關西紅葉季6天賞楓自由行：規劃、景點與行程分享

文章發表日期：2026-01-19 | 文章分類：日本旅遊攻略 | 作者：Dilbert MO

旅遊教室» 旅遊攻略» 日本旅遊攻略» 關西紅葉季6天賞楓自由行：規劃、景點與行程分享

日本關西的紅葉一般在11月下旬進入最佳觀賞期，這次的關西賞楓之旅就定在11月尾，去了京都、奈良、姬路等地多個紅葉勝景，以下跟大分享這次關西賞楓自由行旅程的行程和各景點的紅葉美景。

關西賞楓行程規劃

日本關西地區的紅葉一般在每年11月中旬開始變紅，最佳的觀賞期通常會在11月中至11月底這半個月，我們這次旅程安排了在11月25日開始。

不過受各項因素影響，不同地方的紅葉染紅狀況都會有所差異，例如同樣在京都市，我們去的時候有些地方的紅葉處於最佳狀態，但有些地方就已經掉落。

日本各地的紅葉預測，可以參考以下網站：

我們這次關西之旅，以大阪為基地，全程入住大阪駅同一間酒店。選擇住在大阪駅，最初的考慮是覺得方便乘坐火車前往京都、奈良和姬路。不過最後因為幾乎每天都會去心齋橋行街Shopping，總結經驗覺得還是住在心齋橋、難波一帶更加方便，而且從難波出發，無論是往來京都、奈良、姬路以至關西機場都很方便。

這次在關西去了五個地方看紅葉，包括清水寺、金閣寺、嵐山、奈良公園、姬路城，以下是這6天行程：

Day 1 – 坐飛機到大阪
Day 2 – 京都一日賞楓，遊覽金閣寺、銀閣寺、清水寺夜間參拜
Day 3 – 京都嵐山坐小火車看紅葉
Day 4 – 奈良公園、春日大社、東大寺喂鹿、看紅葉
Day 5 – 文化遺產姬路城看紅葉
Day 6 – 回程前Rinku Premium Outlet最後血拼

關西紅葉之旅行程分享

以下是這6天關西賞楓之旅每日的行程。(註：以下內容是用廣東話撰寫。)

Day 1：前往大阪

行程：澳門 >> 關西空港 >> 大阪格蘭比亞酒店

今次係第四次到日本，亦係第二次到關西，選擇再去關西其中一個原因當然係因為澳門有機直飛，比起要拖住行李經香港飛真係方便好多架，另外亦都係由於上次去關西唔係紅葉季節，所以都希望可以再到京都感受一下佢係紅葉襯托底下既美景。

其實第一日都冇咩行程可講，因為飛機下午3點鐘先從澳門起飛，所以第一日基本上只係坐飛機。

飛機好準時係3點起飛，飛左3個鐘多DD，飛機係日本時間7點幾就降落關西空港啦。過左海關，攞埋行李就先去JR Counter買嵯峨小火車車飛。本來打算11月26日去，點知原來果日小火車休息，所以改為27日先去坐，因為紅葉季節，D座位都差唔多full晒，不過好彩都仲可以買到11:50由嵐山開出既坐位車飛。

買完小火車車飛，再買埋JR關空快速車飛，時間都差唔多8點15分，啱啱好趕得切坐8:32班車。

今次係大阪住既酒店係大阪格蘭比亞酒店，就係正JR大阪駅上面，一出JR大阪駅中央口轉右直去就係。

大阪格蘭比亞酒店門口

由於今次旅程計劃會去大阪周邊既多個唔同地方，覺得住梅田會比較方便坐車，所以選擇酒店時都集中搵梅田既酒店，不過睇左好多酒店既相片都覺得麻麻，最後都係選擇左格蘭比亞，因為睇相似乎比較干淨企理，可惜入左房真係好失望。

間房細本來已經預左，但係原來間酒店已經好舊，地毯同牆身都有好多污漬，個洗手間顏色又太沉，完全冇乜生氣，當時真係好懷念上次住果間Cross Hotel Osaka。

