2015年韩国首尔+釜山赏樱之旅(Day 4)上 – 釜山挂法樱花隧道、坐巴士去镇海

今日系2015年4月1日，系为期十日嘅镇海军港节嘅第一日。今次首尔+釜山赏樱之旅为嘅主要都系去镇海睇樱花，所以今日系今次旅程最重要嘅一日。

寻日釜山落好大雨，天气预报今日应该都会有雨落，所以都好担心今日赏樱嘅行程去唔去得成。一早起身落床第一件事就系睇下窗外点情况。都OK㖞，虽然个天仲系阴阴地，但起码雨唔大。

街上面都仲系湿湿地，但唔担遮都可以。

出发前先食返个早餐先。猪肉汤饭系釜山其中一样名物，寻晚行BIFF广场嘅时候已经留意到有间食猪肉汤饭嘅舖头，今朝早餐就试下。

认住门口呢只猪，要行楼梯落去。

味道清清地，都真系几唔错，好好味。两个猪肉汤饭盛惠14,000won，即系7,000won一个。

食完早餐开始出发去睇樱花啦。虽然我哋有KR Pass坐火车唔使再俾钱，但系由于釜山同镇海之间冇火车直接到，要转车，再加上火车班次少，坐火车的话既麻烦时间又会用多D。所以我哋采用最直接同方便嘅方法，就系喺沙上嘅西部巴士总站坐巴士去镇海。而且喺沙上仲有一个好正嘅樱花隧道，比镇海嘅樱花仲要靓，坐车之前可以顺道先去睇睇。

沙上距离南浦洞比较远，坐地铁要喺西面转一次车，大约要坐40分钟先去到。

去挂法樱花隧道最近嘅地铁站出口系3号出口，如果系直接去西部巴士总站，5号出口都可以，亦有地下通道连接巴士总站隔离个商场，穿过商场可以直接入到去西部巴士总站嘅售票厅。

到咗韩国三日其实都未真正见到过樱花，所以今日心情好期待。喺沙上站行出路面，哗！有樱华啊。街边嘅都已经咁靓，樱花热点嘅应该唔差啦，总算冇白行。而且个天已经唔再落雨，真系俾足面。

嚟到沙上我哋唔系即刻坐巴士去镇海，而系先去附近嘅挂法站睇樱花隧道。挂法站系个轻轨车站，由沙上地铁站3号出口行过去大约700米，行10分钟就到。如果唔想行路，亦可以系沙上地铁站旁边呢个轻轨沙上站坐一个站去挂法站。

我哋用脚行去，所以喺3号出口跟住轻轨向西行。

沿途会经过西部巴士总站

好快就见到挂法站啦

从车站下面呢个扶手电梯上去挂法站

再沿呢条行人天桥过去

喺行人天桥上面望过去已经可以见到马路中间条步行径上嘅樱花啦

行人天桥上有楼梯可以行落去步行径

哗，步行径两边种咗超多樱花树，密密麻麻真系好有樱花隧道Feel。今日应该都算系满开期，但地下已经开始有D飘咗落嚟嘅樱花花瓣。呢条步行径好长，不过望落去每段嘅景都一样，就系樱花隧道囉。因为唔系太多人嚟，所以感觉好宁静，又唔使同人争位影相。

下面系挂法樱花隧道嘅位置地图

睇完挂法樱花隧道之后，行返去西部巴士总站坐巴士去镇海啦。

先入去售票大堂买车飞，大人每位只系5,100won。镇海个英文名系Jin Hae，买车飞果阵用英文拼音讲就可以啦。

去镇海嘅巴士喺17嘅泊位，由呢度出去。

巴士冇划位，所以要排队上车。军港节期间巴士班次都好密，上唔到车等下一班都好快。

顺便一提，由西部巴士总站去镇海嘅巴士会行经挂法樱花隧道，而樱花隧道会系巴士右方，所以记得要坐右边座位，即系上车个门口果边。

Day 4 未完，睇埋Day 4下半Part，或者返回2015年韩国首尔+釜山赏樱之旅目录。

相关文章：

• 住@首尔明洞Loisir Hotel Seoul Myeongdong
• 住@首尔明洞天空花园酒店
• 住@首尔明洞王子酒店
• 住@釜山Hotel Aventree Busan(亚云树酒店)
• 首尔明洞酒店推介
• 韩国外国人专用火车通行证KR Pass
• 韩国MobilePOP Pocket WiFi Router使用分享
• 如何网上预约首尔昌德宫秘苑导赏团门票