2007年大阪、京都五天自由行（Day 3–环球影城）

行程：（10月2日，天晴，气温27度）

[7:15]起身梳洗 >> [8:15]酒店早餐buffet >> [8:45]从酒店出发，坐地铁到梅田再转JR去环球影城 >> [10:00]到达环球影城，玩、玩、玩 >> [17:00]离开环球影城，回酒店 >> [17:50]回到酒店小休 >> [19:00]从酒店出发，坐地铁去梅田 >> [19:20]行梅田阪急百货、阪神百货 >> [20:30]上新梅田City空中庭园展望台睇夜景 >> [21:30]堂山町本阵食和牛 >> [22:30]坐地铁回酒店 >> [23:00]返回酒店休息

——————–

今日主要去环球影城，由于环球影城今日开10点，所以训晏小小先起身。因为酒店房包早餐，当然食埋早餐先出发啦。早餐冇咩特别野食，不过我觉得佢个味噌汤几好饮。

食完早餐8点9出发，不过搭地铁之前先要买左张大阪周游卡2日券先。

大阪周游卡最啱系大阪市内游览用，有1日券同2日券两种，分别卖2,000円同2,700円，张卡除左可以系1日或2日内任搭大阪范围嘅地铁、巴士同电车之外，仲可以免费进入24个收费景点。如果打算去大阪几个主要景点游览，买周游卡几着数架。

本来想系机场买，不过问过冇，2日券要到市区嘅游客指南中心先有得卖。但早两日分别系难波同梅田嘅地铁站揾过都揾唔到呢个游客指南中心，所以今日早少少去难波地铁站再揾下。最后问左市内交通局咨询中心（差唔多系咁嘅名），先揾到位于难波嘅游客指南中心，呢个中心嘅位置都真系几偏僻，唔问人真系冇办法揾得到。个中心开8点，不过唔记得左几点close。

买左大阪周游卡2日券之后，即刻用黎搭地铁去梅田，去到梅田照指示行去JR车站。由于大阪周游卡唔可以用黎搭JR火车，所以要另外买飞，由梅田搭JR环状线到西九条再转樱岛线到环球城站。出左车站跟住人群行几分钟就到左环球影城大门口，啱啱好10点钟到达。

行驶樱岛线嘅JR列车

见到环球影城大门口

环球影城标志

好莱坞美梦.乘车游

环球影城入面

等睇表演

万圣节表演

大白鲨

大白鲨探险船

未来水世界

侏罗纪公园.乘船游

由于小弟一向对于机动游戏都唔系咁有兴趣，而且对于有离心力既游戏更加有d恐惧感，所以系环球影城都冇咩点玩，只系睇左史力加4D电影、未来水世界，同埋坐左大白鲨探险船，蜘蛛侠、回到未来、E.T.、侏罗纪公园呢d通通都冇玩到。

不过因为人太多，玩左几样野同买完d手信都已经差唔多5点。于是坐返JR火车返梅田，跟住转地铁返酒店。

7点10左右返到酒店，先冲个凉休息左一阵，大约7点左右再坐地铁去返梅田，先去阪急百货同阪神百货行左一阵，主要系去揾下Burberry Blue Label专柜，不过睇唔啱款冇买到。跟住系8点半左右行去新梅田City，准备上空中庭园展望台睇下大阪夜景。

梅田，影得好差

新梅田City离开梅田地铁站都几远，而且由地铁站去果度，d指示都好唔清楚，唔知点行去。原来行去新梅田City，要先行出大街，然后向住新梅田City（座大厦系最高，好易揾到）嘅方向行，行行下会觉得好偏僻，好多空置地盘。跟住系个路口有左右两条路，其实两条都去得，不过转右行会近d。转右行一阵之后会见到有人从左手边条路仔行出黎，行入条路仔冇几耐会发现有条地下行人隧道，入左条隧道一直行，出黎就系新梅田City。

果日因为唔识行，揾左好耐，行左超过半个钟，仲行到身水身汗先去到。去到发现好偏僻，人都唔多个，上到去都冇咩游客，风又大，夜景又唔靓，个设计好似大厦天台，唔系咁啱用黎观景囉。于是求其影返两张相就走人，好彩用大阪周游卡上去唔洗俾钱。

从新梅田City空中庭园展望台睇大阪夜景，大阪夜景完全唔靓

9点半左右离开新梅田City，由于唔想再行咁远返去，而且又唔识点揾想去嘅果间食野嘅舖头，所以用左1千円坐左一程的士。今晚打算去食dinner嘅地方系新假期杂志介绍嘅大阪超人气平靓正A5和牛食店，叫堂山町本阵。上左的士，俾左间食店嘅名俾个的士阿伯睇，再俾埋地址同地图，但佢都唔识点去，最后佢打电话去间食店问，倾左一轮终于识去。原来间野系横街度，唔识路真系唔识得去。入到去好似好full，要等位，个侍应仲再三讲明唔可以食超过两个钟。

等左一阵终于有位，入去要除鞋换拖鞋，仲俾左间独立房我地，隔离仲有个好似日本式园艺咁嘅空间，好有feel。

睇左一轮manual，因为唔识d日文讲咩，最后睇图片点左一set六件嘅上等A5和牛，再点多set杂锦就算。

食到中间先记得影相，左边系A5和牛，右边系样样都有d嘅杂锦

网烧和牛

食到10点半，唔洗一个钟就食完，食到好饱，埋单都系8,800円，真系好抵。临走时想系门口影返张相纪念，个老细竟然攞左佢舖头嘅招牌俾我地揸住黎影，真系识卖广告，不过我唔会post出黎架……

跟住问埋佢地点去地铁站，之后行一段路冇几耐就到地铁站坐地铁返酒店。11点返到酒店，跟住冲凉休息，完成第三日行程啦。