日月潭+台中+台北6天自由行：旅行規劃與行程分享

這次的台灣之旅，重點是去日月潭，順道遊台中，回程時再在台北停留遊覽兩天，行程總共6天。日月潭位於台中，最方便當然是飛台中機場，不過因為台北機票便宜，我們選擇了飛桃園機場，再轉坐高鐵去台中。

 

台北、台中+日月潭6天自由行：行程規劃

 

6天日月潭+台中+台北自由行行程：

• 第一日：由澳門飛台灣桃園機場，坐公車到桃園站轉乘高鐵去台中，入住台中碧根行館，重點遊覽台中逢甲夜市。
• 第二日：坐公車前往日月潭，入住日月潭Spa Home，遊覽日月潭各景點。
• 第三日：坐公車返回台中轉乘高鐵去台北，入住台北inHouse Hotel。
• 第四、五日：台北hea遊，入住台北Airline Inn。
• 第六日：返澳門

 

以下Google地圖mark左今次旅程嘅住宿酒店同主要景點位置：

在較大的地圖上查看台北、日月潭之旅：酒店和主要景點位置

 

今次旅程入住嘅四間酒店我都各自寫左住宿評價同介紹，有需要可以參考下。

• 住@台北西門町頭等艙飯店(Airline Inn)
• 住@台北西門町薆悅酒店(inHouse Hotel)
• 住@台中碧根行館(Beacon Hotel)
• 住@日月潭Spa Home

 

 

台北、日月潭之旅：行程分享

 

以下分享這6天台中、日月潭和台北的行程、交通和景點。

 

台北、日月潭之旅Day 1：桃園機場坐高鐵去台中，遊一中街商圈、逢甲夜市

 

雖然颱風正在慢慢迫近台灣，但係機票一早已經買左，唯有硬住頭皮照去啦，上到機先知原來人人都係咁照去，全機full晒，好似當颱風冇到咁。

 

出發時正值端午節臨近，機場都放左D節日裝飾。

 

Check-in完仲未夠鐘上機，又去機場貴賓室抖抖，順便食埋個早餐，幾個月冇去，原來而家貴賓室改左新規矩，以前攞住張VISA或Master金卡可以無限任用，而家改左要睇簽帳額黎定可以使用次數，而且間間銀行唔同計法。

 

今次又係坐復興航空，貪佢機票平D，而且時間又好D，可以早D去又晏D返，不過食物就認真麻麻。

 

今次都係用返呢本旅遊書，不過係今年新版，但點解抽起晒頂泰豐嘅介紹呢？起先仲以為頂泰豐執左？

 

出發之前幾日，發生左桃園機場俾雷電擊中嘅事件，而天氣報告又話今日台灣有雷雨天氣，好擔心降落果陣會唔會擊中我地。但係果日全程都冇風冇雨喎，天氣預報好似唔多準。

 

原來桃園機場第一航廈做緊改建工程，有D已經完工嘅部份已經開始使用，真係新好多同大過舊時好多。

 

新嘅入境大堂。

 

新嘅公車站改左係入境大堂下一層，地方大左好多。

 

我們今日會坐高鐵去台中，所以會先坐705號公車去高鐵桃園站，上車前先係呢個2號售票櫃位買飛先，一位NT$30。

 

買左飛就係出面上車，公車班次好密，好快就有一班，所以唔洗急。

 

大件行李可以放係車中間車門對住嘅空位，因為架車係直達高鐵站，中途冇上落客，所以唔會有問題。

 

出面天朗氣清，唔似有打風喎。

 

高鐵桃園站離桃園機場唔係好遠，坐左15分鐘左右就到。

 

入到車站先排隊買車飛先，雖然有自動售票機，但係唔見有人用，都係排隊係counter買簡單D，又唔係太耐。

 

我地買嘅係標準車廂嘅指定席車票，由桃園去台中每位NT$540，高鐵雖然都有自由席車票，不過只係平得好少。

 

入閘啦，月台只有兩個，一個北上去台北，一個南下去高雄，我地去台中當然就係南下啦。

 

今次只係第二次坐台灣高鐵。

 

入閘前係7-11買左飯團醫肚。

 

沿途並唔見有落雨，不過個天就有少少陰。

 

由桃園站去到台中站只需要38分鐘，同車票上預計嘅時一樣，我地係14:35到達台中站。

 

