場去大阪市區？大阪旅程應該包括京都行程嗎？

以下就與大家分享我還是日本旅遊小白的時候，第一次大阪自由行的行程和經歷。如果大家第一次去大阪又不想傷腦筋計劃行程，可以進來抄功課啊。

注意：以下文章使用廣東話撰寫。

文章目錄

大阪、京都自由行：5天行程計劃

一、旅遊緣起

早排做野做到悶悶地，好想出去旅行下，咁啱十一國慶有兩日假，仲咁好彩撞正係星期一二添，只要請多兩三日假就有個long vacation啦，啱晒去旅行。咁啱CTM同Air Macau又有promotion，用尊壹會會員卡買大阪package可以減成1千蚊咁著數，於是決定就去大阪囉。

去到旅行社一問，9月30日出發班機原來仲有last兩個位。咁好彩唔去都唔得啦，哈…哈…。之後睇下睇下，原來旅行社自己賣嘅package計落仲抵過用CTM尊壹會會員卡買Air Macau個package，所以最後都係買左東X遊旅行社（個字太深唔識打）個大阪5日4夜package，來回機票加4晚酒店（酒店住心齋橋Cross Hotel包早餐），每人都只係港幣3,899。

不過佢個package就限死左只可以留5日，冇得extend。橫掂自己都只係plan去玩5日，都冇打算再留長d，所以個package啱晒。

二、計劃行程

由於今次決定去旅行嘅時間比較趕，由決定到出發都只得10日時間，所以冇咩時間做詳細嘅planning。買左package之後，第一時間去書店買返本旅遊書先。

不過旅遊書只可以作為到時嘅盲公竹，用黎按圖索驥咁搵d旅遊點，但係對於plan個行程冇咩大幫助。要plan旅遊行程，最方便、可靠、快捷又update嘅方法就係上網睇下人地post出黎嘅資料。

plan行程嘅第一步當然係決定去邊d地方先啦，所以要先睇下旅遊書嘅景點圖片同介紹，又花左一d時間睇網上其他人嘅分享，睇下有邊d值得去。決定左去邊d地方之後，下一步就係將d要去嘅地方串聯起黎，計劃個行程點樣走。

呢個step都幾重要而且又幾煩下架，因為要預計每個地方要花費幾多時間行同玩，同埋要睇埋用咩交通工具去同要花幾多時間到，而且仲要留意景點嘅開放時間，唔係去到摸門丁就唔好啦。

經過幾晚努力之後，今次大阪、京都五天自由行嘅planning終於攪掂，五日嘅行程大致係：

Day 1 – 坐飛機（話就話5日，但係因為飛機中午1點幾先起飛，所以第1日主要係坐飛機。）
Day 2 – 遊覽京都（嵐山、天龍寺、清水寺、祇園、河原町）
Day 3 – 環球影城、梅田
Day 4 – 大阪城、天保山、心齋橋、道頓堀、難波
Day 5 – 黑門市場、堀江、美國村、南船場，坐飛機（好彩回程係夜晚7點機，第5日都仲有6~7個鐘玩）

最後計埋成個行程嘅預算，大致係咁：（用澳門幣計）

機票連酒店Package（因為已經俾左，係實數唔係預算）$8,048
機場稅+燃油附加費（都係已經俾左，係實數唔係預算）$1,180
交通費+入場券 $2,200
Lunch+Dinner+食野 $4,000

兩個人嘅旅費總預算大約係MOP15,428（唔計買野同手信）。

計劃完成，等出發………囉

三、旅程使費

今次去大阪、京都五天自由行，本來諗住唔大出血都小出血架啦，所以唱定左20幾萬円（仲係要係日元高企嘅時候黎唱），除左預算用係交通、入場券同飲飲食食要用約10萬円之外，準備左10幾萬円用黎買野同手信，仲帶埋張卡做後備添。點知……，竟然剩返四分一日元冇洗到，真係失晒預算，希望d日元繼續升啦……。

埋單計數，成個旅程兩個人唔計買野同手信，用左大約澳門幣14,000，平均每人只係用左7千蚊，抵！。

費用項目	預算金額	實際支出
機票連酒店Package	$8,048	$8,048
機場稅+燃油附加費	$1,180	$1,180
交通費+入場券	$2,200	$2,070
Lunch+Dinner+食野	$4,000	$2,570
Total（唔計買野）	$15,428	$13,868

[Note 1]：

交通費+入場券包括：

(1) 機場至大阪難波南海電鐵來回車飛（2,620円 x 2） 5,240円

(2) 來回大阪京都車費（地鐵來回心齋橋至梅田240円 x 2 x 2、阪急電車梅田至嵐山410円 x 2、JR馬堀至京都320円 x 2、京都巴士至清水寺230円 x 2、阪急電車京都至梅田410円 x 2） 3,700円