雖然話住梅田會比較方便坐車去其他地方，但其實係大阪選擇住難波至心齋橋一帶會好好多，原因有幾個：第一，難波至心齋橋一帶係shopping熱點，買野方便又熱鬧，如果住附近可以方便買完野放返酒店唔洗攞住行街；第二，難波至心齋橋一帶有好多食店，搵野食方便又多選擇；第三，由機場去難波坐南海電鐵好方便。我們今次住係梅田，但前前後後都去左心齋橋4次咁多，早知住返心齋橋一帶好過啦。

再講返行程，我地係酒店check-in完就出去食dinner，其實係梅田阪急駅、阪神駅同Hep Five周圍都有好多條小巷有唔少食店，而且到好夜都仲有好多人。

第一晚既晚餐就係Hep Five側邊橫街既呢間拉麵店食

味道唔錯既啦麵

返酒店前係自動售賣機買左罐栗米，又係酒店餅店買杯布丁做宵夜。

Day 2：京都一日賞楓，遊覽金閣寺、銀閣寺、清水寺夜間參拜

行程：梅田 > 京都駅 > 金閣寺 > 銀閣寺 > 清水寺 > 梅田

秋天關西既天氣都幾清爽下，呢幾日氣溫都係介乎7度至15度之間，除左早晨較凍之外，其實大部份時間都可以唔著褸。

不過開頭幾日就冇乜陽光，個天陰陰地，都有D影響影相既質素。另外，最唔好既地方係日落時間太早，下午5點之後就開始天黑，5點半周圍已經係黑媽媽，大大減少左遊覽既時間。

今日既行程主要係參觀京都寺院，而重頭戲就係去清水寺參觀夜間參拜。今朝本來打算一早起身，不過最後都係摸到9點半先去食酒店早餐，去到發現西式早餐9點半close，只可以選擇食日式啦。

酒店既日式早餐，真係好睇唔好食，食完之後果朝仲攪到有D肚痛添。

食完早餐就開始京都之旅啦，首先由大阪駅坐JR去京都駅，本來預計唔洗30分鐘就到，點不知…..上錯普通車，站站停，最後用左50分鐘先去到京都駅。

到左之後再係駅前巴士站坐巴士去金閣寺，點不知等左好耐先有巴士到，而且仲要係行左成大半個鐘先去到金閣寺。

京都巴士

呢度就係金閣寺表參道入口啦

金閣寺表參道

紅葉啊!!