台中站果然係大站，地方比桃園站大好多。

 

車站入面有和運租車同格上租車呢兩間租車公司嘅counter，本來都預約左係呢度攞車，不過由於颱風關係最後都係取消左。

 

我地係台中訂左住碧根行館，酒店係逢甲夜市，從高鐵台中站去有接駁巴士，只要有高鐵車票就可以免費坐車。接駁巴士車站係6號出口，由車站大堂落一層就係。

 

如果想睇詳細D嘅接駁巴士資料，又或者想睇關於碧根行館嘅介紹同住宿評價，可以參考呢篇《住@台中碧根行館(Beacon Hotel)》，呢度唔再重複。

 

 

碧根行館位置好易搵，係逢甲大學站落車就見到。

 

日頭嘅逢甲夜市冇咩行，講明係夜市當然係要等到夜晚先熱鬧啦。所以我地係附近兜左一陣就決定先去台中火車站果邊睇下。

 

原來悠遊卡係台中嘅公車上都可以用，而且用卡乘坐短距離係免費架。其實就算坐南投客運嘅公車去清境、日月潭咁遠嘅地方都一樣可以用悠遊卡，不過就要確定張卡有足夠餘額。

 

由逢甲夜市坐車去台中火車站都差唔多要半個鐘，我地仲上左架係市區入面不斷兜圈嘅公車添，攪到落又唔係唔落又唔係，唯有當係遊車河，係車上睇下台中市風景。

 

行行下當架公車去到台中科技大學嘅時候，發覺周圍人頭湧湧，於是當然即刻落車睇下啦，原來呢度就係台中另一個行街shopping熱點 – 一中街商圈。呢度附近有幾間學校，所以係度行銜嘅都係以年青人為主。

 

一中街商圈地方唔大，很完一圈食下小食，跟住又上返公車去火車站，呢程路程好短，只係三個站，用悠遊卡唔洗扣錢。

 

台中車站嘅建築好古式古香，所以唔係搭火車都要入去睇睇。

 

車站入面

 

車站裡面仲設有呢部自動借車還書機，唔知點用呢

 

離開台中火車站果陣個天已經入黑，商店已經關晒門，人都唔多個，周圍靜英英，冇咩好行，於是行過去台中公園附近嘅干城車站睇下，呢度係去日月潭、埔里同清境等地嘅南投客運公車係台中嘅總站，所有公車都係由呢度開出，再去高鐵台中站，然後再駛去日月潭、埔里或者清境。

 

在較大的地圖上查看干城車站的位置

 

干城車站睇落並唔似係一個車站，只係係路邊有D車站牌，而售票處亦只係一間小小嘅舖位，完全唔起眼。

 

去干城車站嘅目的，係想睇下環境係點，因為day 2坐車去日月潭仲未決定係干城車站坐定去台中高鐵站坐。睇完干城車站之後，我們就坐的士返去逢甲夜市，車程都要20幾分鐘，車費NT$200。個司機知我地要去日月潭之後，全程不斷sale我地包佢架車去，一日8小時收費NT$2,400，話會去晒日月潭所有景點，仲會去多一兩個其他景點添，不過我地只係打算係日月潭hea下，而且聽日去唔去得成都要睇個天，所以冇興趣幫襯佢。

 

返到逢甲夜市街上嘅景況同火車站果邊完全唔同，雖然話打風，又間中有少少雨，不過依然係人頭湧湧，如果係weekend可能會人多到行都行唔到。

 

呢間燒元貝好好味

 

呢檔燒蝦都唔錯

 

呢檔大腸包小腸好出名架，就係我地住嘅碧根行館向逢甲大學正門方向行冇幾遠嘅巷口。

 

逢甲夜市的主要範圍是逢甲大學出面的文華路至福星路之間的街道組成。

在較大的地圖上查看逢甲夜市的位置

 

– Day 1 完 –

 

 

台北、日月潭之旅Day 2：台中去日月潭，日月潭一日遊

 

台灣嘅電視媒體一向對新聞嘅報導方法都好跨張，尋晚電視不斷報導颱風動態，講到情況非常嚴重，就好似世界末日將至咁，但係街外實情係風平浪靜，雨勢又唔大，真係唔知信唔信佢好，所以去唔去日月潭好都仲心大心細，心諗都係等天光睇下情況再決定聽日行程啦。今朝起身第一時間睇下窗外環境先，睇個樣天氣又唔算太差，雖然有D雨，但只係細細雨，亦唔多覺太大風，應該冇問題。