(3) 嵯峨嵐山小火車、天龍寺、清水寺入場券（[880円+800円+500円] x 2） 4,360円

(4) 大阪周遊卡2日券（2,700円 x 2） 5,400円

(5) 乘搭JR來回梅田至環球影城（170円 x 2 x 2） 680円

(6) 環球影城入場券（5,800円 x 2） 11,600円

(7) 市內的士（新梅田City至堂本町本陣） 1,052円

[Note 2]：

有d小食冇拿發票同冇記低，所以只計個約數。

因為大阪食野冇想像中咁貴，所以實際支出比預算數少左差唔多10%。

大阪、京都5天自由行：每日行程

Day 1 行程：出發去大阪

今日嘅詳細行程：

[10:00](澳門時間)出門口 >>
[10:30]飲茶 >>
[12:00]澳門機場check-in >>
[13:30]飛機起飛 >>
[18:00](日本時間)降落關西空港 >>
[18:30]辦理入境手續 >>
[19:35]乘坐南海電車空港特急至大阪難波車站 >>
[20:11]到達難波，步行到酒店 >>
[20:50]到達酒店check-in >>
[21:30]行道頓堀，食dinner >>
[23:00]返回酒店休息

由於飛機要到中午之後先至起飛，所以可以訓晏d先起身，但因為興奮得滯訓唔著，哈…哈。所以都係起身出去飲茶先。10點半去到金都喜福軒，因為時間尚早所以唔洗等都有位。食到11點9，都係時間出發去機場啦。去到機場，發現機場南北兩個停車場都full晒，好彩兜左一陣係南面停車場終於搵到個車位，如果唔係真係唔知點算好。

泊好架車拖住行李去到離境大樓，即刻搵旅行社領隊攞機票。呢個package係要去到機場佢地職員先會俾張機票你架，領隊仲會同你辦埋登記手續同行李托運，不過返黎果程就要自己攪。

12點3入到候機室冇咩做，於是入去貴賓室度飲下野睇下書仔。等到1點鐘終於上得機，原來班機有兩個日本5天團。飛機係1點半起飛，比原定時間只係遲左5分鐘。

Air Macau橙色飛機，角度唔靚影唔到機身側面

去大阪要坐成三個半鐘飛機，都幾悶下，唯有一邊等食飛機餐一邊睇下本旅遊書解下悶。等左差唔多個半鐘，終於開餐啦。

飛機餐，照燒雞肉飯，幾好味，不過返黎都係食同一味

日本時間下午6點，飛機終於到達關西空港，由於6點鐘已經天黑，所以起係人工島上嘅機場係咩樣都睇唔清楚。落左機等左一陣就攞到行李，再行一陣就到入境counter，不過發現咁大個空港原來只開得3個入境counter，條龍排到好長，好彩早到，只係排左半個鐘就攪掂，後面果d睇怕都要排成鐘先入到境啦。

入左境之後，係詢問處見到第一個kawaii日本小姐，同佢爹左一輪（英文），然後照佢教路去左travel agent個counter買第二日去京都坐嵯峨嵐山小火車10點50分班車嘅車飛。(TIPS：而家可以係網上買定車票，唔洗嘥時間現場排隊買飛。)

跟住係左手邊扶梯上二樓轉右直行去南海電鐵同JR售票處，係JR售票處買埋第三日環球影城嘅入場券，然後去南海電鐵售票處買機場至難波嘅來回車飛。(TIPS：而家我通常會係網上買定南海電鐵車飛，同埋會係網上買日本環球影城入場券。

7點35分坐南海電鐵空港特急去難波，不過架車只得小貓三幾隻，睇怕間公司都係蝕錢多。

南海電鐵空港特急列車，車頭好似鐵人28，好有型

南海電鐵空港特急列車車內

8點10分到達難波車站，出左車站，向心齋橋方向行，一出門口就見到0101大廈，右邊有戎橋筋商店街同南海通商店街，沿住戎橋筋商店街直行，行左大約10分鐘就到左道頓堀。

不過認錯路兜左差唔多20分鐘，最後問人先搵到酒店，原來酒店就係道頓堀傍邊，行去道頓堀只需要1分鐘，行去心齋橋都係1分鐘，行去難波地鐵站2分鐘，行去黑門市場大約15分鐘，行去難波南海車站大約10分鐘。

