2008年東京春季賞櫻＋溫泉之旅（第四天 [1]） – 井之頭公園、吉祥寺、新宿御園

2008年3月29日（天晴，氣溫9~17度）

行程：井之頭公園 _ 吉祥寺 _ 新宿御園 _ 明治神宮 _ 原宿 _ 千鳥淵公園 _ 靖國神社

今日係成個旅程中去得最多點景嘅一日，我地成個旅程總共去左五個櫻花名所賞櫻花，而今日一日之內就走左三處，真係行到腳都軟，不過三個地方嘅櫻花都真係好靚，就算行到腳痛都值得。

第一站先去位於吉祥寺嘅井之頭公園，由新宿去吉祥寺，最快同最直接係坐JR中央線，不過要睇清楚有特快同快速之分，特快列車會停三鷹，如果去三鷹之森美術館就啱，不過特快列車唔停吉祥寺架，如果去吉祥寺應該坐快速列車。我地開頭都坐錯左特快，好彩即時發覺，跟住係下一站落車再係同一月台等一陣就有一班快速列車到，完全冇浪費時間。

由新宿只需要15分鐘時間就到吉祥寺架啦，JR吉祥寺駅只有兩個出口，去井之頭公園由公園口出去，再向住對面嘅0101大廈行去，再轉右係0101大廈傍邊條小路直行就到。井之頭公園嘅櫻花樹圍住井之頭池黎種，個view真係好靚。

一早就有好多人係井之頭公園內霸位等夜晚賞櫻花

係井之頭公園睇櫻花最正就係可以係湖上划艇仔，可以近距離划埋櫻花樹下影相

有三種唔同嘅船可以選擇架，唔同船租金唔同，最平係划掌船，租一個鐘都只係600円

係船仔度影嘅近鏡

我地租左一隻要用船掌划嘅船仔，好多年都未玩過呢D野，真係唔係咁識控制，眼見湖面上好多船，而且大多數人都好似我地咁雞手鴨腳，真係幾驚會翻船，我唔識游水架。我地大約划左大半個鐘，兜左一個圈就上返岸啦，再唔上岸怕冇機會，因為划一個圈都已經手軟腳軟，仲攪到成身汗添。不過可以近距離接觸D櫻花，都算值得架。

划左一個圈船之後真係好肚餓，所以離開井之頭公園之後，就去左旅遊書介紹嘅松坂超人氣牛肉丸買返幾個黎試下。松坂牛肉丸就係正JR吉祥寺駅附近，不過要係JR站嘅另一個出口中央口出去，一出中央口再過斑馬線行前少少，係間M記之前個路口轉左直行一陣就見到架啦。

松坂超人氣牛肉丸，一見咁多人排就知係佢啦

熱辣辣嘅牛肉丸，真係好好味架

食完牛肉丸都仲未到11點，跟住我地坐返JR中央線返新宿，再由新宿駅新南口行去另一個櫻花名所新宿御園。大約行10分鐘就可以到新宿御園嘅新宿門，不過當日因為人太多，要分階段放人入去。

新宿御園嘅新宿門，要買200円門票先入得去

新宿御園入面有好多大草地，今日星期六所以全部都坐晒人係度野餐

新宿御園入面嘅日式庭園

新宿御園都真係幾大架，行左起碼個半鐘先行得晒，腳都軟，好彩間中可以坐係草地度抖下。離開新宿御園時我地選擇係另一邊嘅千駄谷門出去，因為由呢邊去原宿比較方便坐JR。

新宿御園千駄谷門

出左千駄谷門跟住人群行一段路就去到JR嘅千駄谷駅，由呢度坐中央線一個站去代代木駅，再轉山手線一個站就到原宿。