 

梳洗完先落樓下M記食早餐，因為個風唔勁，仲要返工返學，所以M記都有唔少大學生係度買早餐。

 

食完早餐返上房執埋野就check-out走人啦。經過尋日考察完車站環境同今日天氣情況，我地決定去返高鐵台中站坐公車去日月潭，因為咁嘅天氣下估計去日月潭嘅遊客應該唔多，而且係高鐵台中站上車車站係室內，就算落大雨上車時都唔會咁狼狽，仲有第二個原因，就係去高鐵台中站有免費公車可以坐，慳返NT$200的士錢。

 

接駁公車同去日月潭或者清境嘅南投客運公車係高鐵台中站嘅上落客地點位於同一層，接駁公車係6號出口，而南投客運就係對面嘅5號出口。

 

– – – 下面先加插呢段介紹一下去日月潭同清境方向嘅公車資料 – – –

 

由台中去日月潭、清境或者埔里嘅南投客運公車，係由干城車站總站開出，之後再駛到高鐵台中站，上埋係呢度嘅乘客。如果遇上旺季，係干城車站上車會穩陴D，平日嘅話係高鐵台中站上車都應該仲有位坐。

 

干城車站位於台中火車站附近，就係台中公園快捷假日酒店隔離。

在較大的地圖上查看干城車站的位置

 

南投客運每日有22班由台中出發前往日月潭的公車，假日更會增至26班，大約每20-40分鐘就有一班車開出，單程車費係NT$190。

 

去日月潭嘅公車有兩條唔同行法嘅路線，一條(台中-高鐵台中站-埔里-日月潭(國6)線)係中途先停埔里鎮再去日月潭，而另一條(「臺灣好行-日月潭線」)就唔入埔里鎮，但係會去埔里附近嘅暨南國際大學上落客，然後再去日月潭，兩條線嘅行車時間差唔多，大約1.5小時左右(由干城車站至日月潭)。

 

如果係去清境，係台中嘅上車地點同去日月潭相同，不過直達清境嘅公車班次好少，多數需要先坐去埔里，再由埔里轉車上清境，但係由埔里去清境嘅公車班次其實都唔多，比去日月潭麻煩。(清境公車時間表)

 

 

– – – 介紹完公車資料，又再講返我地嘅行程啦 – – –

 

到左高鐵台中站啱啱有一班去日月潭嘅公車就黎到站，真係好彩，二話不說先係5號出口旁邊呢個counter買左車飛先，每人NT$190。

 

跟住就係5號出口外面排隊等上車，一如預計坐車嘅人唔多，而且大部份係坐去暨南國際大學嘅學生。

 

架公車都好大架，座位好寬闊，仲有戲睇，播緊嘅係大陸片”讓子彈飛”。

 

由高鐵台中站去到日月潭只係需要1個鐘多D，開頭半個鐘行高速公路(6號國道)，去到埔里鎮嘅愛蘭交流道出高速公路，再行多半個鐘頭多D普通公路就到。

 

我地坐呢班車係「臺灣好行-日月潭線」，唔停埔里鎮，但係會去埔里附近嘅暨南國際大學。

 

之後再經過魚池鄉。

 

見到湖即係表示已經到達日月潭啦。

 

再駛經日月潭水社嘅名勝街。

 

公車係日月潭嘅總站就係日月潭水社遊客中心，呢度距離名勝街同水社碼碼只有100米。

 

遊客中心入面有D旅遊資料可以攞黎睇，亦可以將行李寄存係呢度。

 

遊客中心旁邊係公車售票處，返去台中嘅公車就係呢度買飛同上車

 

除左可以坐南投客運去台中之外，亦可以坐國光客運直接去台北，不過車程要3個半鐘。

 

在較大的地圖上查看日月潭水社遊客中心的位置

 

去到日月潭都只係上午11點，落車之後先行去我地今晚入住嘅日月潭Spa Home放低行李，因為要等到下午3:00先可以check-in。如果想睇關於日月潭Spa Home嘅介紹同住宿評價，可以參考呢篇《住@日月潭Spa Home》，呢度唔再重複。

 

 