南海通商店街入口（由南海電鐵難波車站出口望過去）

戎橋筋商店街入口（由南海電鐵難波車站出口望過去）

南海電鐵難波車站，夜景（由戎橋筋商店街望過去）

南海電鐵難波車站，日景（由戎橋筋商店街望過去）

戎橋筋商店街，其實條條商店街都差唔多樣，只係將條街加建左個上蓋，兩邊開晒唔同類型嘅店舖，整個難波-道頓堀-心齋橋購物區就係由呢d有蓋嘅步行街組成

8點50分係酒店check-in，終於入到房。日本嘅酒店房果然係好細，不過裝修得好靚感覺好舒服。

我地住嘅Cross Hotel正門

由酒店望出去嘅御堂筋大街

有興趣睇多D間酒店嘅住評，可以睇下我呢篇大阪Cross Hotel詳細住宿體驗。

欣賞完間房同安頓左行李之後，9點半就落去道頓堀行下同食dinner啦。道頓堀只係好細嘅一條街，主要部分只有百幾米長，不過就集中左好多得意嘅食野同賣野嘅店舖，晚晚都有好多人架。

戎橋，位於戎橋筋商店街、心齋橋商店街、道頓堀的交界處，而家啱啱做緊美化工程，整好之後應該好靚。呢度係睇人嘅好地方，因為唔同類型嘅人都集中晒係呢度，有等緊朋友嘅年青人，有等緊團友嘅旅行團遊客，有成班著晒返工套裝嘅OL同OM，有著住校服同超短裙打扮妖野嘅學生妹，仲有好多著晒黑色西裝好似黑社會嘅人士成晚企係度唔知做咩（單身女士千其唔好一個人行呢度，因為呢d人一見單身女仔行過就會上去唔知同佢講咩，而果d女仔就係咁急急腳走人，唔知係唔係想搵佢地拍AV??）。

道頓堀景一

道頓堀景二

道頓堀景三

赤鬼燒章魚丸，好似好出名，因為好多人排隊買

另一間燒章魚丸，叫做本家，雖然好似街邊檔，不過一樣好多人排隊買

拉麵店出面嘅自動售票機，要食咩先入錢然後按想要嘅拉麵就有張飛出黎，跟住攞俾佢地就可以架啦

呢碗係四天王拉麵嘅拉麵，好大舊叉燒

行完道頓堀，食完燒章魚丸同拉麵就沿住千日前商店街、南海通商店街、戎橋筋商店街兜左個圈，最後返回戎橋，11點就返酒店沖涼休息，完成第一日行程啦。

Day 2 行程：京都一日遊 – 清水寺、嵐山、小火車

今日嘅詳細行程：

[6:00]起身梳洗 >>
[6:45]從酒店出發坐地鐵去梅田阪急車站 >>
[7:51]從梅田阪急車站坐電車去京都嵐山 >>
[8:41]到達嵐山，遊覽嵐山公園、渡月橋、天龍寺、竹林之道 >>
[10:55]坐嵯峨嵐山小火車欣賞嵯峨野風景 >>
[11:15]小火車到達龜岡車站，步行至JR馬堀車站 >>
[11:52]馬堀站乘坐JR火車去京都站 >>
[12:19]到達京都站，食lunch，遊覽京都伊勢丹空中走廊 >>
[13:30]坐巴士去清水寺 >>
[13:45]遊覽清水寺、地主神社、三年坂、二年坂、八坂神社、祇園、花見小路通、河原町 >>
[19:30]食dinner >>
[20:38]坐阪急電車去梅田 >>
[21:22]到達梅田 >>
[21:30]坐地鐵回酒店 >>
[22:00]返回酒店休息

由於今日行程比較緊密，所以6點就起身，跟住連酒店嘅早餐buffet都唔食就係6點9出發去京都啦。

第一次去日本搭地鐵，真係唔係咁識點買飛，攪左一輪先至明白，開頭仲以為要好似香港咁選擇去邊個站先，原來係唔洗架。

買飛嘅步驟係：

(1) 先係自動售票機頭頂個好大嘅路線圖度搵出你要去個站，然後睇下個票價（係大銀碼果個啊，另一個半價果個係小童票）；
(2) 入錢（紙幣或者coin）落去部自動售票機，跟住有幾個按鈕會著左燈（每個按鈕代表不同嘅票價）；
(3) 按下顯示你要買嘅票價嘅按鈕；
(4) 攞飛同攞返找返嘅錢。

其他電車同JR火車嘅買飛步驟都係一樣。

因為唔識買飛，所以原來只需約20分鐘嘅大阪地鐵路程攪左成大半個鐘，7點半左右先去到梅田阪急車站，跟住又搵左一輪買飛嘅地方，終於入到車站等坐7點51分開出嘅特急列車，途中仲買左d面包同三文治做早餐添。

