2009年台北自由行 (Day 4 – A) – 九份

今日嘅行程主要系去九份同埋基隆夜市，九份上次有去过，不过基隆夜市就系未去过嘅新景点。朝早起身之后先去西门町嘅鸭肉扁食早餐。

食完早餐先去台北车站买去瑞芳嘅火车飞，因为中午12点先有自强号列车去瑞芳，所以仲有时间系台北车站上面新开嘅微风台北车站(商场)行下。

行到咁上下时间可以去等火车啦. . . . .

坐自强号由台北车站去瑞芳只系需要45分钟时间，因为上次黎过，所以出左车站好熟路咁行过对面马路巴士站等巴士。系瑞芳度有一D只系本地人先可以坐嘅免费小巴，游客唔坐得架。去九份嘅巴士系大巴黎架，由基隆开出去金瓜石或者九份方向嘅巴士就上啦。因为瑞芳属于基隆市范围，台北嘅悠游卡系呢度唔用得，所以记得准备定散纸，不过唔记得巴士费系几多。

同上次经验一样，基隆嘅巴士司机好狼死，由瑞芳上九份全程山路，弯多路窄，但系个司机照样飞车同高速掟弯。真系一路坐一路惊. . . . .

上九份架巴士系唔会广播下一站系乜，而且九份只系中途站，所以要自己留意住几时落车。不过如果系旺季，应该巴士上多数乘客都系九份落车，再唔系认住九份基山街街口间7仔落车就冇错，巴士驶到黎呢度系个“S”形弯位，一定会慢驶，足够时间俾你睇清楚按钟落车。

黎到九份都系系基山街行下，食下路口果档旧道口牛肉面，再食下鱼丸，又食下赖阿婆芋圆呢D例牌地道小食，跟手再买返D手信。

系基山街街口对面马路，即系回程巴士站隔离，有一间几出名嘅手信店叫“李仪饼店”，佢嘅凤梨酥几好食架。不过如果系度买自己攞住走会好麻烦，好在佢系台北车站地下街都有间分店，而且可以免费送去酒店。所以我地系呢度order晒我地要嘅种类，然后叫佢系第二日我地临走前送去酒店，咁当然要先俾晒钱先啦。

待续. . . . .