因為日月潭Spa Home要等到下午3點先至有房，我地11點半到左之後，先攪左check-in手續，同埋放低行李，跟住就先出去玩啦。

 

雖然係話打緊風，不過係日月潭似乎冇乜影響，湖面依然係風平浪靜，就連雨都唔多，只係間中有一兩陳小雨。

 

日月潭嘅景點其實並唔係好多，最主要嘅景點係坐船遊覽日月潭同埋坐日月潭纜車，跟住就係行下水社碼頭附近嘅名勝街同伊達邵碼頭附近嘅商店街(但其實冇咩好行)，之後可以坐公車上去文武廟參觀下，全程五個鐘已經足夠，所以去日月潭唔一定要過夜，如果以台中為基地，即日來回都可以架。

 

趁住天氣仲未變差，我地先行過去水社碼頭坐船遊日月潭。

 

名勝街係日月潭最熱鬧嘅購物街，好多酒店都集中係呢區，亦有一D食店。不過名勝街其實好短，舖頭亦唔多，並唔係太有吸引力。

 

坐遊覽船嘅水社碼頭位於名勝街中間，去到就有好多人會問你係唔係坐船。係日月潭經營遊船服務嘅公司有好幾間，各自有自己嘅船，我地就係呢間(碼頭遊艇公司)買左飛，睇樣似乎最大間。

 

船票通常會買一日票，全日任坐，標價NT$300，實價NT$200。買左飛之後會係手背蓋個印，有印就可以上船，唔洗show張船飛。

 

遊覽日月潭嘅路線通常係由水社出發，坐到玄光寺碼頭上岸，參觀玄光寺，之後再上船去伊達邵碼頭，行商店街又或者行過去坐日月潭纜車，之後返回碼頭坐船返去水社碼頭。

 

在較大的地圖上查看日月潭景點的位置

 

 

碼頭遊艇公司嘅船係金色架，好易認。

 

船上有人介紹景點

 

好快到左第一站玄光寺碼頭，呢度只係得一個景點，就係山上嘅玄光寺。

 

茶雞蛋係呢度著名小食，而且係唯一一間，當然迫爆。

 

原來而家台灣主要旅遊客源已經係大陸遊客，周圍都見”陸客”蹤影，就算打風日月潭都迫滿一團團大陸遊客。

 

山上嘅玄光寺

 

參觀完玄光寺，再上返下一班船去伊達邵。

 

伊達邵碼頭

 

可能因為打風關係，伊達邵呢邊好少舖頭開門，好冷清。

 

係時候食午飯啦，不過好少舖開門，冇乜選擇之下入左呢間食地道菜。味道…

 

我地求其食左D，再抖一陣就出發行去日月潭纜車站坐纜車。由伊達邵碼頭行去纜車站大約900米，沿著湖邊用木板搭建嘅小路行大約10幾分鐘。

 

打風關係，人都唔多，好在仲係正常營業。

 

售票處係二樓。

 

我地買來回票，每位NT$250。如果打算由山上嘅九族文化村坐公車走，亦可以買單程票，不過單程只平NT$10。

 

因為冇咩人，工作人員都唔洗點做嘢，自己中意坐邊架就上邊架啦。

 

纜車係山上嘅終點站就係九族文化村，呢度三四月有櫻花，不過其他季節應該冇乜特別，只係一個機動遊戲嘅遊樂場，所以冇咩人入去。

 

坐完日月潭纜車，我地再沿路行返去伊達邵碼頭，然後再坐船返水社。返到去啱啱三點幾，可以去酒店攞房，酒店介紹請睇呢篇《住@日月潭Spa Home》。

 

係Spa Home休息一輪之後時間都仲好早，決定趁天氣仲好，再去埋文武廟參觀。去文武廟可以坐日月潭環湖公車，公車站係水社遊客中心，坐10分鐘就到文武廟。環湖公車嘅班次好疏，30分鐘一班，所以最好睇定時間。

 

參觀完文武廟，日月潭主要景點都基本去晒，仲有成個夜晚流流長唔知可以做D乜，因為一入夜，水社就變得靜英英，最熱鬧都係街口呢間7-11，真係有D後悔決定係日月潭住一晚。

 

唯有先食晚飯，再返酒店hea下。我地去左呢間叫明湖老餐廳嘅老牌食店，就係水社碼頭旁邊，D食物真係幾有水準，味豬腳好正，招牌菜係總統魚，不過冇咩興趣，所以冇點到。

 