阪急電車，其實同地鐵、JR火車差唔多樣

同搭地鐵一樣，坐阪急電車或者JR火車唔洗指定買邊班車，買左飛入到月台有車就可以上。不過要留意，有d車係站站停，叫普通車，而有d車只停大站，係快車，有好多種，例如通勤特急、快速急行、準急行等等。

普通車比快車慢好多，例如由梅田去桂站，普通車要1個鐘，而快車只需要36分鐘，差唔多快一倍，所以上車前記得睇清楚，搵架快車黎坐。

由梅田去嵐山冇直通車，要先坐阪急京都本線去桂站，然後轉嵐山線去嵐山，全程大約45分鐘（坐快車，唔計等車時間）。其實去嵐山仲可以選擇坐JR火車去京都站，然後由京都站坐JR火車去嵐山，時間加埋都係大約45分鐘，不過票價比坐阪急電車貴一倍有多（470円）。

如果想慳錢，可以買阪急一日券，計落比每次單買平。

阪急電車桂站月台，趁未有車黎係呢度食埋個三文治早餐

大約8點8左右終於到達嵐山車站，一落車感覺空氣好清新，好正！

阪急電車嵐山站

出左嵐山站直行大約10分鐘就到嵐山公園，周圍風景好靚，唔識點形容，大家睇相啦。

嵐山公園兩傍嘅櫻花樹，可惜唔係櫻花季節

嵐山公園內山村小溪

大堰川

大堰川，前面係渡月橋

嵐山公園，前面係渡月橋

渡月橋，原來行得車架

渡月橋近鏡

嵐山街頭

京都人力車

人力車夫，個個都好有型靚仔架，女士一定好冧

穿過嵐山公園再過埋渡月橋，向前行就係世界文化遺產之一嘅天龍寺。入面風景同建築好靚，特別係中間個水池，好優雅，大家繼續睇相啦。

天龍寺入口

天龍寺入面

天龍寺法堂，入去要除鞋換拖鞋

天龍寺法堂入面

天龍寺法堂傍邊水池

天龍寺法堂傍邊水池，如果係紅葉季節坐係度欣賞紅葉一定好正

天龍寺內堂

穿過天龍寺內堂，好快就到左北門出口。出左北門，左手邊就係有名嘅竹林之道。再走過竹林，行5分鐘就到嵯峨小火車嘅嵐山站。

竹林之道

常寂光寺，係小火車嵐山站附近，因時間關係只係門口影兩張相就走

常寂光寺

嵯峨小火車嵐山站

遊覽嵐山公園、渡月橋、天龍寺、竹林加埋大約要用2個鐘時間，去到嵯峨小火車嘅嵐山站啱啱好係10點9左右，去埋洗手間等車就啱啱好。

嵯峨小火車行走嵯峨站至龜岡站之間，全程要25分鐘，你可以由嵯峨站坐到龜岡站落車，亦可以倒轉由龜岡站坐去嵯峨站，視乎你嘅行程安排同買到邊班車車飛。

嵐山站係小火車從嵯峨站出發後嘅第二個站，因為遊覽完天龍寺同竹林之後可以順路黎到呢度，所以係呢度上車就最啱，而且嵯峨站至嵐山站之間冇咩風景睇。

10點55分，小火車到站上車啦。

小火車黎啦

坐嵯峨小火車同係台北瑞芳坐小火車去十分好相似，都係一邊係山一邊係溪流，不過係嵯峨野嘅風景就靚好多啦。

山下溪流

中途嘅車站

嵯峨野除左坐小火車之外，仲可以坐船漂流，沿途見有好多架船，好似好正，不過要用成兩個鐘先漂玩，唔夠時間玩，下次去再玩呢樣

沿途風景

車廂內，企係度個kawaii日本妹妹仔係幫人影相架，不過唔知幾錢張，如果佢問你你可以唔影嘅；仲有前面開車個車長沿途會一路唱d日本歌，好過引架，聽講佢好出名架，同埋好多電視台都訪問過佢

11點3小火車終於到達終點站龜岡，呢度好似係農村，周圍好多田。出左車站照指示牌行去JR馬堀車站，大約行10~15分鐘就到。由於馬堀唔係大站，所以火車班次唔係咁多，要等到11點52分先有車去京都站，而且只係普通車，要坐差唔多半個鐘先到。

12點4左右終於到左京都站，跟住先去10樓嘅京都拉麵小路醫醫肚。

京都站入面

京都站出面

京都拉麵小路

揀左一輪最後食左呢間（見最多人排隊）

兩大碗拉麵，分別係800円同850円，d蛋好好味，但雲吞就唔係好掂

食完野再係京都站入面個伊勢丹空中走廊行左一陣，不過冇咩好睇，跟住1點半左右就係車站門口度個巴士站坐100號巴士去清水寺，由京都站去清水寺坐左3個字車（因為好多紅綠燈，等轉燈都用左一半時間）。