跟住就到金閣寺正門

金閣寺入場券

呢度就係金閣寺入面既主角金閣啦

從後面影既金閣，近睇冇咩特別，仲以為係油左層金油

金閣寺入面既投幣式求簽機，真係求簽都自動化，唔知準唔準架呢。

出門口之前有成排手信店，仲可以試食架，我地就食左好多，不過冇買。

行完金閣寺之後，我地就行返過剛才落車個巴士站斜對面既反方向巴士站，係呢度可以坐巴士去銀閣寺。不過由金閣寺坐巴士去銀閣寺都用左大半個鐘。

銀閣寺附近既哲學之道，點解呢度D葉咁快落晒…..。

感覺好掉零既哲學之道

前往銀閣寺既路上，同清水寺一樣都係好多手信店。

終於到左銀閣寺門口啦

呢度就係銀閣寺入口

銀閣寺入面

從銀閣寺後山上面遠眺京都

參觀完銀閣寺差唔多係3點半左右，但係感覺上就好似平時5點幾咁，好似有D就黎天黑既感覺，因為仲未正式食過野，所以我地決定先坐巴士去河源野搵野食先。

食完野個天都已經入黑，我地就慢慢經袛園穿過八坂神社行去清水寺方向，由於上次去京都已經係附近行過，所以今次都冇點影相。

沿途好多日本女人著晒和服去參拜

穿過八坂神社

高台寺門口燈光照射下既紅葉

夜間參拜既吸引力睇黎真係好大，同上次日間黎果陣相比，今晚清水寺附近真可謂人山人海，入到清水寺入面果陣，更加係水洩不通，要實行潮水式既人群控制。

清水寺三年坂

中途係三年坂附近一間食店食既紅豆加年糕糖水，超好味，好味過道頓堀既夫婦善哉好多，而且只係550円，又平又好味，可惜唔記得影佢門口既相。

清水坂

行左一大段路終於到達清水寺門口啦

呢棵係清水寺入面最紅既紅葉樹，個個都爭住影。

打左燈既清水寺真係好靚架，不過人太多想搵個位影相都難。

呢張係由下面影返上去

夜遊清水寺大約用左2個半小時，之後坐巴士返去河源町，再坐阪急電車返梅田。

阪急電車

返到梅田由於時間仲早，所以再去附近行下搵下有冇好野食。

呢間係阪急駅與阪神駅之間條食街既章魚燒好好味架，比起道頓堀既赤鬼仲好味，而且仲平D添。

食完章魚燒再行多陣，又比我地係Hep Five附近條橫街發現左一風堂拉麵，店外好多人排隊。

排左差唔多20分鐘有得食，叫左佢既招牌拉麵。

食完好好味既拉麵之後，第二日既旅程完滿結束啦，明日再戰。

Day 3：嵐山坐小火車賞紅葉

行程：梅田 > 嵐山 > 京都駅 > 心齋橋 > 梅田

今日既行程原本係計劃上午去京都嵐山，下午去二條城，然後再去貴船神社睇紅葉。但後來發覺二條城同貴船神社既紅葉已經過咗，又想多D時間去shopping，所以下午既行程改為去心齋橋一帶行街。

吸收左尋日食早餐既經驗，今日我地9點前就去酒店19樓食西式早餐。食完早餐大約9點半左右，去到阪急電車駅時，啱啱好可以坐到一班特急列車。從梅田坐阪急電車去嵐山，需要係桂站轉一次車，因為上一次去京都時已經坐過，所以咁次完全冇難度。

阪急電車內

上次去京都已經去過一次嵐山，今次去主要係想試下坐小火車睇紅葉既感受。我地大約10點半到達嵐山，離坐小火車時間仲有一個半小時左右，可以慢慢影下相先。同上次相比，今日既嵐山真係人頭湧湧。

嵐山公園一景

滿山紅葉

渡月橋上

因為上次已經入過天龍寺，所以今次冇再入去，而改由側邊小路穿過竹林去小火車嵯峨野站上火車。

由呢條路入去就係竹林

竹林

果然係紅葉季節，嵯峨野車站內人山人海，原來小火車可以買企位架，好彩我地之前係機場JR Counter買定車飛，有位坐。

嵯峨小火車

本來對於今日坐小火車欣賞紅葉既節目好有期望架，但原來發覺都係不外如事，真係有D失望。

嵐山景色

再黎嵐山景色

12點15左右小火車到左亀岡站，因為12點32分有一班車由JR馬堀站去京都駅，而由小火車亀岡站行去JR馬堀站都要行10分鐘，所以一落車就要急急腳咁行，唔係miss左呢班車就要等多半個鐘先有車。

小火車亀岡站外既田野

坐完小火車，我哋住JR返大阪，再轉地鐵去心齋橋，去到已經係下午3點啦，第一時間搵食啦。今次既目標係美津の大阪燒。

大阪燒套餐

燒完個樣

食完之後既節目就只係行街，冇咩好介紹。

行行下係千日前近南海電鐵車站果邊入口附近，發現呢間餅店好多人排隊喎。

原來係買呢隻芝士蛋糕

我地當然唔汁輸買件返酒店食啦

接近7點幾果陣，個天開始落少少雨，所以我地都提前返酒店，返房前順便上酒店27樓個展望台睇下夜景。

位於大阪格蘭比亞酒店27樓既展望台，其實呢度有幾間高級餐廳，只係兩邊有落地玻璃可以俾人睇景，不過免費野都唔錯囉。

由於落雨都唔想行得太遠，最後只係附近間吉野家食碗平價牛肉飯。

Day 4：奈良公園、春日大社、東大寺喂鹿、看紅葉

行程：梅田 > 奈良 > 奈良公園 > 春日大社 > 東大寺 > 心齋橋 > 梅田

今日既行程好簡單，上午去左奈良睇鹿、參觀春日大社同東大寺，下午係心齋橋Shopping。

由梅田去奈良，只需要坐去奈良方向既JR就可以直接去到，火車會先行大阪環狀線去到天王寺站，然後再駛向奈良，唔需要轉車，車程大約一個小時。到左JR奈良站之後，可以直接坐巴士去奈良公園。