食完飯係七仔行下，就返酒店抖啦，最後睇埋酒店房度影出去日月潭入夜嘅風景。

 

– Day 2 完 –

 

 

台北、日月潭之旅Day 3：日月潭去台北

 

朝早嘅日月潭被一層霧氣覆蓋，感覺比日頭靚好多，而且有一種平靜、安詳嘅feel。因為冇咩行程要去，冇任何planning，所以起身睇左陣景之後，又再訓過。

 

日月潭Spa Home嘅住宿包埋早餐，不過只係簡單早餐，食得健康。

 

食完早餐趁未夠鐘check-out，再行出碼頭散下步。今朝天氣仲算唔錯，不過可能颱風真係已經迫近，今日遊覽船全部停航，好彩我地尋日已經遊覽晒日月潭，不過今日黎到嘅遊客就掃興囉。

 

酒店11點就要check-out，離開酒店之後本黎打算行去水社遊客中心等車，不過行一陣啱啱有架返台中嘅公車駛過，原來半途截車都可以架喎，不過就要準備定散紙，上車之後將車資放入錢箱就可以。大約一個鐘之後我地已經返到高鐵台中站啦。

 

排隊買高鐵車飛返去台北啦。

 

上車前買定個台鐵便當上車食。

 

等車中…

 

車到啦…

 

車上開餐…

 

一個鐘多D就由台中去到台北，我地今晚會住西門町一間新開嘅精品酒店，叫薆悅酒店(inHouse Hotel)，呢間酒店係今次旅程中最滿意嘅酒店，如果想睇關於inHouse Hotel嘅介紹同住宿評價，可以參考呢篇《住@台北西門町薆悅酒店(inHouse Hotel)》。

 

由台北車站坐的士去酒店只係5分鐘，原來而家台北車站嘅的士站搬左落地下，就算落雨上車都唔怕狼狽啦。去到酒店時雖然仲好早，不過好彩已經有房，所以俾我地早check-in。

 

今次旅行只係日月潭果part有做功課，台北嘅行程冇點度過，只係打算行下街買下嘢，他他條條咁過。今日台北嘅雨勢雖然唔大，但係全日都冇停。

 

係西門町行左一陣搵唔到嘢食，最後決定坐的士去永康街鼎泰豐食嘢，呢度好似冇時冇刻都有咁多人等位。

 

好似每次都係食呢D嘢喎…

 

食完鼎泰豐再行去永康街睇下，原來新開左間維格。

 

呢間誠記嘅蔥抓餅好好食架，不過今日冇肚食啦，遲兩日再返黎食過。

 

由於天雨關係，今日餘下時間決定去行室內商場，所以成個下午就只係市政府站附近間阪急百貨同誠品度過。

 

而家可以直接由捷運市政府站行去阪急百貨同誠品，唔洗行出街。

 

行到5點幾，趁未到放工繁忙時間，快D返西門町。

 

– Day 3 完 –

 

 

台北、日月潭之旅Day 4：遊覽台北故宮、華西街夜市

 

雖然今次去台灣遇正兩個超級颱風夾擊，不過係台灣幾日都唔覺有咩風，今朝起身開窗一睇，出面陽光著照，睇黎個風好趕時間，走得好快播。

 

inHouse Hotel嘅住宿包埋早餐，係二樓Cafe Wakuwaku食，去到十點都仲有得食，可以訓晏D。

 

inHouse Hotel只係會住一晚，今日要搬去另一間酒店-台北頭等艙飯店，都係西門町，行過去就可以，酒店嘅介紹同住宿評價，可以參考呢篇《住@台北西門町頭等艙飯店(Airline Inn)》。

 

係頭等艙飯店放低行李之後，又漫無目地咁出去行下，先係捷運6號出口外面間Cold Stone食杯雪糕。

 

捷運出口外嘅蜘蛛俠宣傳公仔

 

今日咁好天，決定去兩個未去過嘅地方，第一個先去台北嘅國立故宮博物館。故宮博物館係士林區，冇捷運直達，可以先坐捷運去劍潭站、士林站或者劍南路站，再坐接駁巴士過去。我地係先坐捷運去士林站，再係站外轉坐紅30號公車去故宮博物館。

 

故宮博物館門外嘅公車站。

 

