2008年秋季京阪神红叶+白浜温泉之旅(第一天)

20081125
澳门 >> 关西空港 >> 大阪格兰比亚酒店

 
今次系第四次到日本,亦系第二次到关西,选择再去关西其中一个原因当然系因为澳门有机直飞,比起要拖住行李经香港飞真系方便好多架,另外亦都系由于上次去关西唔系红叶季节,所以都希望可以再到京都感受一下佢系红叶衬托底下既美景。

 
由于日元高企,今次去关西比起上次真系贵左唔少,记得上次去关西时仲系兑紧6.7,而今次换钱平均都要8.1,贵左足足20%有多。另外,由于出发时仲系收紧高油价时既燃油附加费,所以燃油附加费连机场税都比上次贵左一大截,总之加加埋埋今次都算系一次贵价既旅程。

 
今次去旅行冇咁好心机好似以前咁分类计算每日开支,只系粗略计算,8日7夜两个人洗左大约HK$35,000,主要开支包括:机票(包括燃油附加费、机场税+酒店(包括温泉酒店)HK$16,550交通(包括两日租车费用)HK$3,450吃喝玩乐连购物HK$15,000

 
费话唔多讲啦,先黎介绍一下第一日既行程先。

 
其实第一日都冇咩行程可讲,因为飞机下午3点钟先从澳门起飞,所以第一日基本上只系坐飞机。

 
我地大约1点半左右去到机场check-in,问过澳航柜台人员原来回程机位要做re-confirm架,不过可以即时系澳门机场counter做,就系check-in柜台对面既counter。好快咁check-in完,又re-confirm好回程机位之后,就入闸去机场贵宾室食下野等上机囉。

 
机场贵宾室,有VISA金卡就入得去,完全免费架

IMG_1436_resize

 
可能系受金融海啸影响,机场候机室入面冇咩人,呢几年来真系第一次见到咁既场面㖞。

 
冇乜人既机场候机室

IMG_1438_resize

 

飞机好准时系3点起飞,全机除左我地两个人同埋有一团旅行团之外,其他乘客好似全部都系日本人,难怪机上广播都以日文为主啦,如果唔系架机咁细,真系以为坐紧全日空。
 

冇咩惊喜既飞机餐

IMG_1443_resize

 

飞左3个钟多DD飞机系日本时间7点几就降落关西空港啦,可能同样受金融海啸影响,关西空港亦冇咩外国人入境,话咁快就过左海关,攞埋行李就先去JR Counter买嵯峨小火车车飞同埋去姬路城果日既JR West Rail Pass。

 
原来JR West Rail Pass要系买既时候填上使用日期,因为未最后确定会系边日去姬路城,所以都系决定等去果日先系大阪駅JR Counter买,至于嵯峨小火车车飞,本来打算11月26日 去,点知原来果日星期三小火车休息,所以改为27日先去坐,因为红叶季节,D座位都差唔多full晒,不过好彩都仲可以买到11:50由岚山开出既坐位车飞。

 
买完小火车车飞,再买埋JR关空快速车飞,时间都差唔多8点15分,啱啱好赶得切坐8:32班车。原来关空快速真系名不符实,因为架车差不多站站停,唔怪得要用成70分钟先去到梅田啦,而且架车同普通电车咁,完全冇行李位俾人放大件行李架,只可以将行李喼放系侧边,架车行驶中全程都要用手扶实个喼,以防佢碌走,而且又怕阻住其他人行,真系好唔方便,所以如果各位下次住梅田,建议你最好唔好坐JR,因为坐JR去真系几麻烦,去到大阪駅仲要拎住行李行好多楼梯先出到去架,所以坐机场巴士会好D,虽然巴士要1,300円,比JR贵少少

 
JR关空快速车飞

IMG_1457_resize
JR关空快速车厢 

IMG_1456_resize

 
挨左70分钟火车,终于系9点40分到达酒店,比原来预计时间早左。

 
今次系大阪住既酒店系大阪格兰比亚酒店,就系正JR大阪駅上面,一出JR大阪駅中央口转右直去就系,间酒店系通过egl book,总共book左六晚,除左中间11月28日 果晚去白浜之外,其他日子都住同一酒店,方便唔洗搬行李。

 
大阪格兰比亚酒店门口 

酒店

由于今次旅程计划会去大阪周边既多个唔同地方,觉得住梅田会比较方便坐车,所以选择酒店时都集中揾梅田既酒店,不过睇左好多酒店既相片都觉得麻麻,最后都系选择左格兰比亚,因为睇相似乎比较干净企理,可惜入左房真系好失望。间房细本来已经预左,但系原来间酒店已经好旧,地毯同墙身都有好多污渍,个洗手间颜色又太沉,完全冇乜生气,当时真系好怀念上次住果间Cross Hotel

 
虽然话住梅田会比较方便坐车去其他地方,但其实系大阪选择住难波至心斋桥一带会好好多,原因有几个:第一,难波至心斋桥一带系shopping热点,买野方便又热闹,如果住附近可以方便买完野放返酒店唔洗攞住行街;第二,难波至心斋桥一带有好多食店,揾野食方便又多选择;第三,由机场去难波坐既南海电铁速度快好多,只需要40分钟就到,而且车飞只需要890円,真系又平又快,而且车厢入面有位置放大件行李。我们今次住系梅田,但前前后后都去左心斋桥4次咁多,早知住返心斋桥一带好过啦。

 
位于难波道顿崛桥傍边既Cross Hotel系小弟系日本第一次住既酒店,间酒店同同级酒店比较真系好唔错,可惜今次去因为fullbook唔到呢间酒店,另外今次发现其实系难波有间叫Namba Oriental既酒店都唔错,呢间酒店位于千日前,由南海电铁难波站行去唔洗5分钟就到,而且周围又系有盖步行街,无论去心斋桥、道顿崛同黑门市场都好近。

 
再讲返行程,我地系酒店check-in完就出去食dinner,其实系梅田阪急駅、阪神駅同Hep Five周围都有好多条小巷有唔少食店,而且到好夜都仲有好多人。

 
第一晚既晚餐就系Hep Five侧边横街既呢间拉面店食 

梅田附近拉面店

 
味道唔错既啦面,不过日本D云吞就麻麻 

拉面

 
返酒店前系自动售卖机买左罐栗米(120円),又系酒店饼店买杯布丁做宵夜 

IMG_1492_resize

如果喜欢这篇文章,请点个“赞”吧!

发布留言

发布留言必须填写的电子邮件地址不会公开。

收到您的留言后,小弟会尽快回复,您可以Bookmark本篇文章,方便之后回来查看回复。回答您留言所查询的问题有时候需要一些时间研究,请耐心等待。另外,如果您还未赞好过本Blog Facebook专页,可以请给我一个讃吗?!就当作是我花时间和精神解答您问题的一点支持吧。谢谢!

如果喜欢这篇文章,请点个“赞”吧!