《2010年新春台北之旅》- 第二天(3) – 乌来勇士广场

台车嘅车程大约只有5分钟，好快就到达勇士广场嘅台车站。

勇士广场就系乌来南势溪旁边，对岸就系乌来瀑布，而瀑布上面嘅山顶就系云仙乐园。勇士广场地方好细，系呢度唯一景点就系睇乌来瀑布，可能因为有雨落，所以瀑布水量都几丰富，几有气势。

勇士广场上只有几间卖民族服饰嘅手信店，其余并冇地方值得行。

 
今次吸引我地到乌来嘅其中一个原因，系因为时值台湾樱花季节，而乌来系其中一处有名嘅赏樱地方，可惜去到真系大失所望。唔知系唔系天气转冷嘅关系，并唔系太多樱花树有开花，我地只系系坐公共汽车来乌来嘅路上，台车车道旁边以及之后坐车去三好米温泉会馆嘅路边间中见到 一两 棵开左花嘅樱花树。勇士广场听讲系乌来最多樱花嘅地方，可惜眼见就只有呢一棵樱花树系开得比较似样。

系勇士广场沿下图呢条楼梯行上去就系缆车站，可以坐缆车上去对岸山顶嘅云仙乐园，来回要NT$200几蚊。因为冇乜兴趣所以我地冇坐上去，只系行上缆车站影左几张相就走人。

 
因为冇上去云仙乐园，所以只系大约半小时时间已经游览完勇士广场，之后再坐台车返回乌来老街。游览乌来老街加勇士广场两个半小时已经足够，即使上埋去云仙乐园，三小时已经OK，如果食埋饭应该都唔洗四小时。
乌来嘅温泉旅馆要等到5点先可以check-in，估计下午时段房间系用黎招待日归旅客。我地由勇士广场返到乌来老街时都仲未到3点，唯有放慢脚步再行多圈，食下小食，当然包括再食多次好好味嘅山猪肉香肠啦。
行到3点9真系已经唔知行去边度好，而且雨势开始变大，所以决定打电话去旅馆，叫佢地黎车我地入去旅馆先，心谂就算要等系旅馆等有得坐起码舒服D。
由于乌来大多数旅馆都离开老街好远，所以一定要坐车先可以去到，除左系公路边嘅旅馆，例如乌来璞石丽致或者春秋乌来可以坐公共汽车之外，其他远离公共汽车路线嘅旅馆就只可以坐的士，或者叫旅馆专车接送。大部份旅馆亦有专车接送住客往来乌来老街与旅馆之间，而系乌来老街嘅等车地点，就系老街入口前，即系全家便利店前面。系便利店斜对面系乌来警察局，可能因为易认，旅馆一般会同客人讲系警察局门口等，所以系呢一个由警察局、便利店以及老街入口所组成嘅三角地带，会见到有好多人企系度等车。

 
如果想旅馆派车到老街接你，当然需要先打个电话通知佢地啦，所以记得抄低旅馆电话号码带系身啊。可能会有人同我一样会担心打电话去旅馆call车嘅问题，其实一D都唔洗担心，即使你手提电话冇漫游或者甚至冇带手提电话都冇问题，因为系警察局隔离就有一排电话亭，打一个local call只需NT$1，即系唔洗澳门币3毫，平过用手提打长途多多声。

 
待续. . . . . .