2008年東京春季賞櫻＋溫泉之旅（第七天） – 秋葉原、銀座、新宿六歌仙

2008年4月1日（全日天晴，氣溫11~18度）

行程：新宿 _ 築地 _ 上野 _ 秋葉原 _ 銀座 _ 新宿

今日係東京之旅last第二日，所以今日安排嘅行程主要係血拚 – Shopping。最後兩日嘅酒店房包埋早餐，每位加HK$50架，不過D早餐好難食，冇樣野啱我口味，所以只係食左少少。

因為團友想買海產，所以食完酒店難食早餐之後，第一站再去多次築地，不過只係係外市場一帶，當然順道再食多次好好味嘅井上中華拉麵啦。因為之前已經去過築地，而今日再去係買野，所以冇乜影相，買完亦都即時再坐地鐵向下一站上野出發。

因為係旅程第三日我地已經去左上野公園睇櫻花，所以今日去上野主要係買手信。去到上野已經係10點幾，好多店鋪都開晒門架啦，今日主攻當然係手信專門店二木之菓子啦。

上野百果圓，一盒兩包裝嗁士多啤梨都只係賣800円至900円，比係百貨公司食品部平成一半價錢，好抵啊，所以都買左D帶返黎

本來打算係上野買完手信就直接去下一站秋葉原，不過因為不知不覺買左好多，一袋二袋咁真係好重，所以都係先將手信攞返酒店先再出過黎啦，由上野坐JR山手線去返新宿都要成半粒鐘架。

係酒店放低行李再抖左一抖之後又出發去秋葉原，今次我地坐JR中央線特急，比山手線站站停快好多，不過因為中央線唔到秋葉原，所以要轉一次車囉。

去到秋葉原都差唔多一點，開始肚餓添，本來打算係旅遊書介紹位於JR秋葉原站隔離個Akihabara Dept食D平價豬扒飯，點知果座野翻新緊，咁唯有搵過另一間醫肚啦，點知原來電車男係唔多需要食野架，秋葉原唔係太多食店可以選擇，最後都係去左間吉野家度食。

秋葉原周圍都係電器店

秋葉原好多妹妹仔派傳單，呢個靚D所以影低佢

秋葉原好多性商店架，呢間係其中一間，D貨品真係琳琅滿目，要乜有乜架

本來想去秋葉原睇下日本有乜野新穎電子產品，又或者有冇一D抵食Product買返件，點知行左幾間發覺都冇乜驚喜，間間都係賣相機、攝錄機、NDSL、PSP之類，仲要同港澳賣嘅款式差唔多，而且價錢又唔平。

行完秋葉原下一站係銀座，本來想坐地鐵過去，不過搵左好耐都搵唔到地鐵站，最後都係傻傻地坐JR去返上野再轉地鐵，因為上野JR站同地鐵站就係隔離，容易D搵。

因為上次去東京已經係銀座逗留過唔少時間，所以今次主要係同團友去Fancl同Burberry Blue Label兩間旗艦店睇下有冇野買，至於其他名店，因為冇錢所以都冇入去啦。雖然話銀座間Fancl同Burberry係旗艦店，不過真係好少款，所以最後銀座血拚只係空手而回。

銀座中央通

銀座和光百貨

因為今晚係東京最後一晚，所以決定Dinner食豪D，就係去六歌仙食和牛+長腳蟹BBQ任食放題啦。我地先返酒店抖左一陣，之後就行過去攞位。六歌仙就係新宿太子斜對面，如果住面向鐵路果邊嘅房，應該可以係窗口望到。

由新宿太子酒店窗口望出去，條鐵路係JR山手線，對正十字路口果座有10幾層高嘅大廈就係六歌仙所在。左手邊有堆屋仔果度係條食街，有10幾間平價食店架。

好多人都講六歌仙晚晚都好full，要先打電話去訂位，我地去果陣係7點左右，諗住咁早應該可能有位啦，點知去到真係full晒，要等到9點之後先有位，因為係最後一晚，所以唯有等到9點囉。所以如果大家想去，記得前一日先打個電話去book左先啊，呢度係佢個網址，有電話，可以參考下http://www.rokkasen.co.jp/。

我地係周圍行左個幾鐘之後，因為肚餓冇力行所以未到9點就上返去等位，不過都係要等到9點先有位。係六歌仙可以食套餐，亦可以食任食放題，可以選擇火鍋同BBQ，而且有幾款唔同價錢嘅Set可以選擇，最貴嘅要2萬幾円，我地就叫左最平嘅雪之宴，每位6,300円，比旅遊書講嘅貴左幾百。

任食放題係有時間限制架，開始之後，佢地就會計時架啦，一定要係90分鐘之內食完，不過食物要係60分鐘之內落單，最後30分鐘只可以叫麵類。一開始佢地會先上五碟野，包括和牛、蟹、雞肉同埋兩碟唔記得係乜。其實食完呢D已經有七成飽架啦，之後可以任叫佢指定嘅食物，除左先前上嘅和牛同蟹之外，仲有蝦、帶子等等。可能係平嘅關係，我覺得D和牛麻麻地，所以最好全部叫蟹、蝦同帶子，D蟹腳真係好好味架，不過唔好叫咁多，因為食剩要按每碟加錢架。

因為時間緊迫，就好似比賽咁一吹雞我地就搏命燒搏命食，所以都冇點影相囉。

其中指定嘅四碟野

因為限時關係，所以一路燒果陣好心急想佢快D熟

經過一輪衝刺，東京之旅中最豪嘅一餐終於完結，真係食到好飽，不過咁食野太刺激，下次都係咪攪啦。