坐巴士單程一律收費220円，上車前要準備好散銀，到站落車就放入收銀箱。如果冇散銀都唔緊要，車上有部自動唱錢機，放入紙幣就會同你唱散佢架啦。

因為今次係京都計劃只會坐一至兩程車，所以冇買pass，如果有打算係京都市內去多個景點，而且需要坐多程巴士嘅話，可以係巴士站個售票處買張巴士1日券，售價500円。

1點9左右巴士到左五條坂站，按鐘俾錢落車（車上有顯示下一站名稱，而且呢個站好多人落）。跟住行返轉頭去到個十字路口，見到對面有牌寫住清水寺，過馬路直上斜路就係。其實清水寺附近嘅指示牌唔係太清楚，好多分叉路口都冇指示牌，所以最好揸住地圖對準方向行就穩陣d。

由巴士站行斜路上去清水去都行左成3個字

去京都有唔少女遊客鍾意試下著住和服去參拜

清水寺入口

清水寺入面

清水寺本堂

地主神社

地主神社入面嘅戀占之石，好多日本學生妹玩

音羽之滝，去清水寺必飲

清水寺大約行左兩個鐘，3點9左右離開清水寺之後，沿清水坂、三年坂、二年坂行去八坂神社，沿途有好多店舖好多野睇同好多野買，大約行左一個鐘多d。

清水寺對出嘅清水坂

三年坂（產寧坂）

八坂神社側門

5點左右離開八坂神社，一出正門就係祇園嘅四條通大街，然後行去花見小路通（由八坂神社正門向前行左手面第一條街，百年面油紙王對面）睇下有冇藝妓，可能太早冇咩野睇。

跟住係祇園行行下，見有間叫茶寮都路里嘅舖頭好多人排隊，見d綠茶雪糕好似好好味，於是又排埋一份，不過食落唔好味嘅，最後連相都冇影。

跟住再行多陣，去到四條大橋附近見對面有好多人排隊，行過去睇下原來係排隊買燒丸子，於是又排埋一份，不過埋到去佢好似用日文問要咩醬，今次冇野可以指唔識點溝通，好彩最後總算買到幾串熱辣辣嘅串燒小丸子黎試下，真係幾好味，不過貴左d。

祇園（由八坂神社正門影過去）

花見小路通

偷影到藝妓

祇園一段

好多人排隊買燒小丸子，不過好似全部都係日本人

燒緊嘅小丸子，好好味

從祇園過左四條大橋之後就係京都嘅商業中心區河原町，只係一河之隔但係呢度嘅繁華同對岸祇園至清水寺一帶嘅古色古香有好大分別。

呢區只係去左河原町通同新京極通附近行下買下野，其實同心齋橋冇咩分別。行行下都唔係咁想行，於是到7點半左右去左旅遊書介紹嘅魚心壽司食King-sized壽司，原來都唔係好貴，食飽飽都係3千幾円。

好大舊鰻魚壽司

蝦壽司

原本計劃係京都玩到10點先返大阪，但係見河原町冇咩好行，於是食完壽司就決定走人。本來諗住係京都站坐JR火車返梅田，不過行行下發現原來河原町係阪急電車京都嘅總站，雖然行車時間耐d，不過唔洗坐車去京都站轉車咁麻煩，所以最後決定係河原町直接坐阪急電車返去梅田。

入到月台，最快班車係8點38分嘅快速急行，用左45分鐘就返到梅田，然後轉地鐵去難波站，10點返到酒店，跟住沖涼休息，完成第二日行程啦。

Day 3 行程：大阪環球影城、梅田藍天大廈空中庭園展望台

今日嘅詳細行程：

[7:15]起身梳洗 >>
[8:15]酒店早餐buffet >>
[8:45]從酒店出發，坐地鐵到梅田再轉JR去環球影城 >>
[10:00]到達環球影城，玩、玩、玩 >>
[17:00]離開環球影城，回酒店 >>
[17:50]回到酒店小休 >>
[19:00]從酒店出發，坐地鐵去梅田 >>
[19:20]行梅田阪急百貨、阪神百貨 >>
[20:30]上新梅田City空中庭園展望台睇夜景 >>
[21:30]堂山町本陣食和牛 >>
[22:30]坐地鐵回酒店 >>
[23:00]返回酒店休息