一去到奈良公園就不斷見到有鹿仔，佢地一見人就走埋去問人要野食架，不過最好就唔好買鹿餅喂佢地，因為佢地好似好狼死，我地見到買餅喂佢地既人最後都係冇咩好下場–就係最後個個都比佢地嚇到要掉晒手上既餅，急急腳走人囉…！

去春日大社路上

春日大社門口

春日大社果然係行婚禮既熱門地方

由春日大社行去東大寺途經既茶屋，佢既紅豆湯都幾好味架，同埋坐係佢出面一邊食一邊睇紅葉，好有Feel。

東大寺數景

又有鹿仔阻路

奈良公園既紅葉比起京都仲紅仲靚

行完東大寺之後約莫12點半，我哋先坐巴士去近鐵奈良站，再坐近鐵列車返去難波，車程大約都係一小時左右。

返到難波之後先搵左出名既自由軒食dinner，一試佢既招牌咖哩飯。係排隊果陣個侍應埋黎先落單，但又冇餐牌睇喎，大家雞同鴨講左一大輪，見佢好似好唔耐煩咁，最後好彩見到佢廚窗有sample，於是走埋去指俾佢睇先攪掂。

入到去見十個有八個都係食呢隻咖哩飯，食落幾香咖哩味，不過就完全唔辣，一碟飯只售650円都算幾抵食。

呢日下午只有一項節目，就係心齋橋Shopping，因為心齋橋一帶都黎過幾次，所以並冇影相。

以下係今次旅程既主要戰利品，因為剩返最後兩日都唔會再大手買野，所以呢晚先影左戰利品合照先，其實主要都係送禮手信，自己既反而唔多。

Day 5：文化遺產姬路城看紅葉

行程：梅田 > 姬路 > 姬路城 > 神戶 > 三宮、元町 > 神戶港 > 大阪

今日既行程係先去參觀世畀文化遺產姬路城，再去神戶食神戶牛和睇夜景。

去姬路坐JR特急要差唔多一個小時，坐一個鐘車只係睇一個景點都幾浪費時間架，不過話晒係日本著名景點，又係世畀文化遺產，都算值得。

由JR姬路駅望過去，遠處個城就係姬路城，一直行10-15分鐘就到架啦。

姬路城近鏡

呢個係團體照指定影相地點

姬路城城門

姬路城主樓

姬路城主樓頂層

從姬路城頂層望出去既景色

參觀姬路城需時兩小時，我地由11點行到中午1點，參觀完後就急急腳坐返JR去神戶。點解咁急？因為趕住去食神戶牛Lunch囉。

聽講食神戶牛係Lunch時間食會平過晚飯時間好多，所以我地都專登選擇係中午去食。又係聽人講呢間叫Mouriya (神戸ステーキレストランモーリヤ)既好好味，所以去到神戶三宮站落車之後，就跟住地圖去搵佢。

出左JR三宮駅沿三宮本通商店街或者Central St.向神戶駅方向行，冇幾耐就會見到呢個街口，前行50米就到Mouriya架啦。

Mouriya就係呢座大廈三樓

Mouriya店內，可能已經係下午2點幾既關係，店內只得唔夠10個食客，可以坐係度睇住廚師整俾我地食。

Mouriya三宮店有個識講國語既姐姐仔，所以唔洗雞同鴨講，經佢介紹，我地Order左兩個Set，分別係唔同部位既神戶牛，呢度就係兩個Set加埋既份量黎架啦。

先黎個南瓜湯，好味。

跟住個廚師會一邊整一邊俾你食，除左牛之外仲有幾件配菜，之後仲有碗飯送埋架，不過份量真係唔足夠囉。

呢餐食左差唔多一萬円，不過覺得味道麻麻，而且又唔飽，唯有出去搵野食啦。神戶一帶都唔係太啱我地行，我地只係三宮、元町附近行下，去完中華街食左d小食，跟住就由元町駅坐一個站JR到神戶港。去到神戶港，發覺都係冇咩特別，又搵唔到啱食既野，所以係神戶港影左幾張神戶夜景之後，決定返回大阪。

