2008年秋季京阪神紅葉＋白浜溫泉之旅（第八天） – 黑門市場、Rinku Premium Outlet (完)

2008年12月2日
大阪 > Rinku Premium Outlet > 關西空港 > 澳門

 
終於到左旅程最後一日，今日會坐夜晚八點鐘飛機回澳，所以仲有大半日時間可用，不過今日都冇Plan去遠既地方，主要會去黑門市場買返一d只可以臨上機前先可以買既生果帶返澳門，然後就去最後一站 – Rinku Premium Outlet搏殺。

 
因為黑門市場位於難波，所以要由梅田坐地鐵到心齋橋。去到心齋橋之後，先去好多人都話好食既神座拉麵食早餐，不過食完覺得佢d拉麵一d都唔好食，唔好話攞佢同一蘭或者一風堂黎比，就算之前係梅田食既一間不知名食站既拉麵都仲好食過佢。

 
食完早餐之後，就行過去黑門市場，因為上次去大阪時已經行過幾次，所以唔洗睇地圖，好快就行到目的地啦。

 
早上既黑門市場

當造富有柿，平均95円（大約8蚊澳門元）一個，平過澳門買好多架

士多啤梨，雖然冇東京築地買既咁平，不過都好抵

買完生果之後返到酒店執埋野都係時間Check-out，因為Rinku Premium Outlet就係機場附近，所以我地會先到機場放低行李，再坐穿梭巴士去Rinku Premium Outlet。而今次我地唔坐火車，因為坐火車要行好多樓梯，黎果陣領教過，攞住大件行李都幾辛苦。所以今次改坐機場巴士去機場，巴士站就係梅田大阪新阪急隔離，拖住行李行路面唔洗上上落落。去到發現原來巴士站係冇人賣飛架，只得自動售票機，單程每人1,300円。買完飛等一陣就有巴士，而且架車冇咩人坐，大把位任坐。由大阪去關西空港行阪神高速，唔洗一個鐘就到。

 
關西空港內幾個不同地點都有呢d Locker，睇下機場平面地圖好容易就搵到架啦，中Size既400円一日，大Size就要400円一日，如果係26吋喼要大Size Locker先放得入。

去Rinku Premium Outlet既穿梭巴士就係地下果層（即係入境大堂果層）出面既12號乘車處，每50分鐘先有一班，錯過左就要慢慢等。

Rinku Premium Outlet風景

Rinku Premium Outlet內食左呢杯GODIVA雪糕朱古力

係Rinku Premium Outlet行左足足三個幾鐘，不過都係冇咩收獲，一來d款唔啱，二來價錢唔係好平。六點鐘返到機場Check-in，再食埋今次係日本最後一餐，就同日本暫時講聲Bye-bye啦，下次再見. . . . .

 
關西空港內食既日本最後一餐蟹肉壽司飯