今日主要去日本環球影城，由於環球影城今日開10點，所以訓晏小小先起身。因為酒店房包早餐，當然食埋早餐先出發啦。早餐冇咩特別野食，不過我覺得佢個味噌湯幾好飲。

食完早餐8點9出發，不過搭地鐵之前先要買左張大阪周遊卡2日券先。

大阪周遊卡最啱係大阪市內遊覽用，有1日券同2日券兩種，分別賣2,000円同2,700円(而家已經漲到3,500同5,000)，張卡除左可以係1日或2日內任搭大阪範圍嘅地鐵、巴士同電車之外，仲可以免費進入24個收費景點。如果打算去大阪幾個主要景點遊覽，買周遊卡幾著數架。

本來想係機場買，不過問過冇，2日券要到市區嘅遊客指南中心先有得賣。但早兩日分別係難波同梅田嘅地鐵站搵過都搵唔到呢個遊客指南中心，所以今日早少少去難波地鐵站再搵下。

最後問左市內交通局咨詢中心（差唔多係咁嘅名），先搵到位於難波嘅遊客指南中心，呢個中心嘅位置都真係幾偏僻，唔問人真係冇辦法搵得到。個中心開8點，不過唔記得左幾點close。而家要買就方便好多，可以網上係Klook買，仲有9折，而且係電子卡唔洗嘥時間去換實體卡。

買左大阪周遊卡2日券之後，即刻用黎搭地鐵去梅田，去到梅田照指示行去JR車站。由於大阪周遊卡唔可以用黎搭JR火車，所以要另外買飛，由梅田搭JR環狀線到西九條再轉櫻島線到環球城站。出左車站跟住人群行幾分鐘就到左環球影城大門口，啱啱好10點鐘到達。

行駛櫻島線嘅JR列車

見到環球影城大門口

環球影城標誌

好萊塢美夢.乘車遊

環球影城入面

等睇表演

萬聖節表演

大白鯊

大白鯊探險船

未來水世界

侏羅紀公園.乘船遊

由於小弟一向對於機動遊戲都唔係咁有興趣，而且對於有離心力既遊戲更加有d恐懼感，所以係環球影城都冇咩點玩，只係睇左史力加4D電影、未來水世界，同埋坐左大白鯊探險船，蜘蛛俠、回到未來、E.T.、侏羅紀公園呢d通通都冇玩到。

不過因為人太多，玩左幾樣野同買完d手信都已經差唔多5點。於是坐返JR火車返梅田，跟住轉地鐵返酒店。

7點10左右返到酒店，先沖個涼休息左一陣，大約7點左右再坐地鐵去返梅田，先去阪急百貨同阪神百貨行左一陣，主要係去搵下Burberry Blue Label專櫃，不過睇唔啱款冇買到。跟住係8點半左右行去新梅田City，準備上空中庭園展望台睇下大阪夜景。

梅田，影得好差

新梅田City離開梅田地鐵站都幾遠，而且由地鐵站去果度，d指示都好唔清楚，唔知點行去。原來行去新梅田City，要先行出大街，然後向住新梅田City（座大廈係最高，好易搵到）嘅方向行，行行下會覺得好偏僻，好多空置地盤。

跟住係個路口有左右兩條路，其實兩條都去得，不過轉右行會近d。轉右行一陣之後會見到有人從左手邊條路仔行出黎，行入條路仔冇幾耐會發現有條地下行人隧道，入左條隧道一直行，出黎就係新梅田City。

果日因為唔識行，搵左好耐，行左超過半個鐘，仲行到身水身汗先去到。去到發現好偏僻，人都唔多個，上到去都冇咩遊客，風又大，夜景又唔靚，個空中庭園展望台設計好似大廈天台，唔係咁啱用黎觀景囉。於是求其影返兩張相就走人，好彩用大阪周遊卡上去唔洗俾錢。如果要買飛，可以上Klook買。

從新梅田City空中庭園展望台睇大阪夜景，大阪夜景完全唔靚

9點半左右離開新梅田City，由於唔想再行咁遠返去，而且又唔識點搵想去嘅果間食野嘅舖頭，所以用左1千円坐左一程的士。

今晚打算去食dinner嘅地方係新假期雜誌介紹嘅大阪超人氣平靚正A5和牛食店，叫堂山町本陣，不過間嘢而家已經執咗。

上左的士，俾左間食店嘅名俾個的士阿伯睇，再俾埋地址同地圖，但佢都唔識點去，最後佢打電話去間食店問，傾左一輪終於識去。原來間野係橫街度，唔識路真係唔識得去。入到去好似好full，要等位，個侍應仲再三講明唔可以食超過兩個鐘。