故宮博物館外型，只係作為影相背景，入面同一般大廈冇分別。

 

入場券NT$160

 

故宮博物館入面唔俾影相，所以無相睇。

 

行完故宮博物館我地轉坐棕20號公車去美麗華食嘢，之後返酒店抖抖，夜晚就去埋另一個以前未去過嘅地方 – 華西街夜市，台北夜市剩返呢個未去過。

 

華西街係一條有蓋嘅步行街，主要都係一D賣蛇同乾貨嘅店鋪，夜市嘅檔舖主要集中係廣州街，所以指示牌只係見到廣州街夜市，冇華西街夜市。

 

係捷運龍山寺站出閘之後，跟住廣州街夜市嘅指示行就係，不過廣州街夜市嘅出口好似十點就關門，如果行唔到可以行龍山去出口，出到街行去廣州街就係夜市範圍。

 

龍山去

 

廣州街

 

呢間阿鴻嘅鱸魚湯同豬腳好好味

 

華西街

 

華西街入面其實冇乜嘢好行，不過一定要入去呢間糖水店試下，佢嘅紅豆粥同燒麻糬好正。

 

– Day 4 完 –

 

 

台北、日月潭之旅Day 5：台北Hea遊

 

去到旅程例數第二日啦，今日本來都係冇咩行程，不過尋晚睇電視見到台北今日有個成人博覽會舉行，所以臨時安排左呢個特別行程，入去觀摩一下，睇下台灣攪嘅成人博覽會同澳門有咩唔同。

 

今日訓到中午，第一站先坐捷運去忠考敦化間度小月食luch，遇到架好pink嘅列車。

 

每次都必去呢間度小月

 

食飽就坐捷運去市政府站。

 

成人博覽會係世貿二館舉行，請左波多野結衣、成瀨心美同藤北彩香三位日本AV女優。

 

入場券要NT$500，比澳門貴少少。

 

場內情況

 

觀摩完再係101大樓附近行下，跟住又再返酒店抖抖。

 

今晚係台北last night，所以食豪一D，去左新光三越A9上面嘅老乾杯，仲坐係明星隔離枱。

 

– Day 5 完 –

 

 

台北、日月潭之旅Day 6：回程

 

終於黎到旅程最後一日，今日嘅主要任務，係買手信，因為好多食物只可以keep幾日，所以一定要等到上機前呢日先可以買。航空公司早一日打黎話飛機延遲，要到晚上7點先起飛，即係仲有大半日時間可以用。

 

今日嘅早餐食鴨肉扁，其實我對佢嘅鵝肉唔係太大興趣，反而覺得佢碗米粉好有口感。

 

食完再去飲杯白苦瓜汁解下毒。

 

跟住行過去港記買第一批手信，之後返酒店check-out同寄存行李。

 

遊行？

 

跟住再次去永康街，呢度起緊捷運站，遲D有捷運黎到方便好多。

 

第二批手信係去醉的小品買醉土雞，不過其實味道只係一般，同普通醉雞冇咩分別。

 

跟住去永康街食蔥抓餅，呢間誠記嘅蔥抓餅真係好好味架，每次去台北都會專登去食。

 

之後再行去信遠齋，旅遊書介紹佢嘅燻雞好出名，但睇樣一般，最後買左一D黎試下，味道果然只係一般。

 

最後又返返西門町買最後一樣手信。

 

今日係星期六，天氣又放晴，西門町人流明顯多過早兩日好多。

 

洗唔洗咁多人？原來係拍緊戲。

 

最後食埋楊桃冰，係時候出發去機場啦。

 

桃園機場

 

侯機大樓

 

因為飛機餐太難食，上機前食定嘢先。

 

– Day 6 完，旅程結束 –

 

相關文章：

• 香港、澳門入台證申請！港澳居民網路申請入臺證教學
• 台灣購物也可以退稅：台灣退稅手續流程全攻略
• 台灣電子入境卡（Taiwan Arrival Card, TWAC）：什麼人需要提交？如何填寫？
• 台灣武陵農場櫻花季：國光客運賞櫻專車購票攻略與賞櫻分享
• 台中、清境農場3日2夜自由行：行程、交通和住宿分享
• 台北烏來兩日一夜浸溫泉、遊老街、睇櫻花

________
本文網址：https://www.travelclassroom.net/2026/02/sunmoomlake-trip.html