2013年首爾賞楓自由行 – Day 1 (Part 2)：夜遊清溪川首爾燈節

我地到達首爾嘅時間啱啱係放工時間，所以入到市區都頗為塞車，用左差唔多個半鐘先到達明洞。最接近我地入住嘅Hotel Skypark Central Meongdong嘅機場巴士站係乙支路嘅Royal Hotel Euijiro 1(il)-ga站，落車行兩三分鐘就到酒店。

今次入住呢間Hotel Skypark Central Meongdong係我地嘅3rd choice，因為first choice嘅Nine Tree Hotel同second choice嘅The Grand Hotel都冇房。想睇呢間酒店嘅詳細介紹同我嘅住後感，可以睇下呢篇住@首爾明洞天空花園酒店(Hotel Skypark Central Myeongdong Seoul) 。

酒店大堂

Check-in完入到我地間double room，發現竟然係間冇窗嘅房，雖然間房睇落有個窗仔，但其實係個假窗，而且間房超細，超失望。點解會有部電風扇嘅？下文再講。

雖然對間房好失望，但係都唔理佢住啦，出去食晚飯先。係首爾第一餐食嘅就係呢間鳳雛，因為唔係咁食得辣，所以叫左唔要辣嘅，不過冇辣D味真係又爭D。

食完嘢先係明洞行下，好多小食攤檔。

呢幾舊拔絲甜薯要成5000幾韓圜，超貴。

每年11月首爾會舉行首爾燈節，地點係清溪廣場至三一橋之間嘅清溪川舉行，趁未完第一晚先去左呢度先。從明洞去清溪廣場其實行路都唔遠，不過因為我地有長者同行，所以都係坐的士去。

我地從清溪廣場行到乙支路入口站附近嘅廣橋離開，呢度距離酒店唔遠，慢慢行，行10幾分鐘就返到去。

今次係首爾嘅交通基本上都係坐的士，而家首爾的士起錶3000韓圜，除左去江南車費會比較貴之外，去大部份地方都係4000至6000韓圜左右，而坐地鐵一個人要1150韓圜，四個人加埋就要4600韓圜，所以有四個人坐的士都算化算。

如果打算坐的士，最好係出發前搵定目的地嘅韓文名稱，print出黎上車時交俾司機睇，不過print嘅時候要用超大字體啊，因為大部份的士司機都上左年幾，個個都有老花，字太細睇唔到。

前面講過我地Check-in完入到房發現係間冇窗嘅房，超失望。點知去完清溪川返酒店之後，發覺除左間房太細之外，房裡面嘅暖氣空調系統好似都有D問題，面積細再加上暖氣有問題，係房入面就好似係汗蒸幕咁，連呼吸都有D困難。

經過交涉之後酒店答應第二日會幫我地轉另一間房，不過呢晚由於係星期六，客房全部full晒，所以冇辦法即時安排另一間房俾我地，但係就為我地提供左一部風扇降溫。

– Day 1 完 –

相關文章：

• 首爾明洞酒店推介
• 2014年韓國首爾新酒店
• 住@首爾明洞天空花園酒店(Hotel Skypark Central Myeongdong Seoul)
• 住@首爾明洞王子酒店(Prince Hotel Seoul)
• 首爾免費無線上網 (Seoul Free WiFi)
• 2013年首爾賞楓自由行 – Day 1 (Part 1)：坐真航空澳門飛首爾
• 2013年首爾賞楓自由行 – Day 1 (Part 2)：夜遊清溪川首爾燈節
• 2013年首爾賞楓自由行 – Day 2 (Part 1)：土俗村人參雞、遊覽景福宮
• 2013年首爾賞楓自由行 – Day 2 (Part 2)：仁寺洞、平安道豬手
• 2013年首爾賞楓自由行 – Day 3 (Part 1)：南山公園睇紅葉
• 2013年首爾賞楓自由行 – Day 3 (Part 2)：巧遇首爾初雪
• 2013年首爾賞楓自由行 – Day 4 (Part 1)：德壽宮
• 2013年首爾賞楓自由行 – Day 4 (Part 2)：梨大、宏大、東大門批發市場
• 2013年首爾賞楓自由行 – Day 5 (Part 1)：廣藏市場、鷺梁津水產市場
• 2013年首爾賞楓自由行 – Day 5 (Part 2)：明洞購物、景福宮烤肉
• 2013年首爾賞楓自由行 – Day 6 (Part 1)：昌德宮秘院賞紅葉
• 2013年首爾賞楓自由行 – Day 6 (Part 2)：坐首爾機場火車去仁川機場，首爾再見了
• 2009年聖誕首爾之旅