等左一陣終於有位，入去要除鞋換拖鞋，仲俾左間獨立房我地，隔離仲有個好似日本式園藝咁嘅空間，好有feel。

睇左一輪manual，因為唔識d日文講咩，最後睇圖片點左一set六件嘅上等A5和牛，再點多set雜錦就算。

食到中間先記得影相，左邊係A5和牛，右邊係樣樣都有d嘅雜錦

網燒和牛

食到10點半，唔洗一個鐘就食完，食到好飽，埋單都係8,800円，真係好抵。臨走時想係門口影返張相紀念，個老細竟然攞左佢舖頭嘅招牌俾我地揸住黎影，真係識賣廣告，不過我唔會post出黎架……

跟住問埋佢地點去地鐵站，之後行一段路冇幾耐就到地鐵站坐地鐵返酒店。11點返到酒店，跟住沖涼休息，完成第三日行程啦。

Day 4 行程：遊覽大阪城、天保山，心齋橋、道頓堀、難波Shopping

今日嘅詳細行程：

[7:30]起身梳洗 >>
[8:20]酒店早餐buffet >>
[9:00]從酒店出發，坐地鐵去大阪城 >>
[9:20]遊覽大阪城>>
[11:00]坐地鐵去天保山 >>
[11:30]遊覽天保山一帶 >>
[12:00]乘坐聖瑪麗亞號遊船遊覽大阪港 >>
[13:00]坐地鐵去黑門市場 >>
[13:30]遊覽黑門市場 >>
[14:20]食lunch >>
[14:50]難波高島屋百貨shopping >>
[16:00]回酒店小休 >>
[17:00]心齋橋shopping >>
[18:50]食dinner >>
[20:00]道頓堀一帶shopping買手信 >>
[22:00]返回酒店休息

今日嘅行程主要係去大阪城、天保山，同埋去難波至心齋橋一帶行街買野。今日係大阪市內遊覽，交通同景點入場券使用大阪周遊卡2日券，唔洗另外再俾錢。

7點半起身梳洗完之後，8點4就去食早餐，然後9點左右坐地鐵去大阪城。從難波坐地鐵去大阪城要轉一次車，去到谷町四丁目站落車，大約15分鐘就到。

我覺得從谷町四丁目站行去大阪城最好，因為可以經過大手門、多聞櫓呢d主要景點，而且路程都唔遠，大約行5分鐘就到大阪城外面，再行多10分鐘就可以入到去天守閣，如果一邊行一邊影下相就當然唔止10分鐘啦。

大阪城係豐臣秀吉建造嘅城堡，相信“信長之野望”同“太閣立志傳”呢兩隻game嘅fans一定唔會陌生。原來大阪城都有唔少遊客去，除左日本人之外，仲有好多大陸、台灣同香港嘅旅行團。

大阪城遠望

大阪城護城河

大阪城大手門

大阪城櫻門

大阪城天守閣

天守閣入口

大阪城入面嘅小火車，好似同大阪城有d格格不入

係大阪城內逗留左大約一個鐘，11點左右就坐地鐵去天保山（地鐵大阪港站）。

天保山係大阪嘅港口位置，主要有海遊館同世界其中一個最大嘅摩天輪大觀覽車。不過plan行程果陣睇左d資料，覺得海遊館同曼谷嘅海洋館、台灣墾丁嘅海洋生物館差唔多，所以決定唔去，而至於大觀覽車，因為有d畏高，而且又唔見有人玩，所以都冇玩到。

11點半去到天保山，街上冇咩人，好冷清，只係海遊館有幾班學生係度旅行。去到日本，發現個個旅遊景點都有好多著住校服嘅學生，上至中學下至幼稚園學生都有。睇黎係日本做學生都真係幾爽，可以係返學時間成班同學去旅行。

天保山街頭

海遊館外面

今次去天保山，主要係去坐下佢隻聖瑪麗亞號遊船遊覽一下大阪港，因為齋坐呢隻船要成1,500円，但係用大阪周遊卡就可以免費，心諗超抵冇理由唔坐架。

12點上船起航，但係加埋都唔夠10個乘客，隻船係大阪港兜左一個圈，但係冇野睇嘅，搵笨嘅，上次係高雄坐船遊高雄港又係咁，今次又係，發誓以後都唔坐船遊港口。

呢隻就係聖瑪麗亞號

從船上影大觀覽車

12點10終於遊完船河，跟住去左隔離個Market Palace度睇下同食下小食雪糕，之後行返地鐵站坐車去黑門市場。

1點半左右到左地鐵日本橋站，一出去就係黑門市場。唔記得係邊個討論區睇過有人話係黑門市場可以買左魚生之後有地方坐低食，不過去到發現原來冇架，而且d魚生又唔新鮮，生果都唔係多（可能唔當灶瓜），所以最後只係用700円買左兩個桃準備今晚返酒店食，之後就行過去難波搵野食。