神戶風景，隨便影幾張交差。

因為今晚係旅程last night，又因為中午果餐神戶牛實在令人失望，所以返到大阪之後，我地決定到道頓堀既道樂蟹，食返餐好既。

上次去大阪時幫襯過道樂蟹，果次叫左Set網燒會席，可惜因為自己唔係太識點燒，整出黎唔係太好味。吸取左上次經驗，今次決定叫一Set Sabu Sabu既，另外再叫燒好左既蟹腳，再加一Set蟹膏壽司，呢餐果然係……正！

先黎頭盤…蟹刺身

Sabu Sabu…

呢份係另外order既網燒蟹腳

呢碗係用鐹底剩餘物資煮成既蟹粥

呢份係蟹膏壽司，食到中途先記得影相。

最後仲有呢個綠茶雪糕

呢個係道頓堀橋對開既大屏幕，每隔一段時間就會由廣告轉為橋上即時實況，我地今次被安排坐二樓窗口，對正橋同屏幕，可以一邊食野一邊睇野。

呢餐食得好滿意，而且都只係8千円。食完今次日本最後晚飯，係時候返酒店pack行李啦。

Day 6：回程前Rinku Premium Outlet最後血拼

行程：大阪 > Rinku Premium Outlet > 關西空港 > 澳門

終於到左旅程最後一日，今日會坐夜晚八點鐘飛機，所以仲有大半日時間可用，不過今日都冇Plan去遠既地方，主要會去黑門市場買返一d只可以臨上機前先可以買既生果帶返去，然後就去最後一站 – Rinku Premium Outlet搏殺。

因為黑門市場位於難波，所以要由梅田坐地鐵到心齋橋。去到心齋橋之後，先去咗神座拉麵食早餐，不過食完覺得佢d拉麵一d都唔好食，唔好話攞佢同一蘭或者一風堂黎比，就算之前係梅田食既一間不知名食站既拉麵都仲好食過佢。

食完早餐之後，就行過去黑門市場，因為上次去大阪時已經行過幾次，所以唔洗睇地圖，好快就行到目的地啦。

早上既黑門市場

當造富有柿

士多啤梨，雖然冇東京築地買既咁平，不過都好抵。

買完生果之後返到酒店執埋野都係時間Check-out，因為Rinku Premium Outlet就係機場附近，所以我地會先到機場放低行李，再坐穿梭巴士去Rinku Premium Outlet。

今次我地唔坐火車，因為坐火車要行好多樓梯，黎果陣領教過，攞住大件行李都幾辛苦。所以今次改坐機場巴士去機場，巴士站就係梅田大阪新阪急隔離，拖住行李行路面唔洗上上落落。去到發現原來巴士站係冇人賣飛架，只得自動售票機。

買完飛等一陣就有巴士，而且架車冇咩人坐，大把位任坐。由大阪去關西空港行阪神高速，唔洗一個鐘就到。

關西空港內幾個不同地點都有呢d Locker，睇下機場平面地圖好容易就搵到架啦。

去Rinku Premium Outlet既穿梭巴士就係地下果層（即係入境大堂果層）出面既12號乘車處，每50分鐘先有一班，錯過左就要慢慢等。

Rinku Premium Outlet風景

Rinku Premium Outlet內食左呢杯GODIVA雪糕朱古力

係Rinku Premium Outlet行左足足三個幾鐘，不過都係冇咩收獲，一來d款唔啱，二來價錢唔係好平。六點鐘返到機場Check-in，再食埋今次係日本最後一餐，就同日本暫時講聲Bye-bye啦，下次再見. . . . .

關西空港內食既日本最後一餐蟹肉壽司飯

Klook.com

________
本文網址：https://www.travelclassroom.net/2026/01/kansai-autumn-trip.html