黑門市場

黑門市場，好多唔同款式嘅壽司

黑門市場，生果舖

2點4左右，係南海通商店街見到間元祿壽司好多人食，好肚餓於是入左去食回轉壽司，d壽司只係130円一碟，而且好好味，抵食。

食飽之後就行左過去難波車站上面嘅高島屋百貨shopping，今次終於係Burberry Blue Label專櫃度買到手袋，跟住又去Agnes b專櫃買埋，又買左一d其他野，跟住就上7樓辦理退稅。

要有得退稅一定要係同一日係同一間百貨公司買滿10,000円以上，退稅時要出示passport同填form。不過記住化妝品係冇得退稅架，如果要買名牌化妝品，都係留返係機場免稅店先買，平一大截。

買完野先攞左返酒店，同埋休息左一陣，之後5點左右又出去心齋橋一帶shopping。原來心齋橋商店街好長架，行極都行唔完，不過沿住心齋橋越向北行，遊客就會越少，d野亦都會越平，不過就要睇你有冇心機同腳力行啦。我就冇咩啦，所以行左一半就折返轉頭去返道頓堀食dinner。

今晚係係大阪last一晚，所以去左道頓堀果間蟹道樂（即係有個紅色巨蟹標誌果間）食網燒蟹。食左5千幾円，不過覺得一般，可能自己唔識點燒。

食完dinner之後又返酒店放低之前係心齋橋買左嘅野，因為酒店就係附近，可以隨時上去好方便。跟住再係道頓堀同心齋橋附近要買下手信。10點鐘左右，好多店舖都關門冇地方好行，於是返酒店沖涼休息，完成第四日行程啦。

Klook.com

Day 5 行程：黑門市場、堀江、美國村、南船場繼續買，再見大阪

今日嘅詳細行程：

[7:30]起身梳洗 >>
[8:30]酒店早餐buffet >>
[9:00]行黑門市場、道具屋筋 >>
[11:15]返回酒店 >>
[11:45]酒店check-out >>
[11:50]行堀江、美國村 >>
[13:45]食lunch、行心齋橋 >>
[15:00]回酒店取行李，去難波車站 >>
[16:00]坐南海電車空港特急去關西空港 >>
[17:10]飛機check-in >>
[17:30]出境手續，免稅店shopping >>
[19:35]乘坐澳航飛機回澳門 >>
[22:00]（澳門時間）到達澳門，旅程完滿結束

話咁快五日旅程終於到左last day，朝早一樣又係7點半起身，8點半食早餐。9點左右過去黑門市場再行下，因為諗住朝早d野會多d同新鮮d，而且咁早其他舖頭仲未開，只可以行下街市。去到見到好多師奶係度買餸同買生果，最後我地都買左d桃同栗子帶返澳門。

難波附近街道，朝早冇咩人

朝早嘅黑門市場

朝早嘅生果好似多d

有好多燒好嘅魚賣

行完黑門市場順路行過去千日前專門賣廚房用具嘅道具屋筋行下，不過冇咩好睇，d野又唔靚。然後慢慢行返酒店，途中順便買左幾盒大阪名物吉本人形燒做手信。

千日前道具屋筋

吉本人形燒

11點3返到酒店拾埋行李，11點9就check-out同埋將行李寄存係酒店度。然後行去附近嘅堀江，不過果度冇咩人，而且d舖頭賣嘅野唔係咁啱睇。跟住順路再行過去美國村，不過d野啱d年青人多d，唔係咁啱我。本來打算去埋南船場，不過見堀江同美國村都冇咩好行，估計南船場都會一樣，所以只係兜左個圈影左幾張相，之後就行返過去心齋橋。

行去堀江嘅路上

呢度就係堀江，冇咩人

美國村，三角公園

行到大約1點9左右，去左間回轉壽司食dinner，今次唔係元祿，係另一間不過唔知叫咩名。食完野再係附近嘅藥房最後掃一輪貨，大約3點就返酒店攞返行李行去難波車站坐南海電車去機場。

因為黎果陣已經買左南海電車空港特急係今日4點嘅回程飛，所以4點前去到車站等車。4點鐘火車準時開出，要同大阪講bye bye啦。

火車係4點7就到左關西空港，但係航空公司要5點之後先有得check-in，不過去到已經有好多人係度排隊等check-in。5點半前攪掂check-in，即刻去海關counter出境，然後揸緊時間係免稅店度買野。原來免稅店度d野平過出面好多，特別係化妝品，手信都平過出面，所以最後再買多幾樣手信先去等上機。

機